Шонда «Единая Россияны» Дагъыстандагъы бёлюгюню секретары Хизри Шихсайитов, «Единая Россияны» СКФО-да алданокъ тавуш беривню оьтгеривню толу ихтиярлы вакили, Пачалыкъ Думаны миллетлени ишлерине къарайгъан комитетини председатели Гьажимет Сафаралиев, олай да гьар ерлердеги къурум комитетлени членлери ортакъчылыкъ этгенлер.
Сергей Неверов генгешни ача туруп, алданокъ тавуш беривню оьтгермеге аз заман къалгъанны айтгъан. Ол оьзюню гиришив сёйлевюнде, бары да ватандашлар шо гьаракат не къайдада оьтгерилежегин билмеге сюелер деп эсгерген. Сонг да, Сергей Неверов сёзюн узата туруп, Россияны Президенди Владимир Путин, «Единая Россияны» председатели Дмитрий Медведев токъташдыргъан кюйде, алданокъ тавуш беривню принциплерине гёре конкурентлик ва ачыкълыкъ болма тарыкъны айтгъан. Ол генгешде билдирген кюйде, «Единая Россия» партияны алдына салынагъан аслу мурады–алданокъ тавуш беривде халкъны да, гьакимиятны да арасында разилешивню болдурмакъ.
Сергей Неверов жыйынны юрюте туруп, агитация кампанияны гьаракаты гёрсетген натижалагъа гёре, оьр даражада конкурентлик бары ачыкъ болгъан деп эсгерген. Бугюнлеге ерли бары да пикру алышдырывлар токъталгъан.
–Россияны бары да ерлеринде пикру алышдырывлар юрютмек учун 1 минг 549 ер гёрсетилген эди. Шонда гьисапгъа алынгъан алданокъ тавуш беривню 2 минг 800 ортакъчысы ортакъчылыкъ этген,–деп билдирген Сергей Неверов.
Сергей Неверов айтгъан кюйде, «Единая Россия» биринчилей юрюлеген алданокъ тавуш беривню оьтгеривде инг башлап ватандашланы инамлыгъы болма герек. Сонг да, ол Федерал къурум комитет алданокъ тавуш беривню гьар ортакъчысыны гьакъында мекенли маълуматлар жыяжакъ деп эсгерген. Эгер де законгъа къаршы ишлер юрютюп айланагъанлар бары ачыкъ болса, шо адамлар алданокъ тавуш беривден тайдырылажакъ.
Генгешни вакътисинде алданокъ тавуш беривде ортакъчылыкъ этмеге гьисапгъа алынгъанлардан бир-бир себеплеге гёре уьчев гери урулгъан. Генгешни ахырында партияны янгы членлерине партия билетлери тапшурулгъан.
Бизин мухбирибиз.
