Къазан булан байлавлукълар юрютежеклер

    


Пятница, 30.03.2018г. — «ЁЛДАШ».



Алдагъы гюнлерде Дагъыстан пачалыкъ медицина университетни ректору Сулейман Маммаев ва Къазан федерал университетни генетика кафедрасыны доценти Айрат Каюмов булан ёлукъду. Шонда олар эки де оьр охув ожакъны арасында илму аралыкъланы беклешдирмек муратда дыгъар байладылар.


 


Сулейман Маммаев Айрат Каюмовгъа биздеги университетде яшавгъа чыгъа­гъан аслу илму агъымланы гьа­къында хабарлай туруп, булай билдирди:



–Генетика якъдан Дагъыстан – оьзтёрече регион. Бизин республиканы бир-бир районларындан Чилле Ёл оьте болгъан. Бизде шо Чилле Ёлну заманындагъы аврувлар ёлугъа. Мисал учун, сийрек болагъан Бехчета ва башгъалары. Аз къаршылашагъан аврувлар, гемоглобинопатий. Генетика учун мунда оьтесиз эркин кюйде иш гёрме имканлыкълар бар. Биз илмугъа жагьиллени къуршагъанбыз, кёп иш этилип де тура. Бизин вакиллерибиз гьар тюрлю халкъара ва бютюнроссия оьлчевлерде оьтгерилеген форумларда ортакъчылыкъ этелер. Бираз алларда Москвадагъы И. Сеченовну атындагъы биринчи пачалыкъ медицина университетде «Вузовская наука. Инновации» деп болгъан форумда бизин университет арза бергенлени санавуна гёре алдынлы 5 оьр охув ожакъны арасына гирген. Биз уллу охув ожакълар булан байлавлукъ тутма сюебиз. Шолай да, сизин булан да,–деди С. Маммаев.



Айрат Каюмов Фундаментальный медицина институтда ва Къазандагъы федерал университетни биология кафед­расында яш наслуну илмугъа тартмакъ учун иш нечик юрюлегенни гьакъында   хабарлады:



–Бизде бары да илму группалар гюнбатыш уьлгюлеге гёре къурулгъан. Бугюнлерде университетибизде 2 минг жагьил къуллукъчу бар. Яшёрюмлер къасткъылып илмугъа тергев этелер. Неге тюгюл, ат къазангъан чалышывчулардан эсе, яш наслуну грантлар алмагъа имканлыкълары артыкъ. Гьали илмугъа байлавлу конкурслар да кёп бола,–деди ол.



А. Каюмовну сёзлерине гёре Къазандагъы федерал университетни харж-техника базасы да яман тюгюл. Коллективлер булан пайдаланма болагъан бир нече уллу центрлары да бар. Олай да, протеомный ва геномный ахтарывлар юрютмек учун гьалиги ясандырывлар булан таъмин этилген междисциплинарный центр да бар.



–Шо бизге генетика булан байлавлу бары да ишлени оьтгермеге имканлыкъ бере, – деди А. Каюмов.



Ёлугъувну вакътисинде эки де оьр охув ожакъ бирликде генетика ахтарывлар этме тийишли шартлар барны, илмуну не йимик бёлюклерине тергев берме герекни, олай да Дагъыстанны жагьил медиклери Къазан федерал университетге стажировкагъа барма болагъанны гьакъында арагъа салып гьакълашдылар.



Тюзю, бу ёлугъув Дагъыстанда оьтгерилеген жагьил алимлени «Единство» деген Бютюнроссия илму-билим форумуну дазуларында болду. Шо ёлугъувда ДГМУ-ну илмугъа къарайгъан проректору Найида Моллаева, грант ва инновация бёлюгюню начальниги Найида Абдуллаева да бар эди.



Авторизация
*
*
Регистрация
*
*
*
Согласны с условиями сайта?
Генерация пароля