Муаллимлени мердешли август генгешлеринден


Бугюнлерде бизин республиканы бары да шагьарларында ва районларында янгы охув йылны алдында август айда мердешли кюйде юрюлеген муаллимлени генгешлери оьтдю. Шоланы барышында муаллимлер ерли гьакимлик къурумларыны ёлбашчыларыны ортакъчылыкъ этивю булан билим берив тармакъда артгъа салмай чечмеге тюшеген масъаланы арагъа салып ойлашды. Билим берив тармакъны ишин камиллешдиривню ёлларын белгиледи.



Шолай, Къарабудагъгент районда оьтгерилген муаллимлени генгешинде эсгерилген районну гьакимбашы М. Амиралиев билим берив тармакъны къуллукъчуларыны алдында токътагъан масъалаланы ва яшавгъа чыгъармагъа тюшеген борчланы гьакъында айтды. ДР-ни Башчысыны борчларын заманлыкъгъа кютеген В. Васильев билим берив тармакъны ишин камиллешдиривге аслу тергев берегени гьакъда эсгере туруп, бирикген пачалыкъ экзаменни оьтгеривде йиберилген кемчиликлени гележекде ёлгъа йиберилмеге ярамай­гъаны гьакъда билдирди. Шону булан бирге, охувчуланы охув китаплар булан толу кюйде таъмин этивню ёллары ахтарылагъаны, олай да иш гёрюп турагъан яшлар бавларында къошум шартлар яратмагъа, яшавлукъ уьйлени сатып алып пайдаланывгъа берип де, мактап чагъына етишмеген гиччипавлар тарбияланагъан идаралагъа юрюйгенлени санавун артдырмагъа гёз алгъа тутулагъаны гьакъда айтды. Шо тармакъда иш гёреген идараланы гьаракаты ерли гьакимлик къурумларыны янындан якълав табажагъын ташдырды.



Районну билим берив управлениесини ёлбашчысы Т. Хизриева янгы охув йылда пагьмулу яшлар булан айрыча иш юрютювге агьамият берилмеге тюшегени гьакъда эсгерди. Шондан къайры да, охутув ожакъланы ёлбашчыларыны ва муаллимлени оьзлеге тапшурулгъан касбу борчланы кютювге бакъгъан якъда жаваплыгъын артдырмагъа тюшегени гьакъда билдирди. Инг алда федерал гесимлерин кюте туруп, охувчулагъа сан янлы билим ва къошум билим алывгъа тийишли имканлыкълар яратылмагъа тюшегени гьакъда айтды.



Къаягент районда оьтгерилген муаллимлени генгешинде эсгерилген муниципал къурулувуну гьакимбашы Магьаммат-эмин Гьажиев, оьзге жаваплы къуллукъчулар да ортакъчылыкъ этген. Инг алда районну гьакимбашы бары да жыйылгъанланы етип гелеген янгы охув йыл булан къутлагъан. Шону булан бирге, муаллимлеге оьзлени алдында охуйгъан охувчулагъа артдагъы вакътилерде тармакъда болуп турагъан алмашынывланы гьисапгъа алып, муратгъа къыйышывлу билим ва тарбия беривде уьстюнлюклер ёрагъан.



Шондан сонг Къаягент районну билим берив управлениесини ёлбашчысы М. Рашитов гетген охув йылны гьасиллерин малим эте туруп, гележекде яшавгъа чыкъмагъа тюшеген борчланы гьакъында айтгъан.Эсгерилген районну билим берив тармагъына гиреген идаралары оьзлени чалышывунда ёлгъа йиберилген кемчиликлени ва къолда этмеге болгъан оьрлюклени уьстюнде айрыча токътагъан.



Буйнакск районда эсгерилген муниципал къурулувуну ёлбашчысы К. Изиев муаллимлени генгешин ача туруп, яш наслуну охутувда ва олагъа муратгъа къыйышывлу тарбия ва билим берив тармагъыны гьаракатыны агьамиятлыгъы гьакъда айтгъан. Ол оьзюню сёйлевюнде янгы охув йылны алдында билим берив ожакъланы биналарында янгыртыв-ярашдырыв ишлени юрютмек учун къастлыгъын гёрсетген ёлбашчыларына разилигин билдирген. Билим берив ожакълар ерли гьакимлик къурумларыны янындан гележекде де гьар не якъдан да якълав табажагъына жыйылгъанланы инандыргъан.



Шондан сонг, гетген охув йылда билим берив ожакълар етишген оьрлюк­лени ва алда токътагъан борчланы гьакъында Буйнакск районну билим берив управлениесини ёлбашчысы Аида Залимханова оьзюню сёйлевюнде баянлыкъ берген. Шо гьакъда Буйнакск районну администрациясыны прес-къуллугъу билдире.



Бабаюрт районну администрациясыны прес-къуллугъу билдирегенге гёре, эсгерилген муниципал къурулувуну гьакимбашы Э.Къарагишиев муаллимлени гьаракатына оьр къыймат берип сёйлеген. Охувчу яшлар гьар тюрлю къаравларда етишеген оьрлюклер муаллимлени гьаракатыны асувлугъун исбатлайгъанын ташдыргъан. Янгы охув йылда яшланы къабул этмек учун бары да охутув ожакъланы биналары толу кюйде гьазир экенин разилик булан билдирген.



Оьз гезигинде Бабаюрт районну билим берив управлениесини ёлбашчысы А. Девеев 2017-2018-нчи охув йылда охутув ожакълар мекенли оьрлюклеге етишмеге болгъанын сёйлевюнде гелтирген далиллер булан гертилеген.



Муаллимлени мердешли август генгешлери оьзге районларда да оьтгерилген. Шоланы барышында гьар гюнлюк жанлы гьаракатыны натижасында айрыча оьрлюклеге етишген билим берив тармакъны къуллукъчуларына оьзлер республиканы ва уьлкени оьлчевюндеги оьр атлагъа лайыкълы болгъаныны гьакъындагъы белгилер, олай да гьюрметлев грамоталар ва акъча савгъатлар тапшурулгъан. Торайып гелеген яш наслугъа билим беривню ва тарбиялавну сан янын камиллешдиривге байлавлу хас къарарлар къабул этилген.



Авторизация
*
*
Регистрация
*
*
*
Согласны с условиями сайта?
Генерация пароля