Абурлу ветеринар

Нугьбек Оьлмесов 48 йыл алда Магьачкъаладагъы юрт хозяйство институтну ветеринар бёлюгюн охуп битдирип, Яхсайдагъы ветеринар бёлюкде ишлеме башлагъан. Иш башлагъан биринчи гюнюнден бугюнлеге ерли ол таймай бир ерде ишлей. 48 йыл бир касбуну юрютюп, башлап гелген идарадан таймай ишлеп турмакъ учун адамгъа нечакъы сабурлукъ, рагьмулукъ, оьзденлик герек. Бизин заманда бир ерден таймай ишлеп турагъанлар кёп аз.

«Дагъыстанны ат къазангъан ветеринар врачы» деген гьюрметли атны къазангъан Нугьбек Оьлмесов макътавгъа лайыкълы. Озокъда, бирче ишлейгенде ишни юрютювде иш ёлдашларындан да кёп зат гьасил бола. Ишине юреги авуртагъан ёлдашлар булан не даражагъа етме де имканлыкъ яратыла. Нугьбек булан бирче ишлейген иш ёлдашларыны да загьмат йыллары 25-ден оьтген. Гьажиюрт бёлюкню башчысы Альберт Абдулкъадыров, фельдшерлер Арсен Даваджиев ва Индира Рамазанова, учётну юрютеген Зумурут Шагьабова гьариси оьзлени ишин тындырыкълы кюйде кютме къаст эте. Аз адамдан къуршалгъан, тек асил адамлардан бирикген бу бёлюк янгыз Яхсайдагъы халкъны жан-жаныварыны, уллу-гиччи гьайванларыны аврувларын алдын алма къаст этип къоймайлы, гьазиринде хоншу юртлагъа да етише. Янгыз Яхсайда буса 3 мингге ювукъ уллу, 3 минг 500-ге ювукъ гиччи гьайван бар. Олагъа буса йылда эки-уьч керен гьар тюрлю аврувланы алдын алмакъ учун дарман, уколлар этиле, тергевден оьтгермек учун къан алына. «Сибирская язва», «бруцеллёз» йимик аврувланы алдын алма чалыша.

Эсгерилген ветеринар бёлюкню ишине халкъ да бек рази, неге тюгюл, гьайванынг-малынг авруп билдиргендокъ, артгъа салмай, тезлик булан ветеринар бёлюкню къуллукъчулары тез-тез етишип геле.

Къайсы касбуну башын тутуп ишлесе де, ишине намуслу кюйде янашып, къаст этип ишлеген адам халкъарада абур къазанмай къалмажакъ. Булай гезиклерде «загьмат байлыкъны булагъыдыр», «загьмат да, сююнч де янаша юрюр» деген къумукъланы айтывлары эсиме гелип гете.

Сыкълашгъан иш ёлдашлары булан бирче иманлы-динли Нугьбек Оьлмесовгъа эсен-аман савлукъда касбусуну 50 йыллыкъ юбилейин къаршыламакъны ёрайман.

Адил Бийтемиров.

Суратда: (солдан онггъа)

А. Абдулкъадыров, Н. Оьлмесов, ­

З. Шагьабова, А. Даваджиев.

Авторизация
*
*
Регистрация
*
*
*
Согласны с условиями сайта?
Генерация пароля