Магьаммат Къандавуров дав башлангъынча алда асгер борчун кютмек учун армиягъа чакъырылгъан болгъан. 1940-нчы йылда ол Харьковдагъы оьр авиация училищени битдирген. Сталинни уланы булан бирче охугъан.
Дав башлангъан йыл фронтда Къандавуров авиаполкда къуллукъ этме башлай. Тек бир гезик гьавадагъы учувун давам этип къайтагъанда оланы самолёту къалын тумангъа къаршы бола. Экипаж къонма болмай. Самолёт ерге тийип атыла.
1942-нчи йыл лётчикни атасы Солтанагьмат уланы оьлгенин англатагъан кагъыз ала.
«Магьаммат лётчик экенине биз юртлу яшлар бек оьктем бола эдик, –деп язгъан, ону эсге ала туруп, Хасавюрт шагьарны «Дружба» газетинде юртлусу, загьматны ветераны А.Бачиев. – Ол лётчик гийими булан юртгъа отпускагъа гелгенде, сукъланып арты булан юрюй эдик. Гьавадан самолёт учуп бара буса да: «Гьона Маматны самолёту», – деп кёкге къарай эдик. Яшланы илиякълы, уллулагъа гьюрмет булан янашагъаны жагьил лётчикни бирден-бир гёнгюллю эте эди. Оьмюрю шолай къысгъа болагъанны билмедик».
Озокъда, давгъа гетип, биринчи гюнлеринден тутуп тас болуп къалгъанлар да кёп болгъан. Тек Дагъыстанда онча да яйылмагъан лётчик касбугъа ес болгъан Магьамматны дав башланып, бир нече гьюнер де гёрсетмейли гетгенине юртлулары да къыйналмай къалмагъандыр. Ону аты бугюнлерде де унутулмай, жагьиллеге де уьлгю болардай эсгерилип, наслудан-наслугъа айтыла геле.
