«Агитдесант» халкъны сайлавлагъа чакъыра

Жыйынны Бабаюрт районну башчысы Элдар Къарагишиев ачды. Ол оьзюню сёйлевюню башында «Агитдесант» булан Бабаюртгъа гелген къонакълагъа баракалла билдирди ва сайлавланы алдында бир партиягъа да, бир кандидатгъа да ян тартмагъа тюшмейгенни гьакъында айтды.

– Бу йылгъы сайлавларда кёп санавлу партиялар ва айры кандидатлар ортакъчылыкъ этелер, – деди Элдар Къарагишиев. – Биз бугюн биревге де пелен партиягъа тавуш бермеге тюше яда оьзгесине тавушун бермеге ярамай деп айтмайбыз. Сайлавчулар оьзлени юрегине ювукъ партиягъа да, айры кандидатгъа да тавуш бермеге ихтиярлы. Шо ихтиярлар олагъа Россияны Конституциясы булан берилген ва биз оланы етишип гелеген сайлавларда шо ихтиярлар булан пайдаланмагъа чакъырабыз.

«Агитдесантны» вакили, Дагъыстанны Жамият палатасыны члени, профессор Мустапа Билалов оьзюню сёйлевюнде етишип гелген сайлавларда сайлавчулагъа тавуш береген вакътиде оьзлени юрегине тынглап тавуш бермеге герекни гьакъында айтды.

– Дагъыстанны темиркъазыкъ боюнда сайлавларда ортакъчылыкъ этеген 10 партия ва айрыча 3 кандидат бар,– деди Мустапа Билалов. –Тавуш бере туруп да, сайлавчулар бир партиягъа берилгенликге яда, айры кандидатланы бетине къарап тюгюл, олар бизин тангалабыз булутсуз болсун учун не иш этгенге яда не иш этмеге умутлу экенине, халкъны арасындагъы абуруна, билимине къарап тавуш бермеге герек. Бизин алдыбызда токътагъан лап да аслу борч – сайлавчуланы сайлав участкалагъа геливюн болдурмакъ. Халкъ оьзюню гележегин оьзю белгилемеге герек.

Жыйында чыгъып сёйлеген «Россияны аналары» деген Бютюнроссия жамият бирлешивюню Дагъыстан бёлюгюню ёлбашчысы Таиса Магьамматова, КПРФ-ни Бабаюрт райондагъы бёлюгюню ёлбашчысы Нурутдин Нурутдинов, «Адилли Россия» деген партияны район бёлюгюню ёлбашчысы Камил Абсаламов, «Давну яшлары» деген жамият къурумну ёлбашчысы Вайдулла Шайыбов ва оьзгелери гьар сайлавчу оьзюню ватандаш борчун кютмеге ва оьзюню къысматына оьзю ес болмагъа герекни айтдылар.

Зал толгъан халкъ Дагъыстанны Башчысы Рамазан Абдулатиповну инамлы адамларыны Советини члени, Бабаюртдагъы кёп тюрлю иш гёреген яшёрюмлени центрыны ёлбашчысы Гьасан Османовну сёйлевюн уллу харс урувлар булан къаршылады. Ол оьзюню сёйлевюнде оьзю тувгъанда авурлугъу 600 грамдан да оьтмейген яш сав къалажакъгъа бирев де инанмайгъанда, янгыз анасыны инамлыгъы ва къастлыгъы булан бугюнгю ерлеге етишгени гьакъда айтды.

– Гьар адамны юрегинде гележеги яхшы болажакъгъа инамлыкъ болмагъа герек, – деди Гьасан Османов. – Уьйде де туруп, буюгъуп, мен нени алышдырып боламан, менден не гьасил бола деп ойлашса буса, ону тавушу булан оьзгелер пайдаланмагъа бола.

Жыйынны ахырында Бабаюртдагъы «Тангчолпан» деген Россияны халкъларыны мердешли маданият центрыны къуллукъчуларыны концерти болду.


Герейхан ГЬАЖИЕВ,



бизин мухбирибиз.



СУРАТДА: Жыйынны барышы



Автор чыгъаргъан суратлар

Авторизация
*
*
Регистрация
*
*
*
Согласны с условиями сайта?
Генерация пароля