Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности Нацпроекты в РДПамятные датыТеатры и кино"Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИ БАННЕРЫ Наши партнерыНаши спонсорыСотрудникиАвторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)

Терс ёлланы  танглайлар

Терс ёлланы танглайлар



Бир жума алъякъда Магьачкъаланы администрациясы ерли жамиятны гезикли «сююнчлю» хабар булан «хошландырды». Тахшагьарны гьакимияты бир вакътини ичинде (администрацияны сайтында ерлешдирилген билдиривге инанса) 100 орамны атын ва 1800 уьйню номерин алышдыргъан.


Не орамлар экен деп ахтарма урунгъанда, гьеч маълумат табылмады. Администрацияны шо масъалагъа жавап береген архитектура управлениесинде де, нечакъы зенг этсенг де, бирев де телефонну гётермей. Эшиклери де даим ичинден ябылып бола. Къагъа турсанг да пайда ёкъ.


Магьачкъалалылар, шагьар администрацияны сиптечилиги булан арагъа чыгъагъан гьар -бир янгы билдирив, гьаракат оьзлеге аваралар къошса тюгюл, яшавун къолайлашдырмажагъына уьйренчикли де болуп битген. Буса да гьалиги Интернетни имканлыкъларындан пайдаланып, гьакимлеге разисизлигин етишдирмеге къарай. Бу гезик де фейсбукларда, инстаграмларда къувун гётерилгенде, архитектура управлениени башчысыны заместители Т.Галбацов администрацияны сайтында алгъасавлу кюйде англатывлар бермеге къарагъан. Сайки, орамланы атлары гьали алышынмагъан, шо алдагъы гьакимлени иши. Олар 2016-нчы йылдан тутуп, демек, уьч йылны узагъында болгъан алышынывланы гьакъында халкъгъа билдирмей тургъан. Тюзюн айтгъанда, Галбацовну сёзлери менде уллу шекликлени тувдура.


Гертиден де, алдагъы заманларда Магьачкъаладагъы орамланы атларын алышдырыв булан байлавлу башдан-баракълыкъ ва пакарсызлыкъ хыйлыланы ичинбушдура эди. Мисал учун, бир орамны уьчге бёлюп, башгъа-башгъа адамланы атлары къоюла эди. Къайда къайсы башланагъанын ва битегенин бирев де англап болмай эди. Яда бир орамны онг яны Энгельса, сол яны – Хизроева. Ат къойма тийишлилер де терс ёллар булан танглана эди. Гьатта буссагьат яшап, гененип турагъанлар да «гьаракат» этип, орамлагъа оьзлени атларын къойдурта эди (белгили йырав Т.Курачевни орамы). Бирдагъы бир затгъа айрыча тергев берилген эди. Бир минге ювукъ орамдан янгыз 25-не къумукъ миллетни вакиллерини атлары къоюлгъан эди.


Шо гьакъда газетибизни бетлеринде бир нече керен язылып да чыкъды, «дёгерек столлар» да оьтгерилди. Шоларда аян этилген маълуматлагъа шагьар администрацияда гьеч сесленгени болмады. Ахыр да шо масъала Халкъ Жыйынны сессиясында гётелирди. Ерли парламент 2017-нчи йылны ноябр айында къабул этген законгъа гёре, энниден сонг орамланы атын алышдырма янгыз республиканы башчысыны янында къурулгъан комиссияны ихтияры бар. Ондан къайры, аты алышдырылгъанча, алимлени пикрусун билме герек ва ерли жамиятны разилиги болма тарыкъ. Мен билсем, шагьар администрация шоланы бирисин де кютмеген. Алдагъы кемчиликлени тюзлейбиз деп, къайтып терс ёлланы танглайлар.


Орамны атын алышдырыв кёп харжны талап эте. Уьстевюне, от сёндюрювчюлени, «скорый помощну», таксистлени ва оьзге къуллукъланы вакиллерини ишинде четимликлер тувдура. Ватандашлагъа документлерин алышдыра туруп, нечакъы инжинме тюшежегин айтма да айтмайман.


Озокъда, заманны барышын токътатма бажарылмайгъанын къайсыбыз да яхшы англайбыз. Сюйсек де, сюймесек де арабыздан эревюллюлерибиз гете. Оланы атларын даимлешдирмекни масъаласы арагъа чыгъа. Уллу жаваплыкъны, адилликни талап этеген инче масъала. Орамланы янгы атларын билме айланагъанда, Редукторный посёлокдагъы бир гиччирек тыгъырыкъ орамгъа Россияны Игити Тулпар Мусалаевни аты къоюлгъан деп эшитгенде, бек къазапландым. Къарагъанда Игитге дагъы орамны тапмагъангъа ошай?!


Бугюн болмаса, тангала биз шо 100 орамны янгы атларын билмей къоймасбыз ва шо гьакъда охувчуларыбызгъа да газетни гелеген номерлеринде билдирербиз.  



Количество показов: 98
Автор: YOLDASH.news
30.08.2019 14:55
Подписывайтесь на канал yoldash.ru в

Возврат к списку


Добавить комментарий









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта