Недир бизин алгъа барма къоймайгъан?

   Йылны ахыры, адатлы кюйде, гьасиллер чыгъарагъан заман.  Оьтген гюнлеге, айлагъа гёз къаратып, азыкъ учунгъу талашывланы унутуп, олтуруп,  юмуругъун сакъалына тиреп, терен ойгъа тюшеген вакъти. Гьарибизни къоюп, бютюн миллетни гьакъында айтсакъ, къумукълар учун 2017-нчи йыл нечик йыл болду? Тас этивлеге тарыдыкъмы, артгъа теберилдикми яда бир тюрлю уьс­тюнлюклеге етишдикми? Гелигиз, шо соравлагъа бирче жавап берме къарайыкъ!


Я, сен кимсен бютюн миллетни атындан сёйлеме деп пушургъанагъанлагъа гьазиринде жавап беремен. Мен журналистмен. Яшавум милли газет булан байлагъанлы, арадан 32 йыл оьтдю. Шо магъа оьзюмню ойларымны айтма, сизин булан  сыр чечме  толу имканлыкъ ва ихтияр бере. Ондан къайры, охувчуларыбызны кёбюсю мени  халкъыбызгъа байлавлу масъа­лаларына нечик янашагъанымны ва язагъанымны бек яхшы биле.

 


Тюзюн айтгъанда, оьтген йыл бизин миллет учун  къуванчлы, пайдалы йыл болду деме тилим айланмай. Гьы, гьали башлар гезикли «ваягьларын», кантларын дейгенлеге, сабур болуп, шу гиччирек макъаланы ахырына ерли охумакъны ёрар эдим. Не тармакъны да, не масъаланы алып къарасакъ да, тёшюбюзге къагъып макътанма чакъы себеплер онча кёпдюр деп эсиме гелмей. Баргъан сайын маданиятда, илмуда, маълумат, политика ва пачалыкъ тармакъларда аза барабыз. Янгыз алдагъы заманланы, яшавдан гетген белгили асил адамларыбызны, къагьруманларыбызны  эсге алып, теренден кюстюнюп турмакъ къала. Юртларыбыздан айланып чыкъсакъ, халкъны мадарлыгъы артмайгъаны ачыкъдан гёрюнюп, сезилип тура. Яш наслугъа эбе-хырлы яшав къурма, оьрленмеге ёллар къыркъыла. Ватанында ултан болма сюймей, йыракъ ерлеге чыгъып гетелер. Уьстевюне, оланы бир пайы ят эллерде даимликге орунлашып къала. Къайсын-бирисин айтайыкъ…


Шолай гьал неден тувулуна?  Бары да дагъыстан миллетлеге тенг кюйде тиеген себеплени эсгере турмай, янгыз бизин халкъгъа байлавлуларын айтсакъ, эл арада, жамиятда сыкълашыв, биз бир халкъбыз деген ой-инаныв, тухум-тайпачылыкъ, мердешлеге аркъатаяв осаллашгъан. Крыловну белгили масалындагъы къув, чортан балыкъ ва жымыра йимик, бир тюрлю гюплер миллетни арбасын гьариси гьар якъгъа тартып тербей. Гьар тюрлю къайдалар булан гьакимликге гётерилеген тайпа, кёбюсю халкъ масъалалардан, миллетини гьайын этивден кёп арек.


Бизин жамият къурумларыбыздан да хыйлы затны къаравуллай эдик. Тек оланы гьаракаты гьалиге асувлу натижалар бермей, адамлар  оланы ишине алда йимик къуршалмай. Шогъар тамаша да болма тюшмей.  Биринчи герти халкъчылыкъ жамият къурум «Тенгликни» этген ишин де, ону башын тутуп юрюгенлени де ерсиз сёгюп, элеке-селеке этип юрюлеген терс, зиянлы  гьаракат нече йыллар узатылып турду. Гьали де бар миллетибизни сюймейгенлени тирменине сув тёгегенлер. Шо саялы халкъ жамият къурумлардан ари теберилди, гёнгюлсюзлюкге, айсениликге тарыды, оьзюню гючюне-къудратына инанмайгъан, шеклик этеген болду.


Гьали къумукълар арбаны уьстюнде де олтуруп, юхусырап, къалгъып турагъан арбачыгъа парх бере. Къарагъанда, арба бирден терен ойтангъа тюшмейли, арбачыгъа эсге гелив, уяныв ёкъ. Оьзлюгюнден, не этме герек дагъы деген сорав арагъа чыгъа. Мени гьисабымда, къумукълагъа оьзлени бютюнмиллетге девюр оьзлени алдына салагъан уллу ва четим масъалаланы арагъа салып ойлашмагъа, алгъа барывну ёлларын токъташдырмагъа тезден заман болгъан.

Авторизация
*
*
Регистрация
*
*
*
Согласны с условиями сайта?
Генерация пароля