Сыйдан тюшмегей эди


Россияны оборона министри С.Шойгуну къарарына гёре, Дагъыстанны «Лезгинка» деген ансамбли «Сириядагъы дав агьвалатны ортакъчысы» деген медаль булан савгъатлангъан. Шогъар байлавлу Интернетде ерлешдирилген суратларда инче белли, къуймурлугъундан тёгюлюп гелеген къызъяшланы тёшюне тагъылгъан асгер савгъат бир тамаша гёрюне. Билмеймен, башгъалар не ойлаша буса да, тек мен шолай савгъатлавну арив гёрмеймен. Неге гёрмейгенимни де англатма къарайым.



Ондан алда В.Гергиевни оркестрына да тап шолай савгъатлар тапшурулду деп бизин бийивчюлени якълама сюегенлер де болмакъ бар. Тек мен шо эки де яратывчу коллективлени тенглешдирмежек эдим. Гергиев оьзюню музыкантлары булан Сириядагъы дагъытылгъан, дюнья тарихинде айтылгъан Пальмирада эки йыл алъякъда, ачыкъ этип айтгъанда, 2016-нчы йылны май айында болгъан. Эсигизге салма сюемен, шо вакътилерде арап пачалыгъында къызгъын давлар юрюле эди. Халкъара бандит уьюрлерден янгы азат этилген Пальмираны ичи яшыртгъын атылтыв алатлардан толгъан эди. Шагьардан къачып чыкъгъан террорчулар арекден оьтгереген атышывларын да токътатмай эди. Шо гьалларда бизин асгерлени алдында гелип концерт гёрсетмекни, гертиден де, уллу къоччакълыкъгъа гьисаплама ярай. «Лезгинка» буса Сирияда башгъа шартларда, ябушув-чабушувлар шайлы сел болгъан вакътилерде болгъан.



Пачалыкъны янындан гьар ватандашны этген ишин, къошумун, гьаракатын тюз кюйде къыйматламакъны уллу политика маънасы бар. Шо ишде адилсизликге, немкъорайлыкъгъа ва башгъа тюрлю пакарсызлыкълагъа бир де ёл бермеге ярамай. Эсигизде бар буса, республиканы алдагъы башчысыны заманларында пачалыкъ савгъатлар уллу гече канпетлер оьлешегенде йимик пайлана эди. Я, бу адамгъа бу савгъат не учун берилген экен деп ойлаша къала эдинг.



Мисал учун, бир вакъти «Анжи» футбол командада ойнагъан Самуэль Это О Англиягъа гёчюп, ондагъы чемпионатда биринчи тобун гийиргенде, оьзюню Интернетдеги бетинде: «Челсини» утуп болгъан мен биринчи дагъыстанлыман», – деп язгъан болгъан. Шо сёзлерден бек ругьланып, Р.Абдулатипов футболистни «Дагъыстан учунгъу къуллукълары саялы» деген орден булан савгъатлагъан эди. Къарагъанда, ол «Анжиде» ойнай туруп, йылда 20,5 миллион евро къазанып тургъаны азлыкъ этгенге ошай. Бизин манатлагъа айландыргъанда шо нечакъы болуп токътайгъанын оьзюгюз гьисабын чыгъарып къарагъыз.



Яда башгъа мисал. 2016-нчы йылда Магьачкъалада белгили москвалы художник Никас Сафроновну выставкасы оьтгерилген эди. Балики, биревлер ону пагьмулу сурат этивчюге гьисаплай буса да ярай, тек мен башгъачалай ойлашаман. Бизин бир-бир художниклерибиз оьзлени ишлери булан ону бурнуна сув тийдирип бола. Амма Р.Абдулатипов уьлкени тахшагьарындан гелген къонакъны тергевсюз къоймагъан. Республиканы о замангъы башчысы Н.Сафроновгъа «Дагъыстанны инчесаниятына этген уллу къошуму учун» огъар оьзюню къарары булан «Дагъыстанны халкъ художниги» деген гьюрметли атны берген. Белгили кюйде, Н.Сафроновну тавлар элине ва ону адамларына багъышлап этген бир сураты да ёкъ. Дагъы да, шолай Дагъыстан пачалыкъ савгъатлар булан «къыйматлангъанланы» арасында ВГТРК телеканалны генеральный директору О.Добродеев, 1-нчи каналны башчысы К.Эрнст, ИТАР-ТАСС маълумат агентликни директору С.Михайлов, «НТВ» каналны башчысы А.Земской, «Аргументы и Факты» деген жумалыкъ газетни генеральный директору Р.Новиков, бир нече федерал министерликлени башчылары ва жаваплы къуллукъчулары да бар.



Уьстюнлюкню байрамында шагьардан гезейгенде, тёшю орденлерден ва медаллардан толгъан тамазаны гёрсем, танымай бусам да, саламлашмай, сорашмай оьтмеймен. Башымда къалакъайым бар буса, шогъар аямны тиреп, асгер саламын да берме унутмайман. Мен ону савгъатларыны герти къыйматын яхшы англайман. Гюнагьларын Аллагь гечсин, уллаталарым да давну оьртенлеринден оьтген тавакаллы адамлар эди.



Савгъатланы пачалыкъны атындан берегенде, арабыздан гетген ва гьали де оьмюр сюрюп турагъан ветеранланы эсге ала турма тюше эди. Тийишсизлени къыйматлап, савгъатланы сыйдан тюшюрме герекмей.



Авторизация
*
*
Регистрация
*
*
*
Согласны с условиями сайта?
Генерация пароля