Алимлени касбу байрамы


   Бугюн, февраль айны 8-нде, йылдан-йылгъа мердешленип гелегени йимик, Россияны илмусуну гюню белгилене. Шо гюн, оьзюню бир де дазусу болмай­гъан илмуну теренине тюшюнюп, ону ахтарыв булан машгъул болагъан бары да алимлени касбу байрамы гьисаплана.



Бизин уьлкеде белгиленеген кёбюсю касбу байрамлар йимик, Россияны илмусуну гюню де агьамиятлы тарихи агьвалат булан байлавлу этилип, Россияны Президентини къарары булан 1999-нчу йылда токъташдырылгъан. Ачыкълашдырып айтгъанда, шо гюн 295 йыл алъякъда, демек, 1724-нчю йылны февраль айыны 8-нде I Пётр къол салгъан къараргъа гёре Россияны Илмулар академиясы къурулгъан.



Алимлени касбу байрамын токъташдырып, оланы гьаракатына лап оьр даражада шулай тергев берилегени, биз ойлашагъан кюйде, негьакъ тюгюл. Неге десегиз, алимлер илмуну имканлыкъларындан пайдаланып, бугюнню гьисапгъа алып, тангаланы гёз алгъа тутуп чалыша. Гьар тюрлю тармакъларда гележекде пайдалы болар йимик янгылыкъланы ярата. Шолайлыкъда, оьзлени жанлы гьаракатыны натижасында айланасында яшайгъан адамлагъа пайда гелтире.



Гьакъылдан уллу байлыкъ да, илмудан уллу хазна да ёкъдур дегенлей, бизин халкъ да шогъар тезден берли тюшюнген. Илмулу, билимли адамгъа гьар къачан да абур-сый этилип гелген. Шо гьакъда айтгъанда, шу ерде оьзлер оьмюр сюрген девюрню алдынлылары гьисапда бизин халкъны арасындан чыкъгъан ярыкъландырывчулардан башлап, бугюнлеге ерли етишгенчеге макътавгъа лайыкълы нечесе алимни атын да айтмагъа бажарыла.



Тек юрюлеген илму ахтарывлардан дестине гьасиллер чыгъа­рып, шолар булан шоссагьат пайдаланып болмай­гъаны анг­лашыла. Неге тюгюл де, илмуну «тереги» тер булан сугъарылып гелген. Бир тюрлю натижалагъа етишгинчеге, ону уьстюнде кёп ва къаныгъывлу кюйде ишлемеге тюше. Шогъар да къарамайлы, Россияны Илмулар академиясыны Да­гъыстан илму центрында, оьр ва орта хас охув ожакъларда ругьдан тюшмейген гьалда чалышагъан бары да алимлени оьзлени касбу байрамы булан къутлап, олагъа яхшы савлукъ, чыдамлыкъ, уллу оьрлюк­лер ёрайбыз. Артдагъы вакътилерде пачалыкъны янындан илму ахтарывлагъа янашыв алышынгъаныны яхшылыгъындан тувулунагъан онгайлыкълар да шо оьрлюклеге алимлеге ёл ачажа­гъына инанып да къалабыз.



Авторизация
*
*
Регистрация
*
*
*
Согласны с условиями сайта?
Генерация пароля