Сакъатланы гьайын эте


     


Мен Хасавюрт шагьарда сакъатланы советини иши гьакъда язмагъа баргъанда, шо къурумну председатели Атав Бийсолтанович Агьматовну столну артында олтуруп языв этип турагъан вакътисине къаршы болдум. Гьалын-кююн сорап, мурадымны айтгъанда, ол алдындагъы кагъызны гёрсетди.


 


– Иш къурумланы башчыларына сакъатлагъа кёмек этсин деп тилеп кагъыз язып тураман,–дей ол кагъызны ари тебере туруп. –Алдагъы башчы барда гьал яхшы эди, гьали тилеме тюше. Оьзлени къайгъысы булан уьйден чыкъмайгъанлагъа гиччирек буса да савгъатлар этме сюебиз.



Атав Бийсолтанович бу ишине 2007-нчи йылда гиришген. Оьтген заманны ичинде сакъатланы совети кёп иш этген. Советни гьисабында 800-ден де артыкъ 1-нчи ва 2-нчи группалы сакъатлар бар. Шоланы яшавунда бираз сама гёнгюн алмакъ учун ёлугъувлар оьтгере ва ятывдагъыланы уьюне барып гёре, савгъатлар бере.



–Гетген йыл сакъатлар учун 23-нчю февральда ва 8-нчи мартда ёлугъувлар оьтгердик. 40-50 адамгъа ашамлыкъ маллар да алып гёрме бардыкъ. Ятывда турагъанлар шолай ёлугъувлагъа айрокъда бек сююне, – деп давам эте лакъырын Атав Бийсолтанович. –Бизин сакъатланы советине 13 адам гире. Олар кимлени уьс­тюне барма герекни ва олагъа не берме тюшегенни токъташдыра.



Атав Агьматовну айланышына къарагъанда, огъар 92 йыл бола деп айтмажакъсан, яш гёрюнегенден къайры да, жагь адам да дюр. Ол оьзюню гьакъында хабарлагъанда, тамаша къысматы булангъы адам экенни англап, ону гьакъында да язма иштагьым гелди.



Атав Агьматов 1927-нчи йылда Яхсайда тувгъан. Ол юртдагъы школада 7 класны битдиреген замангъа, дав башлана.



–Юртдагъы оьрюм ва жагь яшланы барын да жыйып, барыбызны да Терикге йиберди. Шону бериги боюнда танклагъа къаршы орлар къазып, 2 ай ишледик,–деп хабарлай Атав Бийсолтанович. –Магъа 15 йыл тюгюл болмай эди, тек уьйню сагъынсакъ да, бирев де уьйге барайыкъ деп айтмай эди. Шо вакътиде немислер Грозныйны бомбагъа тута эди. Шонда яллагъан нап батагъаланы пурхуна туруп болмай эдик. Немис самолётлар заманда бир биз татавул къаза­гъан ерге де учуп геле эдилер. Бир-бирде самолётдан: «Пайдасыз ишлер этесиз, Сталин капут!»–деп язып кагъызлар ташлай эдилер. Шоланы шондагъы жаваплы адамлагъа бере эдик. Эгер де бирисини кисесинден шо кагъыз чыкъса, шо адамны тута эди.



Шо йылларда Мычыгъыш Респуб­ликаны Къадиюртундан Бабаюрт ра­йонну Уцуми юртуна ерли орлар къазмакъ учун савлай Дагъыстандан адамлар гелип тургъан.



Давну биринчи гюнлеринде Атавну атасы Бийсолтанны трактору булан бирге фронтгъа йибере. Орлар къазып уьйге къайтгъан Атавну ва башгъа яшларын да алып анасы оьзюню къардашлары яшайгъан Адилотаргъа гете. Башлап Атавну атлагъа къарама сала, арадан кёп заман гетмейли, тракторгъа прицепщик этип чыгъара. Атав Буйнакскиде 3 айлыкъ курсланы битдире ва юртда тракторист болуп ишлеме башлай. Артда яш уланны трактор бригаданы бригадири этип сала. «Бары да за – фронтгъа!»– деген чакъырывгъа гёре, бригада гече-гюн ишлей. Ол хабарлайгъан кюйде, эки сменде ишлемейген гюню де болмагъан. Вагонларда да яшап, айлар булан уьюне къайтмай ишлегенлер. Топуракъны сюреген вакътиде тракторлар да суткалар булан токътамай ишлеп тургъан. Тракторланы ярыкълары ёкъгъа гёре, консерва къутукълагъа нап да тёгюп, ярыкъ этип ишлегенлер. Шо йылларда Атав Бабаюртда заочно 10 класны да охуп бите.



Артындагъы йыл ону Таганрогда бир йыллыкъ курслагъа йибере ва шондан къайтгъанда, бригадагъа механик этип сала. Шолай ишлей туруп, дав да бите.



Бийсолтан давдан 1945-нчи йылда къайта. Агьлюсю дав йылларда яшап тургъан Адилотаргъа геле. Давда тийген яралары оьрчюгюп турагъангъа гёре, авур ишлерде ишлемей. Тек айынып гетмей, давну яраларындан 1960-нчы йылда, оьзюне 60 йыл бола­гъанда гечине. Шо йыл Атав агьлюсюн де алып Хасавюрт шагьаргъа чыгъа ва тюрлю-тюрлю ишлерде ишлей. Башлап ол тракторлагъа ва автомашинлеге запчастлар береген ерде чалыша. Сонг ол юрт хозяйство маллар къабул этеген бирлешивде инспектор бола. Шо йылларда Атав Бийсолтанович инженер-механикге охуп, оьр билим ала. Хасавюрт, Бабаюрт, Къазбек ва Новолак районланы къошуп уллу управление эте, Атав шонда баш инженер болуп ишлей. 1970-нчи йылларда ол Хасавюрт шагьардагъы автохозяйствону директору болуп белгилене ва 1987-нчи йыл пенсиягъа чыкъгъанча шонда ишлей.



Пенсияда буса да, ол бош турмай, халкъны социал якъдан якълайгъан центрда баш касбучу болуп гьаракат эте. Шонда 20 йыл ишлегенде, ону шагьардагъы сакъатланы советини председатели этип сайлай. Атав бугюнлерде де шо ишинде жагь кюйде къасткъыла ва тапшурулгъан ишлени артгъа салмай кюте.



Не ерде ишлесе де, Атав Агьматов оьзюн бажарывлу касбучу гьисапда гёрсетген. Къайратлы загьматы учун ол кёп санавдагъы медаллар булан савгъатлангъан. Агьлюсю булан 8 авлет оьсдюрген. Шоланы бириси, Бадюр, бугюнлерде Хасавюрт шагьарны башчысыны 1-нчи заместители болуп ишлей.



Эки йыл алда Атав Бийсолтановични 90 йыллыгъы булан къутлап, Россияны Президенти Владимир Путинден кагъыз гелди. Шону да шагьар админист­рацияда уллу шатлыкъда тапшургъан. Шонда огъар лайыкълы сёзлер айта туруп, Президент ­огъар яхшы савлукъ да ёрай. Шогъар биз де къошулабыз, неге тюгюл де уллу чагъындагъы адамлагъа шо савлукъ етишмей. Бар болгъур, Атав Бийсолтанович!


 

Гебек КЪОНАКЪБИЕВ,


оьз мухбирибиз.




 

Авторизация
*
*
Регистрация
*
*
*
Согласны с условиями сайта?
Генерация пароля