Сетевое издание «ЁЛДАШ» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности Нацпроекты в РДПамятные датыТеатры и кино"Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИ БАННЕРЫ Наши партнерыНаши спонсорыСотрудникиАвторыАфишаГалереяРекламаЮбилейный номер
Сетевое издание «Ёлдаш» (Спутник)

Исламутдин КЪУРБАНОВ: Сююв гелген ажайып

Исламутдин КЪУРБАНОВ: Сююв гелген ажайып



Къакъашуралы Исламутдин Къурбанов узакъ йылланы боюнда ата юртундагъы мактапда охувчуланы охутув-тарбиялав булан машгъул болгъан, Дагъыстанны ат къазангъан муаллими деген атны алгъан.


Муаллимлик касбуну юрюте туруп, ол поэзиягъа да гьашыкъ болгъан. «Яхшылыкъгъа алгъаса», «Талайлы талигьим» деген эки шиъру китапны автору. Ону янгы шиъруларын гьали охувчуланы тергевюне беребиз.


 

Адабият бёлюк.


 Аччы да бар, татли де...


 

Аччы да бар, татли де бар,

Ялгъан да бар, герти де бар.

Дюньялыкъда инсанланы

Сююнч булан дерти де бар.

 

Гьукму сюрмей парахатлыкъ

Пачаланы яманындан.

Къара халкъгъа ёкъ рагьатлыкъ,

Насип де ёкъ яшав яндан.

 

Гючю етген гючсюзлени

Къыйыкъсыта, янча, таптай.

Давну къара балагьындан,

Къача халкълар яллыкъ тапмай.

 

Пачалыкъны ихтияры

Къолундагъы шо пачалар

Эришивлер, дослукъ ёлдан,

Ярашывлукъдан къачалар.

 

Языкъсынмай инсанланы

Маканларын, мал-матагьын.

Эшитмейлер зулмудагъы

Языкъ халкъны зарын-агьын.

 

Дав оьртенде ерлер яллай,

Кёкден агъу янгур ява.

Унутмагъыз тарыкълыгъын,

Яшав учун таза гьава.


 

Сююв гелген ажайып

(Жагьил яшны гёнгюревю)


 

Гьислериме эсирип,

Юрегим кюр, шашыкъман.

Яшыргъандан не геле –

Бир къызгъа бек гьашыкъман.

 

Тюрлю-тюрлю гёрюне,

Юхум нече бёлюне.

Лабар салгъан гьашыкълыкъ

Юрегимни тёрюне.

 

Дармандай яллыкъ бере

Эртенги гьава, шыплыкъ.

Гёнгюме нюр шавладай

Янып гирген гьашыкълыкъ.

 

Бийик кёкде турнадай

Бал гьашыкълыкъ сес бере.

Сагьат сайын юрегим

Гюл юзлюню эсгере.

 

Башым манг, айланаман,

Болгъан йимик дувана.

Гёрюнюп къалса гёзел,

Юрек эпсиз къувана.

 

Мени кююмню гёрюп,

Бирлер этедир айып.

Кимлер не сёйлесе де,

Сююв гелген ажайып.


 

Ананы тилевю


 

Толгъан айдан арив ана

Насиплимен деп къувана.

Уланындан сююнмекден

Юрегинде нюрлер яна.

 

Уланына он етти йыл

Болгъанда ана бирден,

Авруп къала, гелген йимик

Сыйлы салам Тенгиринден.

 

Алты саны аста-аста

Тас этмеге башлай гючюн.

Энни огъар кёмек тарыкъ

Аякъ уьстге турмакъ учун.

 

Асхартаву – эри де ёкъ

Кёмеклешме анагъа.

Анасыны агьы-зары

Тюше янгыз балагъа.

 

Алып геле ол докторну

Анасына къарама.

Ана сорай: «Не аврувдур

Гелген бу къаркъарама?»

 

Доктор тергей, шекли бола,

Айтма сюймей мекенин,

Насипсизге къабунгъанны

Эмсиз аврув экенин.

 

Ана гьалек, къаравуллай

Бир тюз жавап доктордан.

Доктор ойлай бу аврувну

Ана къайда юкъдургъан?

 

Эмсиз аврув гьакъда доктор

Уланына аян эте.

Сонг анагъа: «Мен дагъы да

Гелермен», – деп чыгъып гете.

 

...Таблеткалар иче ана

Гёрсетген деп доктор къатын.

Тек асув ёкъ олардан да,

Авруй, болмай рагьат ятып.

 

Къоллар, бутлар гьалсыз, кютмей

Оьз борчларын. Гьар гюн сайын

Аза ана, кемий бара

Дюньялыкъда яшав пайы.

 

Айтгъан башгъа докторлар да

Умут ёкъ деп, болардай сав.

Ана буса умут уьзмей,

Хадиргюнлеге алгъасав.

 

Гьалал къуллукъ эте улан,

Жувундура, аш ашата.

Яшы кёмеклешип, ана

Олтура, тура ва ята.

 

Тербенмейген болуп бара

Азгъан санлар, болгъан гёммек.

Амма ана ялсыз гёзлей

Аллагьдан бир рагьму, кёмек.

 

Гёзлеринде гьасиретлик,

Къарагюнден къачма сюе.

Тек аврув оьз ишин эте

Савлукъ аста сёне, гюе.

 

Ана пашман, булут йимик

Мунг ойлардан тола башы.

Бир гюн айта уланына:

«Тынгла магъа, азиз яшым.

 

Инамлыкъ ёкъ сав къаларгъа

Азап чеге лап талгъанман.

Хыйлы заман, балам, яшым,

Сагъа юк болуп къалгъанман.

 

Чакъыргъанынгны сюемен

Докторланы яныма.

Юрегимни токътатсынлар,

Рагьат этип жаныма».

 

– Анам, недир сен сёйлейген

Жан еримни титиретип?

Талмагъанман, не талмасман

Бирде сагъа къуллукъ этип.

 

Къазгъанча сагъа къабур,

Жан сав чакъы къадаларман.

Гьасси болма, вёре, сабур,

Юхусуз, ялсыз къарарман.

 

Барын англап уланыны

Юрегинде намус-ягьы,

Азиз ана: «Минг макътавлар!

Деп эсгерди Аллагьын...»



Количество показов: 170
Автор: YOLDASH.news
23.08.2019 19:00
Подписывайтесь на канал yoldash.ru в

Возврат к списку


Добавить комментарий

AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта