Гёрмекли агьвалат болду

Газетни гетген номеринде де билдирилгени йимик, июль айны 8-9-нда, Каспийскиде Али Алиевни атындагъы яшёрюмлени ва спортну къаласында Али Алиевни эсделигине багъышлангъан тутушуп ябушувдан мердешли халкъара турнир оьтгерилди.

   ____________________________________________________



Бу йыл 48-нчи керен юрюлеген шо турнирни ачылывунда ДР-ни Гьукуматыны Председатели Абдусамат Гьамитов, олай да Дагъыстанны алдынгъы Президенти Муху Алиев, савлай дюньягъа аты айтылгъан белгили кочапны уланы Зулкъарнай Алиев ва бизин республиканы гьакимлик къурумларыны кёп санавдагъы оьзге жаваплы къуллукъчулары ортакъчылыкъ этди.   


А. Гьамитов оьзюню сёйлевюнде Али Алиевни эсделигине оьтгерилеген турнирде янгыз бизин уьлкени тюгюл, тыш пачалыкълардан гелген кочаплар гьар къачан да кёп сююп ортакъчылыкъ этегени гьакъда эсгерди. Шону булан бирге, турнирни барышында тогъатартагъан спортчулар рази къалсын учун, оьтгерегенлер гьар заманда да оьзлени къолундан гелеген бары да гьаракатын болдурагъаны гьакъда айтды. Гележекде турнирни ортакъчыларыны санавун артдырмакъ ва оланы иштагьландырмакъ муратда алдынлы ерлеге лайыкълы болгъанлагъа берилеген савгъатланы къадарын артдырмакъ гёз алгъа тутула­гъаны гьакъда билдирди.


– СССР-ни спортуну ат къазангъан устасы, дюньяны беш керен чемпиону, уьлкени оьлчевюнде чемпион атгъа тогъуз керен лайыкълы болгъан Али Алиевге бизин республикада айрыча гьюрмет булан янаша. Ону аты Дагъыстанда спортну белгиси болуп да битген. Ол халкъара оьлчевде оьзюн танытгъан, янгыз бизин республикада, СССР-де тюгюл, ондан тышда да герти абургъа лайыкълы болгъан биринчи кочап гьисаплана. Швейцарияда иш гёреген ябушувну бары да жураларыны федерациясында огъар эсделик салынгъаны да, ол спортну тутушуп ябушув журасыны оьсювюне шайлы къошум этгенин исбатлай. Белгили кочапны эсделигине багъышланып бугюнлерде оьтгерилеген гезикли турнир оьр даражада юрюлежегине, олай да ону ортакъчылары учун унутулмас агьвалат болуп къалажагъына гьакъ юрекден инанаман, – деди оьзюню сёйлевюнде Дагъыстанны Гьукуматыны ёлбашчысыны биринчи заместители Анатолий Карибов.


Гертилей де, эсгерилген турнир бизин республиканы спорт яшавунда гёрмекли агьвалат болуп токътады. Азербайжанны, Белоруссияны, Къазахстанны, Украинаны, Бразилияны, Италияны, Монголияны, Эквадорну, Россияны ва оьзге уьлкелени жыйым командаларына къуршалгъан кочаплар турнирни барышында тогъатартгъаны ону агьамиятлыгъын артдырды.


Биринчи гюн турнирни алтын медалларын Дагъыстанны ва Азербайжанны жыйым командаларына къуршалгъанлар оьзлени арасында пайлады деп айтмагъа ярай. Ачыкълашдырып айтгъанда, 67 ва 74 кило авурлукъларда халчаны есилери Абакар Абасгьажиев ва Магьаммат Хизриев биринчи ерлеге ес болду. Шолай да, азербайжанлы кочаплар Махир Амирасланов ва Асланбек Алборов 57, 97 кило авурлукъларда алтын медаллар къазанды.


Экинчи гюн дагъы да бир нече авурлукъларда кочаплар ябушув халчада тогъатартдылар. Дагъыстанлы кочаплар Бекхан Гойгереев ва Алихан Жабрайылов 61, 86 кило авурлукъларда чемпион атлагъа ла­йыкълы болду. Шондан къайры да, украинли кочап Ален Засеев 125 кило авурлукъда алтын медалгъа ес болду. Италиянлы кочап Франк Чамизо 70 кило авурлукъда, Россияны, Европаны ва дюньяны чемпиону Магьамматрасул Къазимагьамматовдан уьст гелип, оьзюню бажарывлугъун исбатлады.


Шону булан бирге, эсгерилеген турнирни алдында А. Алиевни атындагъы яшланы ва яшёрюмлени спорт школасында дагъыстан спортуну уьстюнлюклерини музейи ачылгъанын да айрыча эсгермеге тюше.

Насрулла БАЙБОЛАТОВ.

Авторизация
*
*
Регистрация
*
*
*
Согласны с условиями сайта?
Генерация пароля