Умутларыбызгъа уллу тереклер авмасын!


1908-нчи йылны гёкшамаралдай гюз айлары. Францияны гёзел тахшагьары Парижде бири-бири булан тогъатартма дюньяны лап да гючлю ва сынавлу кочаплары жыйылгъан. Оланы арасында уллу Россия империяны вакили Сали-Сулейман да бар. Бир айны узагъында юрюлген ярышларда дагъыстанлы кочап, бары да ябушувларын утуп, ватанына чемпион болуп къайта. Шондан берли (бу йыл болгъанча), халкъара ярышларда россиялы тутушуп ябушувчулар бир сама алтын медальны къазанмагъан гезиклер болмагъан. Тек арадан юз йылдан да къолай заман гетип, къайтып шо Парижде, дюньяны чемпионатында, уьлкебизни тутушуп ябушувдан жыйым командасыны кочаплары биринчилик учунгъу ябушувларын утдуруп, тезден гелеген макътавлу мердешни бузгъан.


Чемпионатдан сонг, жыйым команданы баш тренери Д.Тедеев, журналистлени соравларына жавап бере туруп, бир де бети къызармагъан кюйде: «Бу ончакъы агьамиятлы ярышлар тюгюл эди»,–  деген. Шо сёзлерден сонг ону, Россияны спорт ябушувланы федерациясына чакъырып, сонг шоссагьат къувалап, чангын чыгъарып, дагъы командагъа ювукъ болмайгъан кюйде этмеге герек эди.


Д.Тедеевни жавапларыны бирдагъы бир ери де тамашагъа къалдыра. яман ачувумну да чыгъарды. Ол спортсменлени гьарисин-бирисин танкъыт эте туруп, 65 кило авурлукъда ябушгъан Алан Гагаевни гьакъында лакъыр чыкъгъанда: «Ябушув битме 3 секунд къалгъанда адам нечик утдуруп бола? Мен англамайман! Шо гюржюлюню (Зураб Якобашвили) уьч ай алъякъда Европаны чемпионатында Ильяс Бекболатов 10:0 булан утгъан эди», – дей. Шо мюгьлетде журналистлени бириси сама: «Неге дагъы ону командагъа чакъырмагъансыз?» – деп сорав бермей. Белгили кюйде, бу йылны май ­айында Сербияда оьтгерилген Европаны чемпионатында Ильяс оьзю булан тогъатартма чыкъгъан кочапланы бирисине де бир бал да утдурмагъан эди. Шо спорт ябушувланы тарихинде алда бир де болгъан зат тюгюл.


Дагъыстанны тутушуп ябушувдан жыйым командасыны баш тренери Сажит Сажитов оьзюню Тедеевге бакъгъан якъдагъы янашывун яшырмай ачыкъдан айта. « Ол айтгъан сёзюнде табылагъан адам тюгюл. Хохайып, оьзгелени оьзюнден кем гёрюп юрюй. Даим артындан чабып, тилеп, ялбарып тургъанны сюе. Командагъа  болгъан чакъы  оьзюню милли республикасындан (Темиркъазыкъ Осетия) чыкъгъан спорт­сменлени къуршама къарай. Сонг биз пагьмулу кочапларыбыз уьлкеден гетип, башгъа пачалыкълар учун ябушагъанына тамаша болабыз. Ол тюгюл чемпионланы яратагъан. Яшлар оьзлер, тренерлерини кёмеги булан, къыйын тер тёгюп чемпионлар болалар», – дей С.Сажитов. Оьзге белгили тренерлер де, Олимпия оюнланы чемпионлары да шо пикруну якълайлар.


Тюзюн айтгъанда, бизин кочабыбызгъа этилеген тюзсюзлюклер, къыйыкъсытывлар гьали башланмагъан. Эсигизде бар буса, 2015-нчи йылда Россияны чемпионатында финалда Ильяс шексиз кюйде осетинли Сослан Рамоновну утуп, чемпион атгъа ес болгъан эди. Тек шо ярышлардан сонг шо йыл Лас-Вегасда оьтгерилеген дюньяны чемпионатына баш тренер И.Бекболатовну орнуна  С.Рамоновну бакъдыра. О да утдуруп, биябур болуп къайта.


Уллу спорт булан байлавлу бир-бир тайпаны Ильясны тутушуп ябушувдагъы гьаракатына, янгы уьстюнлюклеге алынагъан инамлы абатларына  нечик буса да чатакъ салма бек белсенгени гёрюне. Шолай гезиклерде спортсмен тийишли къурумланы ва жамиятны янындан якълавну гьис этме герек. Ильяс Европаны чемпионатын утгъаны булан байлавлу шатлы мажлисде Дагъыстанны спорт министри М.Магьамматов айтгъан сёзлер яхшы эсимде къалгъан. Ол  шолай тизив  кочапны тарбиялагъан Ильясны ата-анасына, тренерине, анадаш Къаягент районуну ёлбашчыларына баракалласын билдире туруп:  «Ильясны ол Олимпиаданы утуп гелгенде де бугюн йимик къуванчлы кюйде къаршылажагъыбызгъа бек умут этемен», –  деген эди.


Тек шо Олимпия оюнлагъа барагъан ёлну къыркъып, ­оьтюп болмасдай барулар тургъузуп айланагъанланы терс гьаракатын токътатмаса, министрни ва огъар къошулуп бизин барыбызны да умутубузгъа, эл арада айтылагъан кюйде, уллу тереклер авмакъ бар. М.Магьамматовгъа, спортсменни янгыз макътавлу сёзлер булан якълап къоймайлы, оьзюню гьакимлик ихтиярларындан да, борчларындан да  пайдаланма заман болгъан. Ондан къайры, бизин жамият къурумларыбызгъа да къуру уллу масъалаланы гьакъында сёйлеп турмайлы, адиллик учунгъу гьаракатгъа да къуршалма ярар эди. Оьзю Ильясгъа буса, чул билдирмей, ругьдан тюшмей, спортда ва яшавда дагъы да уллу оьрлюклеге етишмеге насип болсун!

Авторизация
*
*
Регистрация
*
*
*
Согласны с условиями сайта?
Генерация пароля