Артдагъы йыллар тутушуп ябушув Къаягент районлуланы арасында спортну лап сююмлю журасына айлангъан. Уллулар болсун, гиччилер болсун, тутушуп ябушувну мунда барысы да кёп сюелер. Январны 21-нде Гьюсемегент юртда 14-15 йыллыкъ яшёрюмлени арасында болгъан район ярышлары шону бирдагъы гезик гертиледи.
10 юртдан гелген 100-ден артыкъ яш кочаплар 11 тюрлю авурлукъда сав гюнню узагъында эки халчада усталыгъын гёрсетди. Алдынлыкъны алмакъ учунгъу ярышларда уьстюн гелгенлеге Дагъыстанда, Темиркъазыкъ-Кавказ федерал округда, сонг Россияда, Европада юрюлежек тогъатартывларда ортакъчылыкъ этмеге ёл ачыла эди.
Гюнню экинчи яртысында алдынлылар белгиленди. Оьзлени авурлукъларында Рустам Алиев (Янгывикъри), Магьамматамин Арсланбеков, Солтанбий Солтанов, Нюрсолтан Гьажиагьматов, Гьюсен Идрисов, Магьамматсайит Магьамматов, Сайгит Гьамзаев, Ислам Абдуллаев, Надыр Темирбеков, Магьамматрасул Магьамматрасулов, Надыр Бабушев районну чемпионлары болдулар.
Юртланы жыйым командаларыны арасында биринчи ерге къаягентлилер, экинчи ерге янгывикърилилер, уьчюнчю ерге первомайскоелилер чыкъдылар.
Биринчи ер къазангъан яш кочаплагъа ва командалагъа грамоталар ва кубоклар тапшурулду. Биринчи, экинчи ва уьчюнчю ерлеге ес болгъан спортсменлеге медаллар ва дипломлар берилди. Сонг да, олар Избербаш шагьарда февральны 1-нде оьтгерилежек ярышларда ортакъчылыкъ этмеге путёвкалар къазандылар.
Бугюн Къаягент районну бары да юртларында бир мингге ювукъ охувчу яшлар ва оьрюм яшлар тутушуп ябушув булан машгъул. Олар белгили къаягентли кочаплар Нариман Исрапиловгъа, Ильяс Бекболатовгъа ошамагъа гьаракат этелер. Шо умутлагъа етмек учун олагъа райондагъы спорт школаларда чалышагъан 16 тренер кёмек эте.
