Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности "Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИВнимание! Конкурсы!Наши партнерыНаши спонсорыСотрудникиАвторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)

Гетген йылдан къолай болажакъгъа умут бар

Гетген йылдан къолай болажакъгъа умут бар


Мени улланам Галия, гюнагьларындан Аллагь гечгир, оьзю татар миллетли болса да, къумукъ тилде чыгъагъан газетлени ва журналланы оьтесиз кёп сюе эди. Шолагъа язылыв болжал етишгенде, ол къолума таман чакъы харж да берип, мени почгъа йиберегени эсимде къалгъан. Анайым шолай гьайын этегенге гёре, район газетден башлап, республика оьлчевде къумукъча чыгъагъан «Ленин ёлу» да, «Адабият Дагъыстан» да, «Дагъыстанлы къатын» да, «Къарчыгъа» да бизин уьйде мен билегенли, гьар заманда да болгъан.


Почтальон къатын газетлени ва журналланы бизге етишдиргенде, тахтамекде де олтуруп, гьасирет кюйде оьзю шоланы барысын да бир ягъа­дан башындан ахырына чыкъгъынчагъа охуп, гёзден гечирип дегенлей битген сонг ол: «Ал, балам, сен де оху!» – деп магъа газетлени ва журналланы узатагъаны шу калималаны язагъанда да гёз алдыма гелип токътай. Газетлени, журналланы бетлеринде язылып чыкъгъан макъалаланы, машгьур шаирлени ва язывчуланы асарларын ол охумагъа таклиф этегени буса, къумукъ тилге бакъгъан якъдагъы сюювню учгъунларын юрегимде якъмагъа болгъан бир аламатдай анайым магъа яшда берген башлапгъы «дарслар» экенин гьали арадан кёп йыллар оьтгенде яхшы англайман.


«Ёлдашгъа» язылывгъа байлавлу сёзюмню шулай узакъдан башла­гъанымны сен, охувчум, гечип къой. Оьзюм тувуп оьсген агьлюде къумукъ газетлени ва журналланы тезден берли де охуп гелгенимни эсгерип, инг алда гьар ожакъда шолагъа лайыкълы янашыв болса, бизге, редакцияны къуллукъчуларына, болжал етишгенде юртлагъа, балики, къайтып-къайтып барып, чакъырывлар этип айланмагъа тюшмес эди деп айтмагъа сюемен.


Тек бизге газетге язылывгъа байлавлу тувулунгъан гьал булан бирдокъда рази болуп къалмагъа ярамай. Шону булан бирге бизин, оьзлер газетни гёзю булан да гёрмейген, охумайгъан бир тайпалар: «Не бар шо сизин газетде охумагъа… Гьар заман да гьакимлеге ярап язасыз »,– деп, язылывдан баш къачырагъанланы янашыву да тамашагъа къалдыра. Бир де арасын бёлмейген кюйде газетни алагъанлар буса, газетни къуллукъчулары юртланы ва юртлуланы масъалаларыны терененине тюшюнюп, шоланы ахтарып макъалалар язмагъа къаст этегенин гьис этмей тюгюл. Охувчуланы тергевюн тартагъан танкъыт материаллар да газетни бетлеринде чакъда бир оьзлеге ер таба. Сонг да, къумукъланы тарихи, олай да халкъны маданият, инчесаният, адабият тармакъларда оьсюв ёлу гьакъда бир маълумат къуралда да айтылмайгъан кюйде берилегенин де, башгъа харлысыз бир газет де шо къуллукъну кютмеге болмайгъанын гёзден салмагъа ярамай.


Бизин газетге язылагъанланы аслам пайы юртлу муаллимлер экенин гёз алгъа тутуп, билим берив тармакъгъа да тергев бериле. Торайып гелеген яш наслуну иштагьландырмакъ муратда яшёрюмлени гьаракаты, бизин спортчуланы уьстюнлюклери гьакъда да айтыла. Оьзге яшавлукъ масъалалар да тергевсюз къалмай.


Озокъда, шу ерде газет къумукъ халкъныки болса да, шону бизин республиканы гьакимлик къурумлары кюрчюлендиргенин де унутмагъа бажарылмай. Тек оьзге милли газетлер булан тенглешдиргенде, бизин «Ёлдаш» жамият арада пикру яратывда, маълумат яйывда юрютеген мекенли ишин бирев де инкар этмеге болмай.


Тек, шогъар да къарамайлы, мени анадаш Къарабудагъгент районумну юртларында нечакъы къаст этсек де, бу йылны экинчи яртысында бизин газетге язылагъанланы санаву 500-ге де етишмеди. Мисал учун айтгъанда, «Ёлдашгъа» 341 адам тюгюл язылмагъан эди. Къайсы юртда нече газетге язылгъанын эсгерсем, Къарабудагъгентде –110, Дёргелиде – 46, Паравулда – 94, Гьелиде – 50, Аданакъда – 19, Манасда –4, Манасгентде –18.


Шону гьисапгъа алгъанда, язылывгъа байлавлу гьакимлик къурумланы жаваплы къуллукъчулары булан байлавлукъ тутуп иш гёрмек буса айрыча агьамиятлы болуп токътай. Бугюнлерде, язылывну алдында, мен Къарабудагъгент районну юртларында кёп боламан. Эсгерилген районну гьакимбашы Магьмут Амиралиев, ону биринчи заместители Агьмат Гьажиев, районну билим берив управлениесини начальниги Тажли Хизриева, район китапхананы директору Аминат Сотаева, олай да айры-айры юртбашчылары, охув ожакъланы, идараланы ёлбашчылары булан да ёлукъдум. Шо ёлугъувланы барышында районну ёлбашчылары «Ёлдаш» газетге язылывну агьамиятлыгъын англайгъаны ва шону къурумлу кюйде оьтгеривде болушлукъ этмеге гьазир экени белгили болду. Сонг да, оьрде оьзюню аты эсгерилген Агьмат Гьажиевни гьаракаты булан гьар юртгъа гёз алгъа тутулуп, бизин газетге язылмагъа тюшегенлени санаву токъташдырылды.


Ачыкълашдырып айтгъанда, эсгерилген районну гьакимлери мен айтгъан 800-ню ерине, «Ёлдашгъа» язылгъанланы санаву 940-дан кем болмажакъгъа инандыргъан. Эсгерилген муниципал къурулувуну администрациясыны яшавлукъ масъалалагъа къарайгъан управлениесини ёлбашчысы Гюлжанат Темировагъа шо районну юртларында бизин газетге язылывну яшавгъа чыгъывуну барышына тергев этип турмагъа тапшурулгъан. Шолайлыкъда, Къарабудагъгент районда бизин газетни алып охуйгъанланы санаву гетген йылдан къолай болажакъгъа умут бар. Бизге буса гележекде де халкъыбызны пайдасына гьаракат этмек къала.



Количество показов: 322
Автор: YOLDASH.news
09.11.2018 12:00
Подписывайтесь на канал yoldash.ru в

Возврат к списку


Добавить комментарий









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта