Халимбекавул


(Буйнакск район) 


          Яшайгъан адамланы санаву – 7 мингге ювукъ. Бу ерде юрт тувулунгъанны себеби, халкъ арада айтылагъан кюйде, 1832-нчи йылда Темирхан-Шурада ерлешген орус асгер бёлюгю бекликлер къурма башлагъан. Шо вакъти бир нече уьягьлю бу ерде ожакълар къуруп, биналар тигип яшама токъташа. Шавхал да олагъа ихтияр бере. Уллусуну аты Халимбек болгъаны саялы, юртну аты да «Халимбекавул» болуп токъташгъан деп айтыла.



Юрт башлангъан кюйге гёре бирдагъы айтылагъан хабар бар. О да булай. Капиркъумукъда бийик ярны уьстюнде къала къуруп яшайгъан Абдулмуслим шавхал юртдагъы бир оьзден сабанчыны оьзюню янына чакъырып, булай деген: «Гёремисен шо авлакъ бойну? Шонда чыгъып уьй- эшик къуруп яша. Мен къаладан къарап, гёрюп туражакъман, ишлеринг онгай тюшсе, оьзгелени де сени янынга йибережекмен», – деген. Шо адамны аты Халимбек болгъан дей. Ким биле, шавхал Капиркъумукъну къырыйында бирдагъы бир къумукъ юрт болгъанны сюйгендир…


Бу юртда 1927-нчи йылда биринчилей школа ачылгъан. Директору этилип Исламутдин Абакаров белгиленген. Инг башлап юртда учитель касбуну юрютген адамлар Жалав Абакаров, Зулжамал Абакарова, Буйнакск шагьардан гелеген Умсалимат, бугленли Алхан-къади ва башгъалары, совет девюрню талапларына гёре, яшлагъа билим булан бирче тарбия берив булан да машгъул болгъан.


Халимбекавулда колхоз 1929-нчу йылда къурулгъан. Ону председатели Амурхан Агьматов, членлери Аминат Къазаватова, анасы ва башгъалар да о янгы коллектив къурулушну абурун гётермеге ва огъар халкъ къуршалсын учун гьаракат этип чалышгъан. Аминат Къазаватова о йылларда яшёрюмлени комсомол къурумуна биринчиси болуп къошулгъан, юртда «изба-читальня» деп айтагъан китапхананы ачгъан, давдан сонггъу йылларда юрт советни председатели, юрт советни депутаты болуп хыйлы йыллар ишлеген. Ол 1933-нчю йылда яшлар бавун къурмакъ учун да умпагьатлы гьаракат юрютген.


И.В.Сталинни атындагъы колхоз 1961-нчи йыл «Халимбекаульский» деп совхозгъа айлангъан ва сонггъу йылларда бавчулукъ, бахчалыкъ тармакъларда гёрмекли уьстюнлюклеге етишген. Ерли баълиден этилген консервалар ВДНХ-да, Парижде оьтгерилген выставкаларда дипломлагъа ес болгъан .


Ватандаш давну ортакъчысы, дав-ден­гиз авиацияны полковниги Биякъай Нажубаев давдан сонггъу йылларда да Совет Армияны уллу къуллукъларында ишлеген, Ленинни ордени бу­лан савгъатлангъан. Шапи Мурзаев Къызыл Армияны полковниги, атлы дивизияны командири болгъан, Уллу Ватан давну да ортакъчысы, Ленинни ордени булан савгъатлангъан.


Халимбекавулдан давгъа гетгенлер 300 адамдан артыкъ болгъан. Оланы яртысындан да кёбю давдан къайтмагъан. Юртда оланы эсделигине са­лынгъан мукъаятлы онгарылгъан эс­делик де бар.


Уллу Ватан давдан сонггъу йылларда, халимбекавуллуланы арасында районда, республикада, ондан тышда да уллу къуллукълардагъы ишлери булан ватандашлыкъ ругьу, къоччакълыгъы булан яратывчулукъ пагьмусу яда спорт гьаракаты булан да ата юртуну абурун гётергенлер кёп. Оланы бирлерини атларын эсгерме сюебиз.


Расул Алиев – техника илмуланы доктору, «Дагбургеотермия» бирлешивню генеральный директору болуп ишлеген; Папу Алиева – медицина илмуланы доктору, Дагъыстан медицина академияда кафедраны заведующийи; Магьаммат Алиев – СССР-ни ат къазангъан напчысы; Абакар Алиев – Россия Федерациясыны ат къазангъан учители; Шарабутдин Магьамматов – Хасавюрт «Леспромхоз» идараны директору, КПСС-ни Хасавюрт шагьар комитетини 2-нчи секретары, шагьар исполкомну председатели; Герей Дал­гьатов – педагогика институтда кафедраны заведующийи, уланы Халил – учителлени билимин артдыра- гъан институтну проректору, Мурат Абакаров – ДГУ-ну профессору, кафедраны заведующийи болуп ишлеген. Абдулла Магьамматов – Буйнакск район судну председатели, юридичес­кий илмуланы кандидаты.


Дагъыстан Республиканы ат къа­зангъан артистлери Юсуп Муратбеков да, Нажмутдин Макъсутов да халимбекавуллулар эди. Экиси де кёп йыллар Къумукъ театрны сагьнасында оьзлени пагьмуларын гёрсетди. Олар къумукъ халкъ айрыча кёп сюеген артистлерден бирлери экенге бирев де шеклик этмей.


           

Авторизация
*
*
Регистрация
*
*
*
Согласны с условиями сайта?
Генерация пароля