Гьакимден тюзелмек – биринчи насип


Оьзге къуллукъланы арасында ёлбашчыны къуллугъу лап аслусу буса да ярай. Гьали чи о къуллукъну юрютегенлени ихтиярлары бек артгъан. О саялы да оланы бирлерини башалманчылыгъы да йыл сайын арта.



Маънасына тергев берип къарасанг, гьаким – жамият арада халкъны гьайын этип ишлесин деп, пачалыкъ огъар алапа гьакъ да тёлеп салгъан пачалыкъ къуллукъчу. Гьарибизге олай биринчи гьакимлерден 4 адам тие: федерал, респуб­лика, муниципал ва ерли гьаким. Эки янында дагъы да олардан гиччи оьзге гьакимлер де бар. Оланы гьариси, гьар кимни къысматында не яхшы, неде яман гьыз къойма бола. Бириси сама къуллукъларында къыйыкъсытывлар йиберсе, гьарибизге яшавда четимликлер тувула.



Федерал гьакимлер арекде ерлешген саялы, туврадан гьарибизни къыйыныбызны, тынчыбызны билмей къалма бола. Ювукъдагъы гьакимни пайдасы яда заралы бек тие. Бизде, Дагъыстанда, озокъда, республиканы Башчысы, шагьар, район башчылар халкъ учунгъу аслу къуллукъну кюте. Шо саялы да халкъгъа о нечик гьаким экени туврадан гёрюне.



Буйнакск шагьар да артдагъы йылларда гьакимден тюзелмей турду. Республиканы алдагъы башчысы Абдулатипов шагьарны баш гьакими этип салма сюеген адамны халкъ къабул этмей эди. Митинглер болду, шагьар депутатланы арасына питне тюшдю, эришдилер, бир-бирине авур сёзлер айтдылар… Шолай вакъти шагьар администрациядан кютме герекли къуллукъланы яшавгъа чыгъарывну имканлыкълары тая. Халкъгъа зарал бола. Оьр гьакимлик къурумланы янындан да о бек четим кемчилик гьисаплана.



Шагьарны ичиндеги темир ёлну уьстюнден оьтеген кёпюр бузулуп, машинлер юрюме болмайгъан заманда да ону ярашдырма шагьар администрация харж маялар тапма болмады. Орамдан оьтюп барагъанлардан акъча
тилеп онгарылды. Гьар ерге жыйылгъан чёпню сама заманында тайдырып болмай эди. Шагьарны баш орамыны асфальты бузулуп, чонкълардан машинлер гьаран юрюйген болду. Не буса да, кёп заман гетген сонг, болмайгъан ерге етишгенде онгардылар. Ичеген сувну масъаласы да бек бузукъ эди. 

   


Республика оьлчевдеги йыллар бою чечилмей къалгъан масъалаланы йыл сайын заралы артагъандан къайры, олар дагъы да оьзге тюрлю кемчиликлени де тувдура. Коррупция, урушбатчылыкъ, тухумчулукъ артдагъы йылларда айрокъда бек айынып, сюйген кюйде яшама сюегенлер де бола. Демократия къысылып, эркинлик гючюн тас этди. Халкъны пикруларын бир-бирине къошуп айтса, булай ойланы дагъы да узатма бола.



– Гетген гьакимибиз Дагъыстангъа уллу яхшылыкълар этген адамдай сёйлей эди. Ол гетген сонг кёп зат аян болду. Кемчиликлени уьстюн ачып, арагъа чыгъарып, республиканы оьсювюне пуршав этеген, уллуларын тайдырып иш гёрме болмайгъан яда бажармайгъан ёлбашчы, республикагъа зарал этсе тюгюл, хайыр гелтирмежеги оьр федерал гьакимлеге дагъы да тез белгили болгъангъа ошай. Йиберилип гелген Владимир Васильевни яшав ёлун тергевлю охуп къойса да, о гьакъда англашыла. О къуллукъгъа Москвадан бары да янындан сыналгъан адамны йибергени негьакъ тюгюл деп ойлашагъанлар кёп. Бизин, дагъыстанлыланы ондан умут этегени, къаравуллайгъаны дагъы да уллу.



Бу гьакъда газетни бугюнгю номеринде де бизин жамият арада белгили адамланы бирлери оьзлени пикруларын яшырмай ачыкъдан англата.



Авторизация
*
*
Регистрация
*
*
*
Согласны с условиями сайта?
Генерация пароля