Яш спортчулар булан ёлукъгъан

       

       


Бугюнлерде Хасавюрт районну Эндирейдеги ва Къарланюртдагъы яшёрюмлени спорт школаларына экстремизмни ва террорчулукъну алдын алывну айланасында англатыв чаралар оьтгермек учун ёлугъувлар болгъан. Спорт школаланы яшларыны алдында Дагъыстан Республиканы дин масъалалагъа къарайгъан комитетни къуллукъчусу Магьаммат Магьамматов, ДР-ни спортгъа ва физкультурагъа къарайгъан министерлигини къуллукъчусу Халитбек Магьачев, Хасавюрт районну имамларыны советини председатели Ражап Ханмирзаев ва башгъалары чыгъып сёйлеген.



Дагъыстанны дин масъалалагъа къарайгъан комитетини къуллукъчусу Магьаммат Магьамматов айрыча Дагъыстандагъы ва бизин уьлкедеги динни айланасында гьалиги заманда юрюлеген къаравланы гьакъында ва шолай да динни юрютмек учун бир де пуршав ёкълугъуна бары да имканлыкълар барлыгъыны гьакъында айтгъан. М. Магьамматов эсгерген кюйде, яшёрюмлени динге бакъгъан якъда терс къаравлары билимсизлигини ва анг­лавсузлугъуну натижасында тувулуна.



– Жинаятчы уьюрлени таъсирине тюшмес учун буса, ислам динни кюрчюсюн ахтарып уьйренмеге герек. Шолай да, бизин динни гьакъында тындырыкълы кюйде билмек, ону англамакъ учун бары да имканлыкълар бар. Межитлерде ислам динни кюрчюлерине де уьйренме бола. Интернетден динге байлавлу маълуматлар алмагъыз, олагъа тергев этмегиз. Айрокъда Интернетден таба жинаятчы уьюрлер оьзлени терс ишлерин юрютмек учун къаныгъывлу кюйде чалыша, – деген М.Магьамматов.



ДР-ни спортгъа ва физкультурагъа къарайгъан министерлигини къуллукъчусу Халитбек Магьачев яшланы алдында сёйлей туруп, бугюнлерде спорт булан машгъул болмагъа сюегенлер учун бары да имканлыкълар яратылгъанлыгъын айтгъан ва оьзюню яш заманында булай барыда ясандырывлар булан таъмин этилген спортзаллар ва тренерлер болма­гъанлыгъын эсгерген. Х. Магьачев спортчу яшёрюмлени охувуна да агьамиятын артдырма, бары да якъдан англавлу болма чакъыра туруп, уьлгю гьисапда спортну тутушуп ябушув журасындан дюньяны 5 керен чемпиону Али Алиевни эсгерген. А. Алиев дюньяны 5 керен чемпиону болгъанлыгъындан къайры, медицина илмуланы алими де болгъанлыгъын, бош заманын гьаман да китаплар охуй туруп йибергенлигин айтгъан ва яш спортчулагъа оьзлени жураларында чемпионлар болмакъны ёрагъан.



Ёлугъувну ахырында спорт школаланы ёлбашчылары къонакълагъа баракалла билдирген. Яш спортчулар да оьз гезигинде оьзлени спорт гьюнерлерин гёрсетген.





Авторизация
*
*
Регистрация
*
*
*
Согласны с условиями сайта?
Генерация пароля