Янгылышланы тюзлемеге заман бар


Бу бизин питне девюр заманда янгыз адам аралыкъларда тюгюл, айры-айры уьлкелени бир-бирине янашывунда да татывсузлукъ айрыча гьис этиле. Шо якъдан алып сёйлегенде, дюнья оьлчевдеги гьаким башчылар тувулунгъан гьалланы тюзлемек учун бир тюрлю чаралар гёрмей, къулакъ къысып тура.



Буса да, айрыча бизин уьлкеге бары да якъдан, дейгеним, гьар къайсы тармакъда да къыйыкъсытывлар узатылагъаны эсленмей къалмай. Уьлкени ёлбашчылары, олай да оьр гьакимлик къурумларыны вакиллери тувулунгъан шолай гьалгъа ичибушуп, бир эпге гелеген кюйде иш гёрмеге, озокъда, къастын болдурмай да тюгюл.


Тек нетерсен, оланы гьаракаты кёбюсю гезиклерде умут этилеген кюйде натижа бермей, ярты ёлда яйылып, туварылып къала. Къыбла Кореяны Пхёнчхан шагьарында етип гелеген 2018-нчи йылда оьтгерилежек къышлыкъ Олимпия оюнларда Россияны жыйым командасыны ортакъчылыкъ этивюн Халкъара Олимпия комитети гери ургъаны шону герти кюйде исбатлап къойду. Дёрт йылда бир оьтгерилеген инг агьамиятлы шо оюнларда бизин уьлкени жыйым командасына байлавлу къарар туврадан-тувра политика гьалланы таъсири сезилип къабул этилгени кимге де англашыла.


Гьар заманда да парахатлыкъны ва дослукъну элчиси болуп гелген спорт гьакъда сизин тергевюгюзге берилеген пикрумну узакъдан, дюнья гьалларындан башлагъаным шо саялы эди. Шу ерде лакъырны башгъа кюйде башламагъа, политика шартланы эсгермейли, янгыз спортну гьакъында сёйлеп къоймагъа бирдокъда бажарылмажакъ эди. Неге тюгюл, бугюнлерде спорт да, политика да бир-бири булан тыгъыс кюйде байлангъан.


Айтагъаным, биз нечакъы сюймесек де, спорт политиканы айрылмасдай бир гесеги болуп битген. Тувуп оьсген элин, оьзлени атын данггъа чыгъармакъ учун гюн де, гече де ял тапмай чалыша­гъан бажарывлу, савлай дюньягъа усталыгъын малим этген бизин спортчуланы, сайки, къуватын-гючюн артдырагъан маддаланы къоллав булан чыгъарылгъан оьрде эсгерилген шо къарарны бир тюрлю байлавлугъу да ёкъ десем, гьеч де къопдурув болмажакъ. Неге тюгюл, Россияны жыйым командасыны Олимпия оюнларда ортакъчылыкъ этивюне бакъгъан якъда Халкъара Олимпия комитетини ва къаркъарасыны къуватын артдырагъан маддаланы къоллавну алдын алывгъа къарайгъан бютюндюнья агентлигини хыянатчылыкъ, питнечилик, дагъы да ачыкълашдырып айтгъанда, тюпден таба юрюлеген бузувчулукъ гьаракаты гьатта тыш уьлкелени спортчуларыны да разисизлигин тувдура. Шо да янгыз гьакимлик къурумларыны вакиллерини тюгюл, ватандашланы да юреклеринде къаршылыкъ тувдура. Шо гьакъда олар спортгъа ва физкультурагъа къарайгъан хас къурумлар да билдире.


Шолай, ДР-ни физкультурагъа ва спортгъа къарайгъан минис­терлиги маълумат къураллар учун этген билдиривюнде:


«Россия дюнья оьлчевюнде спортда инг гёрмекли уьстюнлюкге етишип гелеген уьлке гьисаплана. Халкъара Олимпия комитети къабул этген къарар да шо гьалны бирдокъда алышдырмагъа болмажакъ. Шолай тогъаслар россиялы спортчуланы алдына 2016-нчы йылда Рио-де-Жанейрода оьтгерилген язлыкъ Олимпия оюнланы алдында да салынгъан эди. Шо заманда Россияны жыйым командасына къуршалгъанлар барысы да шо оюнларда ортакъчылыкъ этмеге болмады. Тувулунгъан шо гьаллар да бизин уьлкени спортчуларына оьр натижалагъа етишип, лап кёп медаллар къазанмагъа пуршав этмеди. Шо да бизин пачалыкъны спортда гючюн исбатлады», – деп айтыла. Шону булан бирге, шо билдиривде болуп турагъан агьвалатлар савлай жамиятны бирлешдирмеге тюшегени, олай да кёп санавда Олимпия чемпионлар чыкъгъан Дагъыстан шолагъа бирдокъда сесленмей къалмагъа тюшмейгени гьакъда эсгериле.


ДР-ни физкультурагъа ва спортгъа къарайгъан министерлиги Олимпия оюнлагъа бармагъа гьазирлик гёреген россиялы спортчуланы якълай. Халкъара Олимпия комитети къабул этген къарар да оланы токътатмагъа болмажагъына, биревюлейине, инг тизив натижалагъа етишмеге ругьландыражагъына инанагъанын билдире.


Гертисин-тюзюн айтгъанда, бизде барыбызда да шогъар инамлыкъ бар. Шондан къайры да, бизин спортчулар Халкъара Олимпия комитетини байрагъыны тюбюнде спортну гьар тюрлю жураларындан къазангъан медалланы даражасы-къыйматы, озокъда, бир де тёбен тюшмежек. Тек Ватан барыбызгъа да тувуп оьсген ерден башланагъанда йимик, байракъ да, Гимн де гьар къайсы уьлкени де харлысызлыгъын исбат этеген белгилер гьисапда къала. Шоланы къоллавну инкар этивню ёлгъа йибермеге ярамай. Шону гьисапгъа алып, Халкъара Олимпия комитети бизин спортчулагъа къаршы къабул этген къарарын гери уражагъына, шолайлыкъда, йиберилген янгылышланы тюзлежегине инанмагъа ярай. Шогъар гьали де заман бар. Политика масъалаланы буса спортну къуршамай чечмеге де бажарыладыр. Нечик алай да, Къыбла Кореяны Пхёнчхан шагьарында Олимпия оюнларда ортакъчылыкъ этмеге гьазирленеген 200-ден де артыкъ спортчугъа оьзлер оьтгережек тогъатартывларда уьстюнлюклер ёрап къояйыкъ.



Авторизация
*
*
Регистрация
*
*
*
Согласны с условиями сайта?
Генерация пароля