Артдагъы йылларда окъ-жая булан атышагъанланы «Чилле ёл» деген республика федерациясы спортну мердешли шо журасын янгыртывгъа ва оьсдюрювге байлавлу мекенли сиптелени яшавгъа чыгъарып геле. Алданокъ белгиленген низамгъа гёре гьар тюрлю даражадагъы ярышлар оьтгере. Оьтген жуманы ахырында, ачыкълашдырып айтгъанда, июль айны 9-нда оьтгерилген «Атлыбоюн – 2017» деген Дагъыстанны ачыкъ турнири шолай умпагьатлы гьаракатланы бириси гьисаплана.

________________________________________________________

Эсгерилген федерацияны ёлбашчысы Жанболат Магьтибеков бизге билдиргени йимик, бизин республикада окъ-жая булан атышагъан спортчуланы санавун артдырмакъ, жагьил адамланы санлы яшав юрютювге муштарлы этмек Ленингент юрт­ну ювугъундагъы майданчада юрюлген шо турнирни оьтгерив булан чечилмеге тюшеген аслу борчлар болуп токътады. Шону булан бирге, ону барышында Бютюнроссия оьлчевде юрюлежек ярышланы алдында спортчуланы бажарывлугъун артдырывгъа да, усталыгъын камиллешдиривге да тийишли тергев берилди.

Окъ-жая атышыв булан машгъул уллуну да, яшны да къуршагъан шо ярышлар Кавказны мердешли асгер саниятларыны ассоциациясы тасдыкъ этген гесимлеге гёре юрюлдю. Ачыкълашдырып айтгъанда, янгы башлайгъанлар 30-40 метрден, мекенли сынав топлагъан спортчулар буса 60-90 метрден нишангъа окъ атывда сынавлардан оьтдю.

Сонг да, турнирни ортакъчылары жаяланы гьар тюрлю жураларындан окъ атып тогъатартгъанын шу ерде айрыча айтмагъа тюше. Ону гьасиллери гьакъда айтгъанда, шонда ортакъчылыкъ этген окъ-жая атышыв булан машгъул болагъан клублагъа юрюйгенлер барысы да дегенлей оьзлени спортну шо мердешли журасына бакъгъан якъда баргъан сайын усталыгъы артагъанын исбатлады. Шолай, яшёрюмлени арасында Мугьаммат Магьамматов («Ассафра» деген клуб) биринчи ерни къазанмагъа бажарды. Окъ-жая булан янгы иштагьлангъанланы арасында Мансур Мансуров («Ассафра» деген клуб) алдынлы ерге лайыкълы болду. Окъ-жаяны лонгбоу журасы (европа уьлкелерде къолланагъан узун окъ-жая) булан атышывда «Солтанянгыюрт» деген клубгъа юрюйген Абдурашит Магьамматов лап яхшы натижалар гёрсетди. Мердешли окъ-жая булан атышывда «Оьзден» деген клубну вакили Агьмат Мукаиловгъа тенг гелеген болмады.

Турнирни гьасиллерине гёре башлапгъы уьч ерге ес болгъанлар барысы да дипломлар ва медаллар булан савгъатланды.

Насрулла БАЙБОЛАТОВ.

СУРАТДА: оьтгерилген турнирни ортакъчылары.