Умутну, инамлыкъны, сюювню китабы



  Оьтген йылны ахырында «Абусупиян» деген китап издательствода къумукъча да, орусча да язагъан шаирибиз Латип Гьажакъаевни «Надежда, вера, любовь» деген шиъру китабы чыкъды. Бу китапгъа Россияны язывчуларыны союзуну члени Л. Гьажакъаевни сайламлы асарлары гирген. Шиърулар булан бирче китапда авторну орус тилде язылгъан «Ах, какая женщина…» деген повести де бар.

Л.Гьажакъаев бизин белгили шаирлерибизни, язывчуларыбызны асарларын чебер кюйде таржума да эте. Ону  аты айтылгъан шаирибиз Йырчы Къазакъны гьа­къында язгъан «Къысмат» ва «Плаха» деген поэмасы  эки де тилде китапда ер тапгъан.



«Мени таржумаларым» деген бёлюкде немис поэзияны классиги Пауль Флеминг он алтынчы асруда Дагъыс­танда болгъанда язгъан шиъруланы автор оьзтёрече таржума этген. Бу бёлюкде бизин белгили шаирлерибиз Агьмат Жачаевни, Бадрутдин Магьамматовну, Жаминат Керимованы, Рукъият Устарханованы, Гёгюрчюн Атаеваны ва оьзге къумукъ шаирлерибизни шиърулары да орус тилге таржума этилип берилген.



Китапда къумукъ тилде берилген «Жагьбатым» деген шиъруну ол анасына багъышлап язгъан:



…Гюнешни гюлю тайып,



Гёзню гёзьяшы агъа.



Уллугъа тартгъан сайын,



Азиз боласан магъа, – деп яза автор таъсирли чыкъгъан бу шиърусунда.



Поэзия тармакъда да, проза тармакъда да Латип Гьажакъаев бир йимик чебер, берекетли чалыша. Авторну 427 бетли бу китабы да, алда чыкъгъан беш китабы булан бирче охувчулагъа гезикли савгъат болажакъгъа инанабыз.


 


Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля