Владимир Васильев пачалыкъ савгъатлар тапшургъан


Дагъыстан Республиканы Башчысы Владимир Васильев Янгы йылны алдында республикада яшайгъанлагъа регионну оьсювю учун этген къошуму саялы пачалыкъ савгъатлар тапшургъан. Онда тюрлю-тюрлю тармакъларда ишлейгенлер: юрт хозяйствода, промышленностда, медицинада, илмуда, билим беривде, маданиятда, жамият, пачалыкъ ва муниципал къуллукъларда чалышагъанлар болгъан.



Шатлы генгешни ача туруп, Владимир Васильев жыйылгъанланы етип гелеген Янгы йыл булан къутлагъан, олагъа юреклерине тутгъан бары да муратларына етмекни ёрагъан.



– Бугюн биз мердешленген кюйде бу залда оьзлер ишлейген тармакъда етишген натижалары булан гьайран этеген адамланы къаршылайбыз, – деген ол. Республиканы Башчысы эки адамны айрыча атларын эсгерген. Кёп адамлар яшайгъан уьйню бешинчи къабатындан йыгъылгъан къызны ерге тюшме къоймай тутгъанланы атларын айтгъан. Олар экиси де «Дагъыстан Республиканы алдында этген къуллукълары учун» деген орденлер булан савгъатлангъан.



Олай да, Владимир Васильев муаллимлени къуллугъун да эсгерген. – Кёп алдан берли адамны гьаракатын билим берив иш белгилей. Билимни яшлагъа береген муаллимлер кёп болгъан чакъы, яшавда яшама яхшы шартлар да тувулуна. Олагъа о саялы уллу баракалла, – деген ол.



Дагъыстанны Башчысы медицина къуллукъчуланы, юрт загьматны къуллукъчуларын, промышленный предприятиелени къуллукъчуларын айрыча эсгерген. Дагъыстанны художниклери етишген оьрлюклени гьакъында да айтгъан. Олагъа ошагъан яш художниклер янгыз Дагъыстанда тюгюл, Россияны башгъа регионларында да белгили.



Ол къатынланы жамият арадагъы ишини гьакъында айта туруп, уьй хозяйство оланы уьстюне салынгъанын эсгерген. Гьар не яшав да, сюйсе шагьар яшав болсун, сюйсе юрт яшав болсун, къатынларсыз-аналарсыз болмайгъанны гьакъында айтгъан.



«Кёп яшлы ана» деген орден булан Дербент районну Белижи юртунда яшайгъан Магизат Абасова савгъатлангъан. «Дагъыстан Республиканы экономика оьсювю учун» деген медаль Буйнакск шагьарны «Мущарака» заводунда ишлейген Закир Басриевге берилген.



Маданиятны умуми Россия проф­союзуну къуллукъчусу Марзижат Бутаева ва тракторист Али Агьматов «Къайратлы загьматы учун» деген медаллар булан савгъатлангъан.



Агьвалатны оьлчевюнде Дагъыстан Республиканы «Ана топурагъына сюювю учун» деген атлары да берилген.



Владимир Васильев жыйылгъанланы дагъы да Россияны ва Дагъыстанны тюрленивюне олар этген загьматы учун къутлагъан.


 

Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля