Таъсирли йырлар йырланды

Шо агьвалатгъа байлавлу болуп Боташ­юртгъа районну гьар юртундан дегенлей чакъырылып гелген къонакълар: яратывчу интеллигенцияны вакиллери булан бирге охувчу яшлар, шаирлер булан журналистлер, йыравлар булан аты данггъа чыкъгъан муаллимлер ва кёп санавдагъы оьзге тюрлю касбуланы есилери бар эди.

«Водник» деген маданият центрны режиссёру Арслан Шагьмуратов къонакъланы хошун гётермек учун арив тавушу булан йыр йырлап, оьтгерилеген байрамны ачмакъ учун район администрацияны маданият бёлюгюню башчысы Муртазали Магьамматовгъа сёз берди.

Ол район администрацияны атындан гелген къонакъланы, Боташюртну жамаатын шатлы агьвалат булан къутлай туруп, райондагъы юртланы арасында Боташюртда «Маданиятны йылына» биринчилей болуп кюрчю салынгъанын айрыча эсгерди. Районда яшёрюмлени тарбиялавда маданият аслу ер тутагъан къуралланы бири болуп токътайгъанны эсгерип, оьзюню ва районну башчысы Жанболат Салавовну къутлавларын жыйынны ортакъчыларына етишдирди.

Шатлы жыйынны юрютеген Арслан Шагьмуратов Муртазали Магьамматовну сёзюнден сонг белгили йырав, аргъанчы,  Дагъыстан Республиканы маданиятыны ат къазангъан къуллукъчусу Вазипат Кукуевагъа сёз берилип аргъан булан ортагъа чыкъгъанда, зал толгъан халкъ ону эретуруп къаршылады. Вазипатны гьар йырлагъан йыры юреклеге яв болуп ягъыла эди деме ярай. Ондан сонг чыгъып йырлагъан чебер иш гёреген кружокну ортакъчылары Лариса Пашабекова ва Мадина Элибиева тынглавчуланы оьзтёрече пагьмусу булан таныш этдилер. Османюртлу пагьмулар йырлап да, бийип де бажарагъанлыгъын исбат этдилер. Муцалавулдан Сайит Байсонгуров, Тукитадан Солтанат Османова, Яхсайдан Йырчы Къазакъны сёзлерине гёре йыр айтгъан Билал Ибрагьимов да лап оьр макътавлагъа лайыкълы болдулар.

Моксоб юртдан Патимат Шапиеваны, Гьажимажагьатюртдан Иса Багьавовну, Кёстекден Асият Жанболатованы ва Арсен Сулеймановну йыр пагьмусу да тынглавчуланы кёплерин орталыкъгъа чыгъып бийиме борчлу этди. Чагъаротардан гелген Милана Гьюсейнованы чыгъышы хыйлыланы тергевюн тартды. Къумукъ эстраданы юлдузу Сайха Закарьяева оьзюню йырлары булан жыйылгъанланы къурчун къандырды ва огъар жыйылгъанлар эретуруп харс ура эди. Боташюрт медпунктну баш врачы Элмира Умарованы алгъышлы сёзлеринден сонг, эгизлер Айбике ва Нюрбике Умаровалар анасы Зайгинат булан алышып йырлайгъан кюю де кёплени тергевюн тартар йимик эди.

 

 

 

Магьаррам АЛИМГЬАЖИЕВ.

Къазбек ЗУБАЙЫРОВ чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля