Янгыз ишин тюгюл, татывлу коллектив де къургъан


    Халкъ арада амалдан гелип врачланы алдына адам барамы деп айтагъанланы аз эшитмегенбиз. Балики, бир тайпаланы акъ халатлылагъа байлавлу салкъын янашывлары, ойлары себепсиз тюгюлдюр. Гертиден де, гьарибиз гьис этеген кюйде, оланы арасында да билим, бажарывлукъ якъдан тюрлю-тюрлюлери бар.



Тек бары да врачлагъа, медицина къуллукъчулагъа бир йимик багьа берсек де дурус болмас. Оланы арасында бек пагьмулулары барны да унутмагъа тюшмей. Олайлардан бири Магьачкъаладагъы республика больницада къанны тазалайгъан хирургия бёлюгюню заведующийи Патимат Гьажиеваны гьакъында айрыча эсгермеге ярай.


Гертиден де, ону гьакъында кёп арив сёзлер айтмагъа бола. Ол аврувлагъа намусу булан, илиякълы кюйде янашып, оланы гёнгюн хошландырагъаны да аврувну савлу­гъун беклешдирмеге кёп уллу кёмек эте. Янгыз дарманланы къоллап тюгюл, йылы сёз йыланны кебинден чыгъарар дегенлей, гелишли сёзю булан да ол хыйлы аврувлагъа аякъгъа турмагъа кёмек этген десем де, къопдурув болмас.


Патимат Гьажиева школаны битдирген сонг, Дагъыстан пачалыкъ медицина институтгъа тюшюп, 1978-нчи йыл шону яхшы къыйматлагъа битдире. Шо оьр охув ожакъда интернатураны да тамамлай. Ондан сонг ол Магьачкъаладагъы респуб­лика больницаны реанимация бёлюгюнде геомодиализ кабинетни къура. 1978-нчи йылдан 1990-нчы йылгъа ерли ол шо больницаны реанимация бёлюгюнде къаныгъывлу кюйде ишлей. Шо йылланы ичинде Москвадагъы бир номерли шагьар больницаны урология бёлюгюню бюйрек аврувлагъа къарайгъан цент­рында билимлерин камиллешдире.


Патимат Гьажиева – оьр категориялы врач, Дагъыстанны ва Россияны ат къазангъан врачы, медицина илмуланы кандидаты. Ондан къайры да, ол –загьматны ветераны да дюр. Ол Россияны диализ ва трансплантология жамиятыны да члени бола.


Кёп йылланы узагъында намуслу кюйде чалышгъаны учун о замангъы СССР-ни савлукъ сакълав министерлигини атындан баракалла кагъызлар булан савгъатлагъан. Олай да, 1994-нчю йыл Дагъыстан Республикада лап да къоркъунчлу югъагъан аврувланы ёкъ этмек муратда оьтгерилген гьаракатларда къасткъылып ортакъчылыкъ этгени учун да Патимат Гьажиевагъа Россияны савлукъ сакълав министерлигини янындан баракалла билдирилген.


Республика клиника больницаны реанимация бёлюгюнде ишлейгенде Патимат Гьажиева геомодиализден биргине-бир касбучу болгъан. Ону гьаракаты булан 1990-нчы йылда республика больницасында къанны тазалайгъан хирургия бёлюгю ачыла. Шо гюнден тутуп, бугюнлеге ерли Патимат Гьажиева шо бёлюкню заведующийи болуп чалышып тура. Ону алдына янгыз Дагъыстандан тюгюл, хоншу Мычыгъыш Республикадан да аврувлар гелип, савлугъун беклешдирип, огъар рази болуп гетелер. Патимат Гьажиеваны гьай этивю булан шолай бёлюк Дербентдеги район больницада да ачылгъан.


Гьар тюрлю йылларда Санкт-Петербурггъа, Москвагъа барып нефрологиядан, урологиядан билимлерин артдырып, огъар медицинаны шо бёлюклеринден де тийишли шагьатнамалар тапшурулгъан.


Патиматны пагьмусуна янгыз Дагъыстанда, Россияда агьамият берилип къалмагъан, огъар тыш пачалыкъларда да тергев этген. Айтагъаным, ол бюйрек аврувлагъа байлавлу Египетде халкъара конференцияда да, Швецияда, Францияда трансплантологланы, Италияда буса нефрологиядан бютюндюнья конгресслерде ортакъчылыкъ этген. Олай да, ол Германияда, Францияда халкъара диализ жамиятыны европа конгресслеринде де болгъан.


Патимат Гьажиеваны ва ону бёлюгюнде чалышагъан врачланы, медицина къуллукъчуланы мен бирев айтып тюгюл, оьзюм гёрюп, къатнап таныгъанман. Шо бёлюкде, гюнагьларындан Аллагь гечсин, мени уьягьлюме де ятып, аврувун бакъма тюшдю. Шонда мен башында Патимат Гьажиева да булан барысы да аврувланы бек гьайын этегенине тюшюндюм. Неге тюгюл, ол биригип ишлейген шолай татывлу коллектив къурма да бажаргъан.  

 

Насирханум АРСЛАНБЕКОВА.

 

Авторизация
*
*
Регистрация
*
*
*
Согласны с условиями сайта?
Генерация пароля