Къаягент бойда ерлешген Гьюсемегент олай уллу юрт болмаса да, тек ону тарихи бай ва теренде. Шо гьакъда тарихден гьалиге ерли бизге етишген маълуматлар да къаршылаша.
Алдан берли де адатлангъан кюйде, гьюсемегентлилер мердешли юзюмчюлюк ва бавчулукъ тармакълагъа айрыча гьюрмет этип гелген. Шо да олагъа оьз мадарын этмеге имканлыкъ берген десек, янгылыш болмасбыз. Дагъысын айтмагъанда, мунда бизин сёзлерибизни юртну гьалиги заманда оьмюрге гёре лап да уллу тамазасы Къурбан Магьамматрасулов береген баянлыкъ да таманлыкъ этедир деп эсиме геле.
Юртда бирев-биревню танымайгъанлар нагагь да ёлукъмас, къыз берип, къыз алып дегенлей, бири-бири булан къатнамагъан агьлюлер де аз болур. Шолайлыкъда, йылдан-йылгъа гьюсемегентлилени санаву къолайлаша гелегени де сююндюре. Неге десегиз, янгы ожакъларда гьайлек йырлар айтыла, торайлар оьсе.
Гьюсемегентлилер гиччилени аяйгъанда йимик, уллуларына да айрыча гьюрмет эте. Ери гелген сонг эсгерип къояйыкъ, оьмюрю 90 йылдан айлангъан Къурбан агъав да оланы арасында айрыча абур таба. Шо да негьакъ тюгюл. Гентде Къурбан, Магьаммат, Ибрагьим, Исмайыл, Зайнап, Патимат, Абидат деген атлар кёп къаршылаша. О саялы да оланы бири-биринден айырылып танылсын учун, къошум атлар тагъыла. Къурбан агъавгъа да юртлулары «Бригадир Къурбан» деп ат къойгъан. Неге десегиз, гьюрметли тамаза оьзюню 50 йылдан да артыкъ оьмюрюн ерли юрт хозяйство предприятиени оьсюмлюкчюлюк тармагъында ашлыкълар, емишлер, юзюм оьсдюрювде бригадир болуп ишледи. Шо вакътини ичинде «Дагъыстанны ат къазангъан авлакъчысы» деген атгъа ва шолай да «Гьюрметлев белгиси» деген загьмат орденге лайыкълы болду.
Къурбан агъавну ва Равгьаният баживню уллу сыкълашгъан агьлюсюнде 4 улан ва 3 къызъяш тувгъан ва тарбиялангъан. Яшларыны яшлары ва оланы торайлары уьлгюлю уллатаны васиятына аминликде яшайлар.
Къурбан агъав гьали де, эсли чагъына да къарамайлы, юртну жамиятындан айырылмай оьмюр сюре, шатлыкъ ва къайгъылы гюнлерине етишмеге алгъасай.
– Къурбан агъав – сабур, уллугъа да, гиччиге де исси кюйде янашагъан гьюрметге лайыкълы тамазабыз, – деп хабарлай адамланы социал-яшавлукъ талапларын кютеген райондагъы центрында 25 йыллар ишлеген къуллукъчусу Эминат Гьасанова. – Ол мени атамны зукъариси бола деп айтагъаным тюгюл, мен авруп азарханагъа тюшгенде иш этип гёрмеге гелегени саялы, тюзю, уялмагъа да тюшдю. Огъар шолай рагьмулу хасияты булан юртлуларыны арасында къалгъан оьмюрюн де оьтгермеге Яратгъаным савлукъ берсин.
Шу ерде сёзню кёп узун этмейим, сёзню къысгъасы, аркъанны узуну яхшы бола. О саялы Эминатны ёравларына къошулмакъ магъа да парз. Неге десегиз, Къурбан агъавну яхшылыгъын яшдан тутуп, жаны женнетде болгъур,анам Батув ону бригадасында ишлейген вакътилерде магъа да ачыкъдан гёрмеге тюшдю.
