Абдулла Бугленли

   

Пятница, 20.04.2018г. — «ЁЛДАШ».


Бу гезик бизин сагьифада берилеген белгили шаир Абдулла Залимхановну янгы шиъруларыны ва ол яратгъан хабарны чеберлиги гьар заманда йимик охувчулагъа таъсир этежегине инанабыз.

Адабият бёлюк.


 

«Тангалабызны тангы, вай, къачан къатар экен?»


 


Биздеги бырыкъланы


Айта барсам бирерлеп,


Артда токътама тюшер


Арып я бишип, терлеп.


 


Гертиден, терсликлени


Биринден- бири бетер.


Къурум якъдан ёкъ пакар,


Элибиз уллу петер.

 



Гьаллы, баллы гьакимлер


Законну оьзлер буза.


Сонг тюпдеги «гьар кимлер»


Къалгъан ерлерин тоза.


 


Гьарам, гьалал деп айтмай


Не зат тюшсе де талай.


Уьюне гьеч бош къайтмай,


Халкъны хазнасын тонай.


 


Биринден-бири тизив


Ясала кёп къалалар.


Гёре -багъа гюнагьсыз


Языкъ тюпде къалгъанлар.


Бу гьакъда жагьиллени


Яман бузула гёнгю.


Гьукмударлар бетине


Къаплагъан къалын гённю;


 


Бармакъ арадан къарай


Элдеги гьаракатгъа,


«Заманлар гюнагьлы, – дей, –


Болуп турагъан затгъа».


 


Яман тюгюл заманлар,


Оьзюгюз дюрсюз Делбе:


Демликни дагъытдыгъыз,


Бир гьал салдыгъыз элге!


 


Улав къалгъан заводлар,


Ташлангъан кёп сабанлыкъ.


Яш наслу ишден магьрюм,


Артгъан элде яманлыкъ.


 


Гьайын этегенлер аз


Тарлавлар булан бавну.


Телевизордан къуру


Гёрсете бандит давну.


Гёрсете бир ярлыкъсыз


Ялангъач йыравланы.


Уллу сагъынып турмай


Халкъ шолай йыбавланы.


 


Халкъда аварасы ёкъ


Депутат булан байны.


Илбислик булан акъча


«Игит» эте кукайны.


 


Урушбат тамакъланы


Нечесин «алим» этген,


Къылыгъы зайыпланы


«Уьлгюлю», «за-алим» этген.


 


Билим, тарбия берив


Ишлер де акъсай, харап.


Бузулгъан жагьиллер кёп,


Баврунг ярыла къарап.


 


Сай болгъан сайлавлар да,


Къади якълай «барлыны»,


Алгъышын огъар охуй,


Ягъы тюгюл ярлыны.


 


Къоба башынга балагь,


Тийсенг барны «хыртына»,


Не яхшы, бийиген сонг


Молла байны шыртына….


 


Талайгъанлар тоюнмай,


Дагъы да кёпню сюе…


Харлы- зарлы балалар


Ёл алып болмай гюе.


 


Бар буса да гьакъылы,


Ёкъ олагъа шайлы иш.


«Кёрпели» пышдырыкъ кёп,


Гьай аман, къысыла тиш!


Халкъгъа онча хайыр ёкъ


Оьрден чыкъгъан буйрукъдан.


Идараны ичлери


Толгъан «шыбыш-къуйрукъдан».


 


Башчылар арив сёйлеп,


Алдата оюбузну,


Къызыл йымырткъалардан


Толтура къойнубузну.


 


Бары затны оьлчевю


Болуп токътагъан акъча.


Онгсузлукълар оьр бола,


Ялгъан гертини янча.


 


Не де геле къолундан


Яшавну «утгъанланы»,


Тюпден таба тайдыра


Тюз ёлну тутгъанланы.


 


Туснакъ табиатлылар


Гьали олтургъан тёрде.


Оланы алимлерден


«Абуру» хыйлы оьрде.


 


Бизде бар буссагьат да


Газ якъмайгъан авуллар –


Гьакимлени сакълагъан


Савутлу къаравуллар.

 

 


Айыбы ёкъ адамгъа


Гьажатмы «сакълавчулар»?


Магьрюм халкъгъа етишмей


Янчылар, якълавчулар.


 


Бар зат чюйре айлангъан,


Арзгъа кимге барарсан?!


Артда сагъа хапарсыз


Болагъангъа къарарсан.


 


Ярахсыз гьалгъа тюшген


Яшавну гьар тармагъы.


Пакъырлагъа илине


«Законланы» къармагъы.


 


Яртылыкъ булан ялгъан,


Халияр булан халта!


Уручу кёп уьлкедеги


Халкъымны башы къапда.


 


Гьарам яшама сюймей,


Тюшме сюймей нокътагъа,


Хыйлы герти эр артда


Аврув табып токътагъан…


 


Къазакъ да айтгъан йимик


Гьали де языкъ къара халкъ;


Билинмей, аста булан


Къулгъа дёне бара халкъ.


 


Тынып турма да кюй ёкъ


Ичинде дертни сакълап,


Ягьы бар язывчулар


Гелген тюзлюкню якълап…


 


Арыгъан Арасейде


Бир зат да тюгюл мекен.


Тангалабызны тангы,


Вай, къачан къатар экен?


 


Онгай тапгъан яш-уллу


Ташалап гете тышгъа.


Ахырыбыз не болур?


Адаршай бу барышгъа!


 


Барабыз дагъылывгъа,


Къопмаса яхшы балагь.


Шундан бетерлеринден


Сакъла бизин, сен Аллагь!


 


Девюрлер булай къалмас,


Тюзленер, гьай, «палыбыз», –


Ятлар гюллердей болур,


Балким, артда гьалыбыз…



Авторизация
*
*
Регистрация
*
*
*
Согласны с условиями сайта?
Генерация пароля