Сетевое издание «ЁЛДАШ» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности Нацпроекты в РДПамятные датыТеатры и кино"Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИ БАННЕРЫ Наши партнерыНаши спонсорыСотрудникиАвторыАфишаГалереяРекламаЮбилейный номер
Сетевое издание «Ёлдаш» (Спутник)

БИР ГЮНДЕ – УЬЧ БАЙРАМ

БИР ГЮНДЕ – УЬЧ БАЙРАМ



Хасавюрт районну уьч де юртунда адамлагъа ял алмакъ

учун парклар ачылагъанына байлавлу шатлыкъ агьвалатлар болду

 

ЯХСАЙ


Сагьат онлагъа таба яхсайлылар Уллу Ватан давну ортакъчыларына ясалгъан ва юртну ортасында ерлешген эсделикни янында жыйылма башладылар. Гьали бу майданчаны таныма къыйын: шону айланасы булан темир челтирлер тутулгъан, ичиндеги майданчагъа ва юрюйген ёлларына плитка тутулгъан. Ярыкъ тартылгъан. Къалгъан ерлеге буса нарат тайпалы тереклер орнатылгъан. Язбашда гьар тюрлю гюллер чачма да ерлер къоюлгъан.


Паркгъа гиреген ерге къызыл лент тартылгъан. Чепкен-къаптал гийген уланлар ва милли опуракъ гийген къызлар къонакъланы къаршылайлар.


Лентни гесмеге деп Хасавюрт ра­йонну башчысы Жамболат Салавовгъа, юртбашчы Алибек Байсонгуровгъа, Да­гъыстанны Халкъ Жыйыныны депутаты Нариман Темуркъаевге ва Дагъыстанны экономика оьсювюню министерлигини ЖКХ бёлюгюню начальниги Мавлут Мусаевге тапшурула.


Жыйылгъанланы шу шатлы агьвалат булан къутлай туруп, Хасавюрт районну башчысы Жамболат Салавов булай деди:


–Гьюрметли яхсайлылар ва къонакълар! Инг башлап мен гетген йылдан эсе бу йылгъа адамланы яшав шартларын хыйлы яхшылашгъанын эсгермеге сюемен. 15 жамият къоллайгъан, шолар ял алып болар ерлер янгыртылгъан. «Единая Россия» деген партияны сиптечилиги булан башлангъан чакъырыв Россияны Гьукуматыны янындан якълав тапгъан. Шо ишлени кютмеге 27 миллион манат гёрсетилген. Шо ойну да Дагъыстанны Башчысы Владимир Васильев республикагъа гелтирген ва яшавгъа чыгъарып да тура. Шо проектге гёре, райондагъы Яхсайда, Новосельское ва Къуруш юртларда кёп адамлар яшайгъан 5 уьйню абзарлары онгарылды: алды асфальт этилди, ял алмакъ учун скамейкалар салынды ва ярыкъ тартылды. Янгыз Яхсай юртну алып къойсакъ да, юртда 10 миллион 208 минг манатгъа ювукъ акъча харжлангъан. Мисал этип айтсам, Виноградная орамдагъы кёп квартирли уьй, Дайибов ва Мос­товая орамлар, Ибрагьимовну атындагъы орамны бир бою ва юртну ортасындагъы биз бугюн ачагъан парк. Яхсайдагъы 1 номерли школа буса «150 школа» деген проектге гёре 2 миллион 900 минг манат харжланып ярашдырылгъан. Яхсайны сув булан таъмин этмеге уллу насос станция къурулгъан. Шогъар 64 миллион 600 минг манат да харжлангъан. Гелеген йыллагъа юртну ичиндеги сув быргъыланы алышдырмакъ учун да республика бюджетде харжлар гёз алгъа тутулгъан.


Дагъы да ерлер конкурсдан оьтмек­лик бар. Гьали юртлу адамлар учун этилген къурулушланы асырап сакълама герек. Неге тюгюл де шо ерлер янгыз бугюн савлагъа тюгюл, гележекдеги нас­лулагъа да къалма герек.


«Онгайлы шагьар яшав шартлар болдурув» деген проект дагъы да узатылса, гертиден де, кёп юртланы гёрюнюшюн алышдырмагъа бажарылажакъ.


–Гьюрметли юртлуларым! Мен бугюн сююне туруп гелгенмен, неге тюгюл де мунда байрам бар деп айтма да ярай, – дей юртлуларын къутлай туруп, Да­гъыстанны Халкъ Жыйыныны депутаты Нариман Темуркъаев. –Юртну ортасы танымасдай алышынгъан, шо буса сююндюрмей болмай. Хасавюрт районда 14 къурулуш болма герек эди. Мен англа­гъан кюйде, бары да этилеген къурулушлардан асырагъан акъчагъа бирдагъы ер де ярашдырылгъан. Шо да – Яхсайда. Мен оьзюмню ва республика оьлчевдеги депутатланы атындан бек гьаракат этип айланагъан Жамболат Шапиевичге гьакъ юрекден баракалламны билдиремен!


Шолай да, шатлы жыйында Дагъыстанны экономика оьсювюню министерлигини ЖКХ бёлюгюню начальниги Мавлут Мусаев, юрт администрацияны башчысы Алибек Байсонгуров, «Единая Россия» деген партияны ерли бёлюгюню ёлбашчысы, район жыйынны депутаты Майя Салаватова, юртну имамы Арслан-гьажи Моллаев ва тамазаланы советини председатели Гьаваж Ибрагьимов сёйледилер.


Жыйылгъанлар учун гиччирек концерт программа гьазирленген эди. Йырлавлардан ва бийивлерден сонг, юртлулар паркны ичинде геземе башладылар. Паркда яшлар учун бек багъыйлы майданчалар да онгарылгъан. Шоларда ойнамакъ учун гезикге токътап кёп яш бар эди. Яшланы сююнчюнденми, адамланы разилигинденми, билмеймен, чакъ да ачылды ва кёкде гюнню йылтынлары гёрюндю. Чакъ да яхсайлылар булан бирге шу байрамгъа гёре кюйленди буса ярай.

 

БОТАЮРТ


Гьар проект къабул этилингенче, халкъ тынглавлар оьтгериле эди. Ботаюртлулар юртда эки ердеги паркны ярашдырмакъны арив гёрдюлер ва бир гёнгюлден якъладылар. 3 ай алда Ботаюртда Ражабовну орамында парк этилген эди. Энни шоларда тереклер де, гюллер де орнатылды. Къурушда юртну оьр янында адамлагъа рагьатлыкъ учун арив парк да гьазир болду.


Ботаюртда Игитлени паркы да бар. Шонда Советлер Союзну Игити, лётчик, майор Н.Жердевни ва шону булан бир самолётда оьлген подполковник М.Соколовну къабурлары, Советлер Союзуну Игити Абдурагьман Абдуллаевни ва Социалист Загьматны Игити Агьмат Висайитовну белгилери бар. Бир нече йыл алда шо паркда юртлуланы къасты булан Уллу Ватан давгъа баргъанлагъа деп уллу мемориал комплекс этилген эди. Гьали буса паркны айланып янгы челтир салынды, ёллары асфальт этилди ва даим яшыл турагъан ва уллу япыракълы тереклер орнатылды. Адамлар ичине гирсе, олтурмакъ учун скамейкалар, яннавурларында чёп ташламакъ учунгъу алатлар, паркны айланып ярыкъ учун багъаналар да салынгъан.




– «Единая Россия» деген партияны чакъырывуна гёре тизилген «Онгайлы шагьар яшав шартлар болдурув» деген проектни яхшылыгъындан кёп юртланы гёрюнюшю алышынып тура, – дей Хасавюрт районну башчысыны 1-нчи заместители Багьавутдин Мамаев. – Мен сизин атыгъыздан проектни бизге гелтирген ва яшавгъа чыгъарып турагъан республиканы Башчысы В. Васильевге, гьар гюн дегенлей ишлер нечик барагъанны тергейген районну башчысы Ж.Салавовгъа баракалла билдирмеге сюемен. Юртдагъы бары да шатлы чаралар шунда оьтгерилежекге бир де шеклик этмеймен. Гёресиз, нечик аривдюр, шу аривлюкню бугюнгю кююнде сакъламагъа чакъыраман!


– Гертиден де, бизин юртда «Онгайлы шагьар яшав шартлар болдурув» деген проектге гёре 3 ер ярашдырылды, – дей юртбашчы Гьюсен Боташев. – Бугюн ачылагъан паркгъа биз «Уьстюнлюкню паркы» деп къойгъанбыз, неге тюгюл де мунда 4 Игитни эсделиги бар.


Ботаюрт орта школаны директоруну заместители Патимат Ражабова, юртдагъы тамазаланы советини председатели Шагьсолтан Балаев ва башгъалары къурувчулагъа оьзлени баракалласын билдирдилер.


Школаны охувчулары ата юртгъа багъышлангъан йырланы йырладылар ва шиърулар охудулар.

 

КЪУРУШ


Къурушлулар парк этмек учун юртну ортасында ер сайлагъан. Дёрт-беш айны ичинде бош авлакъдан адам къарап турардай парк этилген. Оьзге онгайлыкълар булан бирге мунда яшлагъа ойнамакъ учун онгача майданчалар да бар.


Паркны ачывгъа багъышлангъан жы­йында Хасавюрт районну депутатларыны жыйыныны председатели Магьаммат Лабазанов, юртлуланы шатлы агьвалат булан къутлай туруп, яшлар бизин гележегибиз, шу къурулушлар аслу гьалда шолар учун этилегенни, шону учун да буланы аяп къолламагъа герекни гьа­къында айтды.


– Гьюрметли къонакълар ва юртлуларым! Мен сизин атыгъыздан шу аривлюкню болдургъанлагъа барына да гьакъ юрекден баракалла билдирмеге сюемен, – дей Дагъыстанны ат къазангъан муаллими, «Къурушну сеси» деген ерли газетни редактору Гьажи Къазиев. – Бугюн – юртну тарихине гирер гюнлени бириси. Бу юрт учун янгылыкъ, аривлюк ва бек багъыйлы къурулуш. Язбашда юртлулар субботник этип, паркны ичине гюллер де чачсакъ, бизин ял алмакъ учун инг де онгайлы ерибиз болажакъ...


Шолай да, юртдагъы ветеранларыны советини председатели Вердихан Вердиханов, ерли маданият ожакъны директору Захар Къурбанов, юртну башчысы Рафик Юсупов да бары да къурувчулагъа баракалла билдирдилер.


…Шо гюн уьч юртда шатлы агьвалатлар оьтгерилди. Уьч юртда халкъны эсинде къалар йимик байрам болду.





Количество показов: 101
29.11.2019 17:55
Подписывайтесь на канал yoldash.ru в

Возврат к списку


Добавить комментарий

AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта