Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности Нацпроекты в РДПамятные датыТеатры и кино"Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИ БАННЕРЫ Наши партнерыНаши спонсорыСотрудникиАвторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)

Юртну маданият яшавун жанландыра

Юртну маданият яшавун жанландыра



          Маданият тармакъда ишлейгенлер дюньягъа оьзтёрече къараву булангъылар деп эсиме геле. Оьтген гюнлерде мен шолай маданият къуллукъчу булан ювукъдан таныш болдум.


Ума Салевовна Нурлубаева – Гьасанай юртдагъы клубну ёлбашчысы. Юрт клубну ёлбашчысыны иши юртлуланы гьар гюнлюк тергевюню тюбюнде. Ума оьзюне тапшурулгъан ишге тындырыкълы ва мекенли янаша. Гьасанай юртда клубну барлыгъы мундагъы жамият ва маданият яшавну жанландыра. Шогъар да клубну ёлбашчысы Ума Нурлубаева болушлукъ эте. Ол маданият тармакъда чалышагъанлы 33 йыл бола.


Ума 1965-нчи йыл Бабаюрт районну Геметёбе юртунда тувгъан. Ата юртундагъы 8 йыллыкъ школаны битдирип, охувун Тамазатёбе юртдагъы орта школада узата. 1982-нчи йыл школаны тамамлап, Магьачкъала шагьардагъы Дагъыстан маданият-ярыкъландырывчу училищеге охума тюше.


Бу охув ожакъны Ума негьакъ танг­ламай. Гиччиден ол юртгъа гелеген Къумукъ театрны артистлерини оюнуна сукъланып, олардан ругь ала болгъан. Гьар заман яйда театр спектакль алып гележек деп чыдамсыз къаравуллай. Оьзю де Тамазатёбе орта школада драма кружокгъа къуршала. Ол кружокну актив ортакъчысы гьисапда школада салынагъан пьесаларда биринчилей болуп, «Ай­гъази» деген пьесада Гюлкъызны келпетин яратгъан. Школаны сагьнасында Ума бийив ва йыр-сарын булан да шо йылларда арагъа чыкъгъан.


1986-нчы йыл Ума училищени битдирип, оьзю сююп танглагъан касбугъа ес болуп, районгъа къайта. Районну маданият бёлюгюнде методист болуп касбу ёлун башлай. Бабаюртда Амир Къурбановну атындагъы халкъ театр иш гёре. Шо йылларда халкъ театр салгъан пьесаларда тюрлю-тюрлю келпетлер яратып, районну юртларында ва ону тышында спектакллер гёрсете.


1987-нчи йыл Уманы яшавунда шатлы агьвалат бола. Шо йыл ол гьасанайлы Руслан Исаев деген улан булан татывлу ожакъ къура. 1988-нчи йыл Уманы Гьасанай юртдагъы клубну ёлбашчысы этип белгилей.


О йылларда юрт клублар маданиятны шатлы ожагъы болгъан. Ахшамлар уллулар да, жагьиллер де, яшлар да ­жыйылагъан ер. Мунда кружоклар иш гёре, концертлер, театрлар, гьар тюрлю шат агьвалатлар юрюле, кинолар гёрсетиле. Дейгеним, маданият яшавну жанланыву гьар гюн гьис этиле.


Ума Нурулбаева театргъа ва сагьнагъа бакъгъан сюювюне тот басма къоймай. Ол сагьнагъа пьесалар сала. Чебер коллективни актив ортакъчылары Укуш Магьамматова, Бике Ибрагьимова, Шамил Насиров, Гьимбат Магьамматов, Бике Зулпукарова ва Къураш Кулаев сагьнада эсде къалагъан келпетлер ярата. Юртлу артистлер гьасанайлыланы разилигин ва гючлю харс урувларын тезден къазангъан. Олар артда гёрсетген пьеса –«Якъут къашлы билезик». Бу пьесаны автору – Агьматхан Абу-Бакар.


Ума оьзюне тапшурулгъан ишни мекенли этип уьйренген. Шо саялы да ону ишлери даим де алгъа бара. Бойнуна алгъан борчгъа уьстденсув янашма тюшмейгенин яхшы билеген Уманы юртлулары да ва иш ёлдашлары да абурлай ва сыйлай. Халкъ арада абур къазанмагъа буса тынч тюгюл. Айрокъда юрт ерде гьар адам къолуну аясында йимик гёрюне.


Ума Нурлубаева – ишине берилген, касбусуна гьашыкъ, пагьмулу маданият къуллукъчу. Ону ишиндеги гьаракаты ва усталыгъы жавапсыз къалма­гъан. Ол кёп санавдагъы гьюрметлев грамоталар, дипломлар ва баракалла кагъызлар алып ишлеген. Ума ва ону чебер коллективини ортакъчылары гьар байрам чараларда, конкурсларда, ярышларда, гёрюнюшлерде ва фестивалларда мекенли гьазирленип, савгъатлар алып ва алдынлы ерлеге ес болуп къайта. Ол фольклор кружокгъа юрюйген яшланы гьазирлеп, олагъа конкурсларда ортакъчылыкъ этмеге шартлар да ярата. «Мени Дагъыстаным» деген конкурсда гьасанайлы яшлар чебер кюйде шиърулар охуп, дипломлагъа ес болуп къайтгъан. Олай дагъы да мисаллар гелтирип болабыз.


Уманы яшав ёлдашы Руслан кёп йыллар маданият къуллукъчу болуп ишлеген. Бабаюртда «Тюзню сеси» деген эргишилени хорунда да йырлагъан. Йыргъа-сарынгъа пагьмусу бар улан. Шолай эки пагьму бир къалкъыны тюбюнде татывлу ва берекетли ожакъ къургъан. Олар бир улан ва эки къызны оьсдюрген. Оланы тюз тарбиялап, шагьра ёлгъа салгъан.


Бу йыл бизин уьлкеде Театрны йылы деп белгиленген. Ума огъар бек шат. Бизин гьар юртубузда маданият ожакъланы очагъын сёндюрме къоймай­гъан Ума йимик ишине берилген къуллукъчулар кёп болсун.


 

Бэлла Гьажигелдиева, Россия Федерацияны журналистлерини союзуну члени.

Суратда: Ума Нурлубаева

къызы булан.



Количество показов: 150
Автор: YOLDASH.news
31.05.2019 17:20
Подписывайтесь на канал yoldash.ru в

Возврат к списку


Добавить комментарий









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта