Ерли амбулаторияда 3 врач ишлей. Оланы экевю «Земский доктор» деген аслу проектни имканлыкъларындан пайдаланып гелгенлер. Стоматолог Темерлан Къурбанов Новолак юртдан гелип, 2019-нчу йылдан берли ишлей. Терапевт Анзор Астамиров да иш башлагъанлы кёп болмай. Бир миллион манат акъчасын гьали де алып битмеген.
Поликлиниканы заведующийи Саният Къайырбекова хабарлайгъан кюйде, юртдагъы савлукъ сакълав идара амбулатория гьисапда 2003-нчю йылдан берли иш юрюте. Алда ол фельдшер-акушер пункт болгъан.
Амбулаторияда докторлардан къайры, 3 медсестра да ишлей. Паху Бектемирова яшлагъа къарай, Басира Чапаева – акушер, Зара Амчагъаева терапевт къуллукъну кюте.
Юртну амбулаториясында, озокъда, аслу иш диспансеризация къуллукъ деп айтса да ярай. Гелген адамны да савлугъун тергеген сонг, тийишли болса, Хасавюрт больницагъа йиберелер.
Юртда яшайгъанланы уьч пай этип эки пайы – яшлар. Амбулаторияда оланы савлукъларын беклешдирив ишлеге де яхшы тергев бериле. Саният Къайырбекова оьзю де – врач-педиатр.
Къандавуравулдагъы врач-амбулаториягъа айда 400-ге ювукъ адам геле. Оланы барысына да амбулатория оьлчевде бажарылагъан биринчи медицина къуллукъ этиле. Гьазир тарыкъ болар чакъы дарманлар бар. Медицина ясандырывлар да талаплагъа гёре къоллана.
