Яшлар баву ачылды

Кёп яшлы уьягьлюлени санаву да юрекни сююндюре: Бабаюрт районда 1 минг 600-ге ювукъ агьлюде кёп яшлар тарбиялана. Оланы 5 мингден де къолайы буса – 5 йылгъа етишмеген гиччипавлар. Яшланы яшлар бавлар булан таъмин этмек – районда четим масъала санала.

Оьзгесин айтмагъанда да, бугюн районну 22 юрт муниципал къурулувларыны янгыз 7-синде яшлар баву барын ва олагъа 740 гиччипав юрюйгенни эсгерсем де, районда яшлар бавлары булан тувгъан гьалны суратламагъа къыйын болмас деп эсиме геле. Сонг да, йылдан-йылгъа школа чагъына етишмеген яшланы санаву артып тербейгенни де гьисапгъа алса, райондагъы шо гьал къыйын ерге чыгъып барагъанны  исбатлай.

Шо масъаланы чечмек учун районну башын тутгъанлар къаст этип де айланалар. Адил Янгыюртда, Люксембургда ва Тотаюртда къурулмагъа герек яшлар бавлары республика бюджетине гийирилген. Амма шогъар да къарамай, оьз гючю булан гиччипавлагъа ва оланы ата-аналарына савгъат гьисапда яшлар бавун къурагъанлар да ёкъ тюгюл. Районну Геметёбе юртунда гьали-гьалилерде ачылгъан «Къарчыгъа» деген яшлар баву да шогъар шагьат. 60 яшгъа гьисап этилген яшлар баву толу кюйде рагьмулу адамланы кёмеги ва юртну башы Камил Гьажимусаевни гьаракаты булан алдын ерлиги совхозну яшлар бавуну бинасыны еринде янгыртылгъан.

Яшырмагъа негер тарыкъ, шо савлай геметёбелилер учун да уллу савгъат болуп токътады. Буса да 60 яш учун гьисап этилген яшлар баву юртну талапларын толу кюйде чечмей.

– Бугюн юртда школа чагъына етишмеген яшланы санаву 80-ге етише дей, – Геметёбе юртну башы Камил Гьажимусаев. – Озокъда, яшлар баву юртну жамият масъа­лаларын чечивге хыйлы кёмек этгенни яшырмагъа тюшмей. Янгы иш ерлер ачмакъ, школа чагъына етишмеген яшланы барын да яшлар бавуна къуршамакъ булан хыйлы масъаланы чечмеге бола. Шо рагьмулу иш, «Каспийгазпром – Трансгаз Магьачкъала» деген жамиятны башы Керим Гьюсейновну кёмеги тиймеген буса, яшавгъа чыгъып да битмес эди.  Огъар савлай Геметёбе юртну жамаатыны атындан разилик билдирмеге сюемен.

Яшлар бавуну ачылыву Геметёбеде, гертилей де, уллу байрамгъа айлангъанны эсгермеге сюемен. Геметёбелилени байрамында ортакъчылыкъ этген «Бабаюрт район» деген муниципал къурулувуну администрациясыны ёлбашчысы Ж.Шайыбов жыйылгъанланы алдында сёйлей туруп, район учун жамият масъаланы чечив гьаман да байрам болгъанны эсгерди.

– Бугюн янгыз геметёбелилени байрамы тюгюл, савлай районну байрамы, – деди Ж.Шайыбов. – Бизин учун лап да уллу шатлыкъ – яшланы бетиндеги сююнч. Яшлар гьаман да шат болсун учун, оланы бетинден иржайыв таймасын учун,  гележекде де хыйлы ишлер этилмеге герек. Яшлар – бизин гележегибиз. Шо гележек ярыкъ болсун учун, биз бугюнден тутуп яшланы гьайын этмеге, оланы тарбиясына ва билим алывуна тергев бермеге герекбиз. Шо ишлер яшлар бавунда къурумлу юрюлежекге шеклик этмеймен.

Шо гюн сав гюнню узагъында яшлар бавуну абзары жанлы эди. Айлананы яшланы кюлкю авазлары къуршады. Байрам гюн савгъатсыз болмайгъангъа гёре, пенсия фондуну Бабаюрт райондагъы бёлгюню ёлбашчысы А.Магьамматов, район администрацияны финанс управлениесини ёлбашчысы А.Чопалавова ва Бабаюртдагъы «Орлёнок» деген гимназияны ёлбашчысы С.Гьюсеева яшлар бавуна багьалы савгъатлар да тапшурдулар.

Озокъда, шолай байрамланы районну бары да юртлары къаравуллай. Школа чагъына етишмеген яшлар учун яшлар бавлары гьава йимик тарыкъ. Школада билим берив янгы къайдагъа гёчген сонг чу, яшланы мугькам билим алыву, ону булан оланы савлай гележеги гьасил болажакъны гьисапгъа айрокъда алма герек. Районну башын тутгъанлар буса оьз янындан гьар гиччипавгъа герекли тергев етишсин, олагъа яшлар бавларында ерлер болсун учун къаст этегенни билдирелер.

 

 

 

Герейхан Гьажиев,

хас мухбирибиз.

СУРАТДА: Геметёбеде яшлар бавуну ачылыву.

Авторизация
*
*
Регистрация
*
*
*
Согласны с условиями сайта?
Генерация пароля