Уьстюнлюк къазанып къайтдылар


Бугюнлерде Финляндияны Тампере шагьарында тутушуп ябушувдан яшёрюмлени арасында дюньяны оьлчевюндеги ярышлары оьтгерилди. Шоларда Россияны жыйым командасына къошулгъан уьч дагъыстанлы кочап ортакъчылыкъ этген. Оланы экевю – Абдулла Агьматов (60 кило), Шамил Омаров (96 кило) биринчи ерге ес болгъанлар, Исмайыл Гьажиев буса гюмюш медаль къазана.



Бугюнгю маълумат къуралланы кёмеги булан спортну тутушуп ябушув журасын сюегенлеге 2 гюнню узагъында ярышлагъа къарамагъа, кочапланы гючлю ва осал якъларын гёрмеге имканлыкъ берилген.


Магьачкъалалы Абдулла Агьматов оьзюне къаршы чыкъгъан 5 кочапны утуп, дюньяны чемпиону бола. Шо гюн 96 кило авурлукъда тогъатартгъан, хасав­юртлу Шамил Омаров да биринчи ерни къазана.


Артындагъы гюн 55 кило авурлукъда халчагъа таргъулу Исмайыл Гьажиев чыгъа. Ол спортда янгы адам тюгюл. Тутушуп ябушувну сырларына ону «Динамо» спорт жамиятыны Таргъудагъы филиалыны тренери Пахрутдин Залибеков уьйретген. Шо вакътини ичинде ол яш уланланы арасында Европаны чемпиону, сонг да 2014-нчю йылда яшёрюмлени арасында биринчи ерге ес болгъан.


Тампереде Исмайыл биринчи ёлугъувунда оьзю алда утгъан гюржюлю кочап Роберти Дингашвили булан ёлугъа. Алда йимик бу гезик де Исмайыл ону 11:1 санав булан таза ута.


Экинчи ёлугъувунда Исмайыл эрменили кочап Арсен Арутунянгъа къаршы чыгъа. Бу ёлугъув  ёлдашларын арт секундлагъа ерли гьалеклендире. 4 минут 15 секундну ичинде Исмайыл Арсенге 9 бал берип, оьзюню тутушувун яман гьалгъа сала. Шо вакъти ол ёлугъувну оьзюню пайдасына буруп бажарар деп бирев де, гьатта Дагъыстанны яшёрюмлерини командасыны баш тренери Анвар Магьамматгьажиев де, балики, инанмагъандыр. Тек Исмайыл Арсен 5 минутдан къазангъан 9 балны янгыз 1 минут 15 секунддан къайтармагъа бажара. Гьасили, ёлугъув 11:9 санав булан Исмайылны пайдасына тамамлана.


Уьчюнчю ёлугъув да енгил болмады. Германияда яшайгъан бизин якълы Рамзан Автаев къатты улан болуп чыгъа. И.Гьажиев не этип де ёлугъувну 8:3 санав булан оьзюню пайдасына битдире.


Артдагъы эки ёлугъув Исма­йылны кёп гючюн ала. Огъар къаршы  америкалы  сынавлу кочап Дейтон Фикс чыгъа. Ол алдагъы йыл оьтгерилген дюнья ярышларында уьчюнчю ерге ес болгъан.  Яшлыкъ ва сынав къаршылаша. Тогъатартыв 12:1 санав булан американлыны пайдасына бите. Исмайыл Гьажиев гюмюш  медальгъа, эрменили А.Арутунян, дюньяны гетген йылгъы чемпиону азербайжанлы А.Хашалов уьчюнчю ерлеге ес болалар.


Бир тюрлю ишлер себеп болуп, ярышлар юрюлеген гюнлер мен Москвада эдим. Гече, 3 августда, уьйге къайтмагъа ёл чыкъдым. Алданокъ сёйлешгенде йимик, Москва-Магьачкъала рейсде уьч де яш кочабыбыз ва оланы тренери Анвар Магьамматгьажиев булан раслашдым. Башлап оланы уьстюнлюк булан къутладым. Сонг, тезден берли таныйгъан Анвар Абдуллаевичден таба Абдулла, Шамил ва Исмайыл булан таныш болдум. Олар уллугъа да, гиччиге де сый-гьюрмет этип билеген, арив тарбиялы яшёрюмлер экенин билдим. Ювукъ арада буланы гьариси уллу халчагъа чыгъажакъ ва онда да оьзлени тийишли кюйде гёрсетежегине шекленмейбиз.


Шо гьакъда А. Магьамматгьажиев булай деди: 


– Ярышларда тутушуп ябушувда яшёрюмлер спортну бу журасыны даражасын дагъы да оьр этгени белгили болду. Айрыча айтсам, американлылар, иранлылар бек гючлю командалар гелтирген эди. Америкалы яшёрюмлер 3 алтын, 3 гюмюш ва 1 бронза медаллар къазанды. Командаланы арасында олар 1-нчи ерге де ес болдулар. Къысгъача айтгъанда, бизге ял алмагъа чола ёкъ. Баш ярышлар тамамланса да, оланы натижалары булан рази­лешип токътамагъа кюй ёкъ. Алда – янгы ярышлар. Шоланы башында Токиодагъы Олимпия оюнлары токътагъан.


Анвар булан лакъыр эте туруп, «Уьйташ» аэропортгъа етишгенибизни де эс этмедик.


Янгы  чемпионлар булан савболлашып, ягъагъа чыкъдым. Аэропортну алды адамлардан толгъан. Къолларда транспарантлар, чечеклер, бетлерде сююнч, къуванч гьис этиле.


Дагъыстан ва дагъыстанлылар Тампереде Россияны байрагъын гётертип, уьлкебизни, республикабызны, халкъыбызны абурун дагъы да оьр этмеге бажаргъан сыйлы жагьил уланларын байрамча къаршыламагъа гьазирлигин бирдагъы гезик гёрсетди.


 


Къаягент район.


СУРАТДА: Исмайыл ГЬАЖИЕВ турнирни вакътисинде.

Авторизация
*
*
Регистрация
*
*
*
Согласны с условиями сайта?
Генерация пароля