Уллу уьстюнлюклеге етишген

Мен оьзюню гьакъындан айтма сюеген къумукъ улан Марсел Бакиев 1979-нчу йылда Хасавюрт шагьарда тувгъан. Ону атасы Алимпаша Хасавюрт районну Къазмаавул юртундан.



Марсел Хасавюрт шагьардагъы 2 номерли школаны, сонг педагогика коллежни физкультура бёлюгюн 
битдирген.



Бугюнлерде ол йыракъ Нижневартовск шагьарда яшай ва ишлей.



Яш заманында ол белгили тренер Арсланбек Мамаевни алдында спортну дзюдо ва самбо журалары булан машгъул болуп тургъан. Сонг ол «Слада» деген орус ябушувгъа чыкъгъан ва уллу уьстюнлюклеге етме болгъан. Марсел шо ябушувдан дюньяны эки керен чемпиону болгъан.



– Бу орус ябушувдан дюнья чемпионатларда биринчи ерлени алма тынч болмады. Къаст этдим, кёп тер тёкдюм ва оьр канзилеге гётерилдим, – дей чемпион.



Юмурукъ уруп ябушувдан ва спортну самбо журасындан халкъара даражалы устасы. Кёп керенлер Ханты-Мансийск округну чемпионатларында биринчи ерлени алгъан.



Ол оьзюне 39 йыл бола буса да, спортдан айырылмай. Ол 2014-нчю йылда «Слада» деген ябушувда ветеранланы арасында дюньяны чемпионатында биринчи ерни къазангъан.



–Мен шо уьстюнлюкню мени биринчи тренерим ва магъа яшавда кёп кёмек этген бугюн арабызда ёкъ Арсланбек Мамаевге багъышладым. Ол герти тренер эди. Мени ябушувну сырларына уьйретген. Мен ону бир де унутмажакъман, –дей Марсель.



Буссагьатгъы вакътиде ол низамсыз ябушувланы жамият федерациясыны президенти гьисаплана.



Спорт булан машгъул болагъандан къайры да, Нижневартовск шагьардагъы «Импульс» деген реклама фирманы директоруну къуллугъунда чалыша. Марсел оьзю художник де дюр.



Бираз алда ол Дагъыстангъа ватанына гелип гетди. Таныш болдукъ. Ол саламат хасиятлы ва намуслу улан.



Йыракъ эллерде спортда ва ишлеринде уллу уьстюнлюклеге етмеге болгъан къумукъ улан булан биз де оьктем болабыз.



Авторизация
*
*
Регистрация
*
*
*
Согласны с условиями сайта?
Генерация пароля