Дюнья, не чалт «айланасан»

       Артдагъы он гюнлени ичинде дюньяда ва бизин уьлке Россияда да болуп гетген агьвалатлар, гертиден де, дюнья бек чалт айланагъанда йимик пикрулар гелтире. Биринчилей, Ливия пачалыкъны айланасында оьтгерилеген сёйлешивлер. Экинчиси – Россияны Президентини Федерал Жыйынгъа Чакъырыву. Уьчюнчюсю – Россияны Гьукуматыны борчларындан эркин этиливю.


Озокъда, тергевлю къарасанг, дюньяда шо аз болжалны ичинде болуп гетген оьзге агьвалатлар да бар. Тек бизин уьлке учун шо оьрде эсгерилгенлери агьамиятлы деп эсиме геле.


Ливиядагъы гьалны ёрукълашдырыв учун дюнья оьлчевде оьтгерилген сёйлешивлер де Россияны Президенти Владимир Путинни гьаракаты булан юрюле деп айтмагъа толу имканлыгъыбыз бар. Шо буса халкъара политика яшавда бизин уьлкени абуру гётерилегенликни исбатлай. Ондан алда Путинни гьаракаты булан Сириядагъы гьалны ёрукълашдырыв масъалаларыны чечиливюне бакъдырылгъан ёлугъувлар да тергевню тартгъан эди.


Ливия совет девюрде бизин булан ювукъ, дос аралыкълар юрютеген уьлке эди. СССР тозулгъан сонг бизин кёмегибиз токъталгъанда онда къалмагъаллар да башланды. Буссагьатгъы вакъти Ливияда ватандаш дав юрюле. Къаддафи къургъан политика, экономика токъташгъан ва халкъны яшавун яхшылашдырывда уьстюнлюклеге етишген республикада гьалиги гьаллар бек бузукъ. Россия шогъар байлавлу гьай этив гьаракатын гёрсетип юрюйгени, биринчилей, Ливияда яшайгъанлар учун пайдалы, экинчилей де, Россияны халкъара оьлчевдеги абурун гётере.


Президент Владимир Путинни Федерал Жыйынгъа бу йылгъы Чакъырыву да уьлкебизни гёз алгъа тутулгъан муратларын белгилей. О гьакъда хыйлы сесленивлер бар. Барысында да шо муратланы асувлугъуну гьакъында эсгериле. Йыллыкъ программа яшавгъа чыгъарыла туруп, халкъны яшаву да яхшылашажакъгъа шек ёкъ.


Бирдагъы агьвалат адамланы къалгъыв юхусундан айырып, ватандашлыкъ гьислерин хозгъагъан буса да ярай. Кёплерибиз 8 йыл Гьукуматны башы болуп ва 4 йыл Президентни борчларын кютген Дмитрий Медведевни борчларын къойгъанына бираз тамашалыкъ гьислер булан къарагъанлар да болгъандыр. Тек бираз ойлашып къарагъанда, Медведев бар ишинден азат этилсе де, пачалыкъ ишлерден арек йылышмай. Ол Россияны Президентини аманлыкъгъа къарайгъан заместители болуп белгилене.


Къайсы элни де аманлыгъын сакъламакъ учун этилеген иш – о бек агьамиятлы ва тарыкълы къуллукъ. Балики, оьтесиз чалт айланагъан дюньяда, гьар гюн йимик тувулунагъан агьвалатланы вакътисинде Дмитрий Анатольевич оьзюню сынаву ва бажарывлугъу булан шо къуллукъну мекенли юрютер. Президент де шо ёрукъда тюз ёл тутгъанын гёрсетди деп айтмагъа ярай.


Сонг да, янгы къуллугъу Медведевге оьзю ёлбашчылыкъ этеген «Единая Россия» деген политика партияны ишлери булан да теренден машгъул болмакъ учун онгайлыкъ тувдура.


Къысгъача айтгъанда, Россияны Гьукуматыны Председателини къуллугъуна оьзге адамны гелмеклигини маънасы ёкъ тюгюл. Федерал министрлени гьаракатлары да жанланажакъ, ондан таба регионларда да гьар тармакъда дегенлей айрыча яхшы янына алышынывлар болур деп ойлашабыз.


Озокъда, Россия Федерациясы 1991-нчи йылдан башлап, оьзюню ичиндеги кёп тюрлю четимликлеге ёлугъа туруп, халкъара политика ёлда мекенли абатлар алып юрюмеге болмады. Тек артдагъы вакъти Россия Федерациясы алдагъы къудураты булан къатты абатлар алып алгъа юрюмеге имканлыкълар болдургъаны сююндюре, «Герти насип тапмакъ учун адамны гёрмекли ватаны болмагъа тарыкъ», – деген сёзлер нече де тюз айтылгъанына инандыра.

 

Авторизация
*
*
Регистрация
*
*
*
Согласны с условиями сайта?
Генерация пароля