Футболдан район ярышлар

Бугюнлерде Борагъан юртну футбол майданында «Спортгъа – берекетли ёл! Наркотиклеге – къаршылыкъ!», «Наслуну савлугъу – пачалыкъны байлыгъы» деген чакъырывлар булан билим беривню милли проектин яшавгъа чыгъарывда уьстюнлюк къазангъан Борагъан школаны муаллими С.Ташаевни эсделигине багъышлангъан, гьар йыл да адатланып яшёрюмлени арасында оьтгерилеген футбол ярышлар оьтгерилди. Турнир Гюйдюрмес район администрациясыны физкультурагъа ва спортгъа къарайгъан бёлюгюню ёлбашчылыгъы булан юрюлдю.


Жыйылгъанланы байрам спорт чара булан къутлап, олагъа уллу уьс­тюнлюклер ёрап, Борагъан юрт администрацияны башчысы А. Адилханов, Мычыгъыш Республиканы ат къазангъан муаллими Х. Умаров ва хыйлы башгъалары сёйледилер. Турнирни буса баш судьясы Ш.Мамаев ачды.


Турнир олимпия тизимде юрюлдю. Башлапгъы ёлугъувлар оьтгерилген сонг, ярымфиналгъа «Борагъан – 1», «Дарбанхи», «Ишхой-юрт», «Шуани-юрт» командалар чыкъды. Башлапгъы ярымфиналда «Борагъан – 1», «Дарбанхи» команданы 1:0 булан утду. Финалда «Борагъан – 1» ва «Ишхой-юрт» командаланы ёлугъувуна аслу заманы 0:0 булан битди. Пенальтиде 7:6 булан «Ишхой-юрт» команда биринчи ерге чыгъа ва кубокгъа ес бола.


«Инг яхшы къапучу» деген номинацияда Рамил Муталипов (Дарбанхи), «Лап яхшы якълавчу» деген номинацияда Абубакар Улбиев (Ишхой-юрт), лап яхшы чапгъынчы Нурбек Баймурзаев (Борагъан) белгилендилер. Уьстюн гелген спортчулар барысы да грамоталар, медаллар, кубоклар булан савгъатландылар. Гьаракатны ахырында С.Ташаевни уланы Сулумбек Ташаев жы­йылгъанлагъа да, турнир оьтгерген саялы район администрациясыны вакиллерине де гьакъ юрекден разилигин билдирди.


Турнирни баш судьясы Ш. Мамаев.



Авторизация
*
*
Регистрация
*
*
*
Согласны с условиями сайта?
Генерация пароля