Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsВ ДагестанеВ РоссииИнтервьюВ миреНа КавказеГлава РДНародное СобраниеПравительствоМинистерства и ведомства Муниципалитеты In memoriamНовости спортаГод культуры безопасности Выборы - 2018ЧЕ-2018 Kaspeuro2018"Времена"ИнфоблокПолитикаИсторияКультураЛюди и время НаукаНовые книгиАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилКроссвордМасхараларТеатрЯнгы китапларЯшланы дюньясы Спорт ярышларЕдиноборства Развитие спортаСоревнованияФК «Анжи» МедиасфераО газетеО сайтеСМИФото дняНаши партнерыНаши спонсорыСотрудникиНаши авторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)
Ачыкъ ва аччы лакъырны талап эте

Ачыкъ ва аччы лакъырны талап эте

   


Гьар жамиятны яшавунда йыллар булан мердешленип, бир дазулагъа тюшюп гелеген барышын бирден бузагъан, алышдырагъан агьвалатлар бола. Тарихлеге гёз къаратсакъ, шоланы кёбюсю къайгъылы мюгьлетлер булан байлавлу геле. Шолардан тийишли дарс алма сюймейген махлукъ адатлы гьалда бара-бара уллу къыйынлыкълагъа тарый.


Мен артдагъы гюнлерде Къызларда болгъан вагьшиликни тап шолай, жамиятны гележекдеги ёлун- ёругъун белгилейген, къысматында билинмей къалмасдай   масъалагъа гьисаплайман. Охувчуларыбызны арасында: «А яш, гьали чи сен оздуруп йибердинг бугъай. Аз болгъанмы бизде чапгъынлар?!» деп ойлашагъанлар да болмакъ бар. Тек, гелигиз, сабур-саламат кюйде, очарда йимик ой къуруп къарайыкъ.


Гертиден де, дагъыстанлылар Союз тозулгъан сонггъу йылланы ичинде не гёрдю, не гёрмеди. Тек сиз гиччи ватаныбызда болгъан агьвалатлагъа бютюндюнья къурумлар, оланы арасында гьатта Ватикан, ОБСЕ сесленгенин къачан эшитгенсиз?! Жагьаннемни отунда яллап, чиркип туражакъ элаздыргъан дин байрамны вакътисинде, Яратгъаныбызгъа сужда къылагъан ерде, оьзюню улланасы чакъы гюнагьсыз эсли къатынланы жанларын къыйгъан. Мен билсем, Дагъыстанны, Россияны тарихинде бир де болгъан зат тюгюл. Шо вагьшилик иш бизин гележекдеги яшавубузда билинмей къалажакъ деп гьали де эсигизге гелеми?! Душманларыбыз аз тюгюл, олар бу агьвалатны оьзлени терс хыялларына эркин кюйде къоллажагъына шекленме де тюшмей.


Болгъан чапгъын,   адатлы калималар булан дазуланып къалмай, ачыкъ ва аччы лакъырны талап эте. Айрокъда аманлыкъны къоруйгъан къурумланы ишине кёп соравлар тувулуна. Чапгъын этген Х.Халилов Интернетден таба Сирияда террорчуланы сыдырасына къошулуп, ондагъы пачалыкъ асгерлеге къаршы давларда ортакъчылыкъ этеген зукъариси булан эки йылны узагъында байлавлукъ юрюте болгъан. Неге шо тергевсюз къалгъан? Ондан къайры, жинаятчы, ата юртундан чыгъып, Тарумов районну Рассвет деген юртуну къырыйында къошларда янгыз яшай болгъан. Шогъар да тергев берегенлер болмагъан.


Бирдагъы бир сорав тувулуна. Рассветден Къызларгъа ерли 25 чакъырым ёл бар. Неге савутлангъан адамны бир полиция постда да токътатмагъанлар? Ол машинин шагьарны ортасында къоюп, къолуна тюбек алып, килисагъа ерли парахат кюйде етишген. Бир нече йыл алъякъда Ич ишлер министерлиги къабул этген къараргъа гёре, Дагъыстандагъы бары да килисаланы, айрокъда дин байрам гюнлени вакътисинде, полицияны къуллукъчулары къорума герек. Тек, ажжалгъа талав йимик, шо гюн Къызлардагъы килисаны алдында полицейскийлер болмагъан.


Бирдагъы мени тамашагъа къалдырагъан зат. Бугюнлерде Цунта районну Кидеро деген юртуну жамияты прокуратурагъа арза язгъан. Арзасында олар полицейскийлени къолуна тюшген   юртлусу, Х.Халиловну ювукъ къардашы болагъан Али Алиевни азат этмекни талап этген. Озокъда, кидеролуланы юртлусун якълама толу ихтияры бардыр. Тек шо арзада башгъа юртлусу этген вагьшиликни айыплайгъан бир калима сама ёкъ.


Биз даим олтургъан-тургъан ерибизде: «Дагъыстан – бизин умуми уьюбюз!» – деп оькюре болабыз. Тюзюн айтгъанда, шогъар бирев де шеклик этмей. Амма шо уллу уьйню ичинде гьар миллетни оьзлени айрыча квартирлери бар.   Гишини ожагъына соравсуз-соргъусуз гирип гелип, намартлыкъ этегенлеге, налат берегенден ва такъсырлайгъандан къайры, дагъы шонда ювукъ да гелмесдей чаралар гёрме тийишли.



Количество показов: 351
Автор: Алав АЛИЕВ
26.02.2018 11:45

Возврат к списку









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта