Сетевое издание «ЁЛДАШ» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности Нацпроекты в РДПамятные датыТеатры и кино"Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИ БАННЕРЫ Наши партнерыНаши спонсорыСотрудникиАвторыАфишаГалереяРекламаЮбилейный номер
Сетевое издание «Ёлдаш» (Спутник)

Ишлер яман бармай

Ишлер яман бармай



       Артдагъы заманлар гьар тюрлю агьамияты булангъы ёлланы онгарывгъа къолай тергев берилмеге башлагъан. Рес­публиканы хыйлы мезгиллеге узатылгъан ёллары, узакъ йыллар къаравсуз къалып, бек къолайсыз гьалгъа тары­гъанны къайсыбыз да гёргенбиз. Ёллар яман буса, юрюшню низамы адамшавлу сакъланмайгъаны, ёлларда хатабалагьлар да кёп болма имканлы экени, машинлер айлангъан сайын бузулагъаны ачыкъ. Янгыз шагьарлардагъы ёлланы балкъытып къойгъан учун битмей чи, районара агьамияты булангъы «таш» ёлланы да заман-заман ярашдырып, арив этип онгармаса, халкъны гьакимлеге этеген айыплары аз болмас.


Муна, шо кюйде къаравсуз къалып, тюзден тавгъа узалгъан уллу ёлну, айрокъда Бугленден башлап, Къадар бойгъа етгенчеге аралыгъында машинлени гьайдама болар чакъы гьал къалмагъан эди. Дюр, ёлланы бузукълугъу районланы экономика гьалына тувра зарал этегенден къайры, адамланы да къуру къабундурагъаны белгили. Яман ёллар саялы ону-муну ташыйгъан машинлени есилери шо къолайсыз ерлеге некъадар къайтара бармасны амалын этелер. Бу ёл булан тав бойгъа аз юклер ташылмай чы.


Гьали, гёресиз, Дагъыстанда туризмни тюрлендирме, шону булан экономикагъа яратылагъан къазанчланы къадарын артдырагъан кюйню этмеге тарыкъ деп кёп сёйлене. Туристлер арив ерлеге барып гезесин, ял алсын учун инг алдын ёлланы арив этип онгарма герек бола.


Шону гьакълыгъын англагъан буса ярай, Буйнакскиден тав якъгъа барагъан ёлланы тегишлеп, генглешдирип, алай арив этме башлагъанлар. Уллу ёлну Бугленге етишгенчеги гесеги аз заманны ичинде «шагьра ёл» йимик бола бара. Бу узун ёлну савлай «Волчьи воротагъа» ерли 2 йылны ичинде асфальт тутуп онгаражакъ деген хабар бар.


Бу ёлну онгарыв ишлерин «Нарт» деген къурулуш фирманы ёлчулары кюте. Оланы гьаракаты гьалиге яман гёрюнмей.


Шону булан бирге энни районну ичиндеги ёллар да алда бир де болма­гъан кюйде онгарылып тура. Юртланы хыйлыларында бир-бир ёллагъа асфальт салынгъан, бир-бирлери чакъа тёгюлюп тегишленген.


Бугюнлерде буса Бугленни ичиндеги аслу 2–3 ёлгъа асфальт тутмакъ учун гьазирлик ишлер къызгъын кюйде юрюле. Мундагъы ёл къурув ишлени «Дагсельпромстрой» деген онгача идара юрюте.


– Биз юртну ичиндеги орта ёлну экисинден бирине асфальт тутмагъа бир-эки гюн къалсакъ ярай. Янгы техника ишлени чалт ва сан янлы этип кютмеге имканлыкъ бере. Асфальтны, узакъ барсын учун, яхшы къалын этип, эки къат этип салабыз, таптап сыгъал йимик онгарабыз, – дей эсгерилген идараны участкасыны башын тутгъан улан Жамболат Гьамзатов.


Шулай этиле барса, бир йырда айтылагъандай, юртлагъа «...шагьардан неси башгъа» деп айтмагъа ярайгъан болур, Аллагь буюрса.


Бу ерде булай бир затны эсгермекни оравлу гёремен. Айтагъаным, Дагъыс­танны Халкъ Жыйыныны Председатели Хизри Шихсайитов Буйнакскини ичинден, районну юртларыны орамларындан яяв юрюп бары затгъа тергев берип къарай­гъанны оьз гёзлерибиз булан нечесе керенлер гёргенбиз. Ону ёл гёрсетивю, талабы ва кёмеклери булан шагьарланы ва юртланы ичи булан тышын арив этип онгарывну ёлунда айрокъда арт заманлар гёрмекли ишлер кёп этилип тура.


 

А. БУГЛЕНЛИ.



Количество показов: 64
Автор: YOLDASH.news
25.10.2019 14:00
Подписывайтесь на канал yoldash.ru в

Возврат к списку


Добавить комментарий

AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта