Владимир Васильев: «Далапчылыкъ учун онгайлы шартлар яратмакъ –гьакимликни масъаласы»


Пятница, 08.06.2018г. - "ЁЛДАШ".


Дагъыстанны Башчысыны борчларын заманлыкъгъа кютеген Владимир Васильев июн айны 6-сында далапчылыкъ бирлешивню вакиллери ва республиканы тергев къурумлары булан ёлукъгъан.

 



Гьакълашывну алдында Владимир Васильев республикада гьакимликни борчу далапчылар учун онгайлы шартлар яратмакъ деген ёрукъда сёйлеген. «Биз ону сакълама сюе бусакъ, далапчылыкъ таза ва ачыкъ болма тюше. Гьар адам оьзюню ихтиярларын билме герек. Олар бузула буса, оланы гьакъында ачыкъдан айтма герек бола, биз буса шо тармакъ тюрленсин ва оланы налогларын артдырмакъ учун бары да имканлыкъланы къоллама борчлубуз», – деген.



Республиканы Башчысы дагъы да булай айтгъан: «Ишлерибиз алгъа барса, бизге де яхшы. Амма биз авур налогну, законсуз ишлени яны тюгюлбюз.



Бары да адамлагъа ишлеме имканлыкъ беребиз. Бары да дагъыстанлылар – Россияны ватандашлары. Мен оьзюмню де дагъыс­танлы гьисап этемен. Дагъыс­танны халкъына намусума гёре къуллукъ этме сюемен. Гелигиз, халкъыбыз учун ишлейик», – деп, ол далапчылагъа чакъырыв этген.



Республиканы ёлбашчысы законсуз къурулушгъа да тергев берген. Ону сёзлерине гёре, Магьачкъалада 300-ге ювукъ уьй законсуз къурула. «Гьали суд адамлар яшайгъан 30 объектни бузуп тайдырма герек деген къарар чыгъаргъан. Суд приставлар буссагьат шо иш булан машгъул. Гьал яхшы тюгюл. Къурулушланы сан яны онда яшайгъанланы балагьгъа тарытма бола. Бизин яшлар яхшы шартларда яшагъанны сюе бусакъ, бизге намуслу кюйде, законгъа гёре ишлеме тарыкъ», – деген ёлбашчы.



В. Васильев тергев къурумланы иши де натижалы болгъанны сюе. «Тергевлер натижалы болма герек, айрокъда ишни янгы башлайгъанлар учун», – деген ол.



ДР-ни экономика министри Осман Хасболатов къоду салмай тергемекни яны.



Законсуз ишлер ёлукъгъанда олар дагъы такрарланмайгъан кюйню этме герек деген ёрукъда сёйлеген. «Далапчылар оьзлени ихтиярларын билсин учун, экономика министерлиги регионну тергейген къурумлар булан бирче аслу талапланы къурма ва далапчылар булан бир тилде сёйлеме герек бола», – деп айтгъан ол.



Регионну далапчыларыны ихтиярларын якълап, далапчы Мурат Далгьатов да сёйлеген. Пачалыкъны да, далапчыны да арасында иштагьлыкъ, инамлыкъ тувдура­гъан себеп болма тарыкъ, оьчлюк, ачувлукъ болма тарыкъ тюгюл деп ойлай ол. Оьзюню айтывуна мисал гьисапда пачалыкъны да, далапчылыкъны да арасында инамлыкъ болма герекни гьакъында айтгъан.



ДР-ни Башчысы далапчыланы вакиллерин охутувну шартларын да ахтаргъан ва якълажакъгъа сёз берген. «Шо иш булан оьзлени чалышывунда бары да къурумлар пайдаланма герек, неге десе, о гьакимликни ва далапчылыкъны арасында инамлыкъ тувдура», – деген М.Далгьатов. Ол дагъы да далапчыны жамиятны гёзюне маъналы этип гёрсетмекни яны.



Дагъыстанны прокуроруну борчларын заманлыкъгъа кютеген Изет Гьажиев: «Далапчыланы ихтиярларын якълав масъалагъа республикада тергев бериле. 2017-нчи йылда гёз алгъа тутулгъан 15 минг тергевню 9 минги яшавгъа чыкъгъан», – деген.



Гьакимлик ва далапчылыкъ вакиллени арасында ёрукълу сёйлешивлер болгъан. Далапчылар агьамиятлы ва бугюнге тарыкълы масъалаланы гётерген.



Масъаланы арагъа салып ойлашывда ДР-ни Гьукуматыны Председатели Артём Здунов, ДР-ни Башчысыны ва Гьукуматыны Администрациясыны ёлбашчысы Владимир Иванов, Дагъыстанны Халкъ Жыйыныны вице-спикери Елена Ельникова, регионну гьакимлик къурумларыны ёлбашчылары, республиканы далапчы къурумларыны вакиллери ортакъчылыкъ этген.



 


Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля