Спортчулагъа – пачалыкъ савгъатлар

Алда да бизин газетни бетлеринде айтылгъанда йимик, Токиода оьтгерилген Паралимпия оюнларда ортакъчылыкъ этген Россияны жыйым командасына къуршалгъан дагъыстанлы спортчулар гёрмекли оьрлюклеге етишип къайтдылар.

Оланы арасында Муса Таймазов таякъны 35, 42 метрге атып, дюнья оьлчевюнде лап яхшы натижаны гёрсетмеге бажарды. Паралимпия оюнланы оьлчевюнде оьтгерилген ярышланы барышында ябушувну тхэквондо журасында юрюлген тогъатартывларда Зайнутдин Атаев де бронза медальгъа лайыкълы болду. Озокъда, бизин спортчуланы Паралимпия оюнларда етишген гёрмекли уьстюнлюклери уьлкени ва республиканы ёлбашчыларыны янындан тергевсюз къалмады.

Шо гьакъда айта туруп, Россияны Президенти Владимир Путин къол салгъан къараргъа гёре, спортда етишген оьрлюклери, олай да Паралимпия оюнларда етишген уьстюнлюклери гёз алгъа тутулуп, олагъа пачалыкъ савгъатлар да тапшурулду. Ачыкълашдырып айтгъанда, итнигюн, сентябр айны 13-нде, Уллу Кремль къалада шатлыкъны шартларында юрюлген гьаракатда Муса Таймазовгъа Дослукъну ордени, Зайнутдин Атаевге буса «Ватанны алдындагъы къуллукълары учун» деген орденни медалы берилди.

Оьтгерилген шо гьаракатны вакътисинде РФ-ни Президенти В. Путин тёшюне орденни такъгъан сонг, Муса Таймазов оьзю гьар заманда да якълав табагъан бизин республиканы физкультурагъа ва спортгъа къарайгъан министерлигини ёлбашчыларына ва жаваплы къуллукъчуларына, олай да спортда оьрлюклеге талпындырып тургъан бары да дагъыстанлылагъа оьзюню разилигин билдирди.

Шону булан бирге, бизин къумукъ уланлардан къайры да, Паралимпия оюнларда спортну гьар тюрлю жураларында алдынлы ерлеге ес болгъан Анатолий Шевченкогъа ва Даниил Сидоровгъа шо гюн пачалыкъ савгъатлар тапшурулгъанын да айрыча эсгермеге тюше. Биз олагъа барысына да спортда гележекде дагъы да кёп оьрлюклер ёрайбыз.

Авторизация
*
*
Регистрация
*
*
*
Согласны с условиями сайта?
Генерация пароля