«Ярым юз йыл билим бердинг халкъынга»





Маълумат:

Гюлнашират Зиявутдиновна Салаватова (Ибашева) 1940-нчы йылда сентябр айны 19-нда бырынгъы Уллубийавул юртда тувгъан. Ол 6 йыллыкъ чагъында ата юртундагъы школагъа баргъан. Тек орта билимни ол Магьачкъалада алгъан, демек, шагьардагъы 4 номерли школаны битдирген.

1957–1960-нчы йылларда Г. Салаватова Буйнакскидеги педагогика училищеде  орта хас билим алгъан. Ол школада башлапгъы класлардагъы охувчулар булан бирче  оьрдеги  класларда орус тилден дарс бермеге  башлагъан.

Оьзюню загьмат ёлун Г.Салаватова 1960-нчы йылда  башлай. Шо касбуну ол 54 йылны боюнда оьзгелеге  уьлгюлю кюйде юрютген.

1975–1981-нчи йылларда ол ДГУ-ну филология факультетин битдирип оьр билим алгъан ва «орус тилни ва адабиятны, ана тилни ва адабиятны муаллимли» деген касбугъа ес болгъан.

Г. Салаватова Уллубийавул орта школада муаллимни, завуч-къурувчуну, директорну охув ва билим ишлеге къарайгъан заместителини къуллукъларында  ишлеген.

1985-нчи йылны август айында Гюлнашират Салаватова Уллубийавул орта  школаны директору болуп белгилене. Ол директор заманда школагъа янгы типовой бина къурула.

Гюлнашират Салаватова пачалыкъны янындан кёп грамоталагъа, дипломлагъа ва оьзге  савгъатлагъа ес болгъан. Огъар  «Халкъгъа билим беривюню отличниги (1976 йыл), «ДАССР-ни ат къазангъан муаллими» (1982 йыл), «Загьматны ветераны» деген гьюрметли атлар берилген.

Олай да, ол – Дагъыстанны муаллимлерини 5 съездини ва 1978-нчи йылда Москвада оьтгерилген муаллимлени Бютюнсоюз съездини делегаты.

Уьягьлюсю булан Г. Салаватова 5 авлетни оьсдюрген ва тарбиялагъан. Ол 3 керен  сыйлы гьаж намазлар къылып да гелген.




Салаватова (Ибашева) Гюлнашират  Зиявутдиновна 54 йылны боюнда Уллубийавулну халкъына билим, гьакъыл ва  тарбия берген. Айтагъаным, ол шончакъы йылланы узагъында школада охувчулагъа  билим берген, оланы тюз ёлгъа салгъан, юртну билим  берив  тармагъыны кюрчюсюн салгъан деп айтмагъа ярай.

Алдагъы гюнлерде оьзюню оьмюрюню 54 йылын багъышлагъан Уллубийавул орта школада Гюлнашират Салаватовагъа багъышлангъан шатлыкъ чара оьтгерилди. Шо шатлыкъ чарада школаны муаллимлери  ва охувчулары булан бирче, юрт администрацияны жаваплы къуллукъчулары ва юртлулары ортакъчылыкъ этдилер. Олай да, шатлыкъда Къарабудагъгент район администрацияны къуллукъчусу Жамалутдин Имакъов да оьзюню ортакъчылыгъын болдурду.

Шатлыкъ чарагъа чакъырылгъанлар булан саламлашгъан сонг, Уллубийавул  орта школаны директору Муъминат Умаева сёзню ана тилден дарс береген муаллимлер Айгьанат Алишевагъа ва Арисханум Лабазановагъа тапшурду.

Шатлыкъ чараны юрютювчю муаллимлер инг башлап Гюлнашират Салаватованы яшав ёлу гьакъда айтдылар. Сонг ону загьмат ёлун, етишген уьстюнлюклерин, оьзге оьрлюклерин де  эсгердилер.

Айрокъда Г. Салаватова класдан тышдагъы ишлеге бек агьамият берип ишлеген, ону ёлбашчылыгъы булан тарбиялав темагъа кёп чаралар оьтгерилген. Демек, бизин белгили халкъ шаирибиз Анвар  Гьажиевни ва СССР-ни халкъ артисткасы Барият Муратованы 2014-нчю йылны ичинде 100 йыллыкъ юбилейлери белгиленди. Уллубийавул орта школада шо белгили адамларыбызгъа, оьктемлик­лерибизге багъышлангъан шатлыкъланы Г. Салаватова тюбюне гирип онгарды ва оьтгерди. Шо да ол оьзюню касбусун къаны-жаны булан сюегенин исбатлай.

Гюлнашират Салаватова оьзю танг­лагъан муаллимлик касбу булан янаша,  поэзияны денгизине де «чомулгъан». Ону шиърулары «Районну яшаву» ва «Ёлдаш» газетлерде чыкъгъан.

«Уллубойнакъ», «Ата юртум» ва «Уллубийавул» деген шиъруларын ол ата юртуна, ону гёзеллигине багъышлагъан. Ону шиъруларыны арасында юртлуларына, юртуну белгили адамларына багъышлангъанлары да айрыча ерни тута. Олай да, Г.Салаватова оьзюню дарсларында охувчуларына ата юртун, ана тилин, оьз Ватанын, къумукъ  тилин сюймеге, олагъа абур  этмеге ча­къыра ва уьйрете.

Шоллукъда, шо гюнгю шатлыкъ чарада Г. Салаватованы «Уллубийге», «Юртумну оьктемлиги», «Памятник», «Ширавов Абдурагьмангъа», «Зарив бажив, юртгъа къайт», «Къумукъ тилим», «Сюемен къумукъ халкъым» деген ва дагъы да шиъруларын школаны охувчулары ва муаллимлери  охудулар.

Сонг да, 11-нчи «б» класны охувчулары А. Алиева ва Н. Агъаева Г. Салаватовагъа багъышлап язгъан асарларын охудулар.

Оьтгерилген шатлыкъда Къарабудагъгент район администрацияны къуллукъчусу Жамалутдин Имакъов сёйлей туруп, Гюлнашират Зиявутдиновнаны уьлгюлю  муаллимлик загьматы янгыз Уллубийавулну тюгюл, савлай Къарабудагъгент районну тарихине гирежегин эсгерди. Оьзюню  сёйлевюн тамамлай туруп, ол Гюлнашират  Салаватовагъа районну башчысы Къапур Исаевни атындан Гьюрметлев грамота тапшурду.

 

Багьавутдин Самадов


Авторизация
*
*
Регистрация
*
*
*
Согласны с условиями сайта?
Генерация пароля