Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности Нацпроекты в РДПамятные датыТеатры и кино"Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИ БАННЕРЫ Наши партнерыНаши спонсорыСотрудникиАвторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)

Бахтиярны гьюрметин этдилер

Бахтиярны гьюрметин этдилер



        Эсигизде бар буса, 2008-нчи йыл Китайда Пекин шагьарда оьтгерилген Олимпия оюнларында Бахтияр Агьматов Уьзбекистан саялы ябушагъан Артур Таймазов булан финалда тутушуп ябушду. Шонда тёре гесивчюлер (судьялар) алдынлыкъны Таймазовгъа бергенлик шекликлер тувдура эди. Бахтияр ва ону айтылгъан тренери Иманмурза Алиев бу ишге оьзлер бютюнлей рази тюгюл экенни бир тюгюл, кёп керенлер билдирдилер.


Артда нечик алай да, узакъдан буса да, герти ялгъанны утду. Айтагъаным, допингге къаршы турагъан Бютюндюнья комиссиясы хас кюйде тергевлер этип къарагъан сонг, Таймазовну къанында, санлардагъы гючню артдырагъан дарманны югъу бар экенни мекенли токъташдыргъан. Шогъар асасланып, Олимпия оюнланы халкъара комитети Артурну чемпионлукъ атын чыгъарып алмагъа гьукму гесди. Шолайлыкъда, Олимпия медаль Бахтияргъа тийишли болуп токътады. Шо тюз де дюр.


Къысгъача айтгъанда, 2018-нчи йыл декабр айда МОК-ну члени Шамил Тарпищев, Россияны Олимпия комитетини президенти Станислав Пюздняк Москвада Б.Агьматовгъа Олимпия оюнланы алтын медалын тапшурду. Демек, савгъат ­оьзюню гьалал есин тапды. Бу иш савлай Дагъыстан жамиятын къувандырды. Ону гьюрметине уллу жыйынлар да болду.


Сентябрни ахырынчы гюнлерини биринде Бахтияр Агьматовгъа аталгъан гезикли уллу байрам чаралар Буйнакскиде де оьтгерилди. Шагьарны баш майданына кёп халкъ жыйылгъан эди. Гелген къонакъланы арасында Дагъыстанны баш гьакимини Центральный территория округуна къарайгъан вакили А.Къарчыгъаев, респуб­ликаны спортгъа ва физкультурагъа къарайгъан министрини заместители З.Салавутдинов, Олимпия оюнланы чемпиону М-Гь.Абушев, Олимпия оюнларда гюмюш медаль къазангъан М-Х.Арацилов, оьзю чемпионну тренери И.Алиев, белгили кочаплар Къ.Къурамагьамматов, А.Гьадисов, М.Ибрагьимов, Н.Исрапилов, И.Бекболатов ва дагъы да кёп ёлдашлар бар эди.


Оьзюню гиришив сёзюнде Буйнакск шагьарны баш гьакими И.Нургьудаев, бу байрам неге геч оьтгерилегенини себеплерин аян эте туруп, сувукълардан сонг къарарбыз деп, сонг Рамазан ай гелип ва дагъы да Агьматовланы агьлюсюнде багьана болуп, кёп созулгъанны англатды. Бугюнге багъышланып шагьарны охув ва спорт ожакъларында Бахтияргъа байлавлу кёп тюрлю ишлер, дарслар болгъанын да ол халкъгъа малим этди.


– Бахтияр дюнья оьлчевюнде уьстюнлюк къазангъаныны бизин халкъ учун кёп уллу агьамияты бар. Ол яш наслуну спортгъа иштагьлыгъын бирден-бир артдырды. Бахтияр бизин шагьарда Олимпиаданы биринчи чемпиону да дюр, ондан башгъа да лап авур кочапланы арасында олимпияны алтын медалына ес болгъан дагъыстанлыланы биринчиси де дюр, – деди И.Нургьудаев.


– Барыгъызгъа да, мени шу гюнюмде табылгъаныгъыз саялы, гьакъ юрекден баракалламны айтаман. Оьзюмню ата шагьарымда, ата районумда булай шатлыкъланы башдан гечирегениме мен гьатсыз къуванаман. Магъа ругь береген халкъыма, мен саялы кёп къыйын тёкген тренерлериме теренден разилигимни билдиремен, – деди оьзюню саламат ва къысгъа сёзюнде Бахтияр.


Артда шагьар жы­йыныны председатели Ш.Аташев Бахтияр Агьматовгъа «Буйнакск шагьарны гьюрметли ватандашы» деген шагьатнаманы тапшурду.


Мунда байрам чаралар, йырлар, бийивлер ва йыбав геч болгъунча узатылды.


 

Абдулла Залимханов.



Количество показов: 50
Автор: YOLDASH.news
04.10.2019 19:10
Подписывайтесь на канал yoldash.ru в

Возврат к списку


Добавить комментарий

AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта