Асгер къуллукъчуланы – интернационалистлени паркы ачылгъан


Январ айны 16-сында Магьачкъалада янгыртылгъан сонг асгер къуллукъчуланы-интернационалистлени паркы ачылгъан. О агьвалатны ортакъчылары гьисапда шагьарны башчысыны борчларын заманлыкъгъа кютеген Мурат Алиев, Пачалыкъ аманлыкъ комитетни генерал-майору Омар Муртазалиев, ДР-ни военкоматыны Магьачкъала шагьаргъа къарайгъан запасдагъы полковниги Муртуз Идрисов, жамият чалышывчулар ва башгъалар болгъан.



Мурат Алиев айтгъан кюйде, парк янгыртылгъан сонг, ону территориясына ес болма сюегенлер кёп болгъан. «Биз шагьарны юзюн алышдырмакъ учун оьзюбюзню ихтиярларыбызны якъладыкъ. Республиканы Башчысы Владимир Васильевни якълаву булан шагьар администрация кёп иш этди. «Шагьарда толу онгайлыкълар болдурмакъ» деген программаны яшавгъа чыгъара туруп, 23 абзар-территория ва 5 жамият ер яхшылашдырылды. Гьали онда уллулар да, яшлар да бош заманын оьтгерме болалар», – деп билдирген Мурат Алиев.



Янгыртыв ишлени вакътисинде 37 панар къурукъ салынгъан, 15 скамейка ва чёп ташлайгъан ерлер этилген, яшлар ойнайгъан майданлар яхшылашдырылгъан, 4 минг квадрат метрге плитка тутулгъан. Олай да, паркгъа гиреген ер де этилген. Олардан къайры да, шагьарны яшыллыкъ болдурагъан хозяйствосу къарт тереклени гесип, янгы тереклер салгъан, гюллеге ерлер, топуракъ ишлер этген.



«Паркны тюсю алышынды – 1979–1989-нчу йылларда Афгъанистанда оьлген солдатланы суратлары илинди. Олай да, паркда ташдан этилген сув чыгъагъан ер ишленди. «Шагьарда толу онгайлыкълар болдурмакъ» деген проект 5 йылгъа гёз алгъа тутулгъанны да эсигизге саламан. О ишлер 2017-нчи йыл, 17-нчи ноябр­де башлангъан. 2022-нчи йылгъа яшавгъа чыкъма герек. Шо проектни яшавгъа чыгъармакъны мурады – бары да Россияны территориясында, шагьарларда онгайлыкълар болдурмакъ», – деген М.Алиев.



Бизин маълумат.



Авторизация
*
*
Регистрация
*
*
*
Согласны с условиями сайта?
Генерация пароля