Владимир Васильев: «Имканлыкъланы къоллама герекбиз»



       Алда да билдирилгени йимик, 2019-нчу йылны октябр айыны 16–19-нчу гюнлеринде Магьачкъалада туризмни оьсдюрювге байлавлу болуп 11-нчи Дагъыстан халкъара форумун оьтгерме гёз алгъа тутулгъан эди.



Эсгерилген форум белгиленген болжалыны ичинде республикабызны тахшагьарында «Россия – бизин тарихибиз» деген маданият цент­рында къурумлу кюйде ачылды ва оьз ишин башлады.


Шо гюн «Туризмни оьсдюрювню ёллары ва регион имканлыкълары» деген конгрессде Дагъыстанны Башчысы Владимир Васильев де ортакъчылыкъ этди ва гюнлюк низамгъа салынгъан масъалагъа гёре оьз пикруларын малим этди.


– Дагъыстан оьзтёрече табии байлыкълары, тарихи, дин ва маданият эсделиклери, асруларда сыналгъан яхшы мердешлери, адатлары ва шолагъа аминликде оьмюр сюрме къаст этеген пагьмулу ва рагьмулу адамлары булан белгили, – деп башлады ол оьзюню сёзюн, форумну ортакъчыларын къутлай ва олагъа оьз ишинде уьстюнлюклер ёрай туруп. – Туризмни оьсдюрювде бизге де шолай гёрмекли имканлыкъланы къолламакъ учун къаст этмеге тюшегени гьакъ. Неге десегиз, экономиканы шо тармагъы бизин регионда иш ерлени артдырма ва шону натижасында налогланы гьар тюрлю бюджетлеге тюшеген гелимлерин артдырмагъа имканлыкълар ярата.


Форумну ортакъчылары белгиленген гюнлени ичинде «Легенды Дагестана» деген турист маршрутларда да болажакъ ва шогъар байлавлу оьз пикруларын малим этежек. О гьакъда газетибизни дагъы номеринде генглешдирилген маълумат бермеге умут этиле.

Авторизация
*
*
Регистрация
*
*
*
Согласны с условиями сайта?
Генерация пароля