Милли газет – халкъны элчиси


Оьзюне 101 йыл тамамланагъан, узакъ оьмюр ёлунда бай сынав топлагъан «Ёлдаш» газети республиканы къумукъ тилде чыгъагъан жамият политика газети буса да – миллетни оьтген тарихин ва бугюнгю гьалын суратлайгъан, санлы чыгъагъан биргине-бир миллетни аркъатаяву. Неге тюгюл, къумукъ халкъны элчисидей – ону ругь дюньясын эркин ва бай этеген маълумат къурал. Ону сюйме де, абурлама да тийишлибиз, гьатта тарыкъбыз деп айтса да янгылыш тюгюл.



«Ёлдаш» – юз йылланы узагъында миллетни бары да масъалаларын къуршап, ону тарихи ёлларындан илгьам алып, бугюнюне агьамиятлы тергев берип, тангаласына гьайлы янашып, гьар заманда да оьз халкъы булан янаша юрюген жамият политика газети. Къумукъ халкъны милли газети.



Газетни бетлеринде сиз яшавну бары да тармакъларын къуршап язылагъан маълумат, баянлыкъ материалланы, тематика макъалаланы, репортажланы, лакъырлашывланы, очерклени гёрме боласыз. Гьар номеринде чыгъагъан адабият сагьифада язывчуланы, шаирлени адабият асарлары булан таныш болмагъа имканлыкъ бар. Театр яшавгъа, юртланы тарихине, гьалиги гьалына тергев бериле. Политика ва яшавлукъ, маданият оьсювюню масъалалары, экономика ва экология масъалалары, агьлюню ва савлукъ болдурувну, билим беривню масъалалары, жагьиллени ишлери, дин аралыкълар, спорт яшав – булар бары да газетни гьар чыгъагъан номеринде гётериле ва охувчугъа пикру англатыв булан яшав гьаллагъа, жамият ишлеге ва агьвалатлагъа тюз къарав болдурмагъа кёмек эте.



Газетни бетлериндеги «Яшланы дюньясы», «Жамият ва низам», «Ажайып дюнья», «Ахырынчы сагьифа» – гьариси оьзюню маънасына гёре охувчуну тергевюн тарта. Газетни ичиндеги орус тилде чыгъагъан «Времена» да уллу, «Ёлдашны» тюсюне оьзтёречелик ва янгылыкъ къоша.



Сизин ожакълагъа къонакълай тюгюл, къардашдай, къурдашдай гирип гелме тийишли милли газети булан дос аралыкълар юрютеген адам гьар-бир янындан англавлу ва билимли болажагъына инанма тюше. Яшлагъа школада билим алмаса ярамайгъандай, уллулагъа да ругь азыгъы «Ёлдаш» газети тарыкъ экенине гьар-бир эси бар адам инана, ону ала, охуй.



Озокъда, газетни гьакъында гьар ким оьзюню даражасына гёре тюрлю сёйлер. Ону тиражы кемийгенни себеби газетни ичиндеги материаллар осал экенге яда толу кюйде жамият пик­руну къуршамайгъангъа тюгюл. Халкъны яшаву алышынгъан. Янгыз къумукъларда тюгюл, оьзге миллетлерде де шолай.



Болса да, миллет учун газет тарыкъ экенни англайгъанлар кёп. «Гьар номери гелгинче къарап къаламан», – деп сёйлейгенлер де аз тюгюл. Олар газетни сагъынагъаны, ону булан къурдашлыкъ тутагъаны саялы болма да ярай. Гёрмей турсанг, гьаллашмасанг, къурдаш да арек йылышагъаны белгили.



Миллетини, (оьзюню) тарихин ахтарып да, гьалиги яшавун англап да яшама сюймейген ва билмейген адам нече де ярлы яшайман деп ойлашмайгъаны яман. Акъча байлыкъ да тарыкъдыр, тек ругь байлыкъ –биринчи даражада. Газетни гьар япырагъында шо ругь байлыкъны сезмек учун охувчугъа тарыкълы рызкъы бола.



Бир газет де охувчусуз яшап болмай. «Ёлдашгъа» да язылагъанлар, ёлдашлар тарыкъ. Бугюн язылыв осал экенине ерли жамиятны башын тутгъанлар гюнагьлы деп айтма ярай. Олар оьзлер де газетни алмайдыр. Ала болгъан буса, оьзгелени де язылывгъа къуршар эди.



Буйнакск районда «Ёлдашгъа» шагьарда да, юртларда да аз языла. Почта бёлюкден гелген маълуматлагъа гёре язылыв гетген йылны биринчи яртысында да, экинчи яртысында да макътардай тюгюл эди. Йылны биринчи яртысында Тёбен Къазанышдан язылгъанланы санаву 100-ге ювукъ болса да, экинчи яртысында кемиди. Шонча уллу юртдан 28 адам тюгюл язылмады. Юртда буса орта билим береген 5 школа бар.



Йылны экинчи яртысында газетге язылгъанланы санаву: Оьр Къазанышда – 23, Тёбен Жюнгютейде – 124, Янгыкъумукъда – 12, Эрпелиде – 37, Халимбекавулда – 20 (йылны биринчи яртысында 50 болгъан), Атланавулда – 1 адам. Йырчы Къазакъны юртунда къумукъ тилде охума сюегенлер бирев тюгюл ёкъ экени миллет учун да азманлыкъ гелтире деп эсиме геле. Буйнакск шагьарда да 8 адам язылгъан. Шо да район центрына, Дагъыстанны бырынгъы тахшагьарына къыйышагъан иш тюгюл.



Озокъда, санавлагъа тергев берсенг, ойлашма зат бар. Халкъны газети. Къумукъ жамиятны тутдурукълу маълумат къуралы, гьарибизге ортакъ иш. Язылывдан баш къачырма ошамай. Сав йылгъа языла буса да, багьасы гёзге гёрюнмесдей аз. Газетни гьар номери нечик чыгъагъанны билеген адам шо харж бек учуз экенине инана. Алма башласагъыз, сиз де инанажакъсыз.



Авторизация
*
*
Регистрация
*
*
*
Согласны с условиями сайта?
Генерация пароля