Энниден сонг да ону юбилейине байлавлу материаллар газетибизде чыгъып туражакъ. Оьзюню тенги ёкъ артисткабыз уллу сагьнада халкъына къуллукъ этип, ону сюювюн ва разилигин къазана туруп сав яшавун, оьмюрюн йиберген. Барият йимик биз оьзюню 100 йыллыкъ юбилейин бу йыл белгилейген Дагъыстанны халкъ шаири Анвар Гьажиевни огъар багъышлап язгъан булай куплетлери бар.
Гюлкъыз ва Гюн
Гюлкъыз да, Гюн–анасы да,
Гелгенли бу аламгъа,
Гёнгюл юклей арбасына–
Гёз тиймесин адамгъа!
Гюнню гёрсе, гюллер яшнай,
Етише мурадына.
Гёнгюллер гюл ачма башлай,
Гёрюнсе Муратова.
Экевю де нюрлю алай,
Башгъалыгъы арада:
Гюн–анасы кёкде ойнай,
Гюлкъыз ойнай сагьнада.
Барият Муратованы юбилейине байлавлу чаралар районларда, юрт школаларда да оьтгерилип тура. Алдагъы жума Буйнакск районну Буглен юртунда Ш. Шихсайитовну атындагъы школада да ону юбилейине байлавлу оьтгерилген чаралар тёбенде бериле.
Оьр ва тёр сагьнаны бийкеси!..
Бугленде Ш. И. Шихсайитовну атындагъы орта школада СССР-ни халкъ артисткасы, оьр сагьналаны бийкеси болгъан Барият Муратованы 100 йыллыгъына багъышлангъан ёлугъув Магьачкъаладан гелген гьюрметли къонакъланы ортакъчылыгъы да булан заманлагъа эсде къалар йимик арив оьтдю. Залны ичи охувчулардан ва муаллимлерден толгъан. Тёр тамгъа сююмлю халкъ артистканы уллу сураты салынгъан. Оьзге тамлагъа да Б. Муратованы яшав ва яратывчулукъ ёлу гьакъда хабар береген там газетлер, сурат выставкалар ва оьзге тюрлю гёрсетив алатлар илинген.
Эсделик байрамны Буглен орта школада ана тил ва адабият дарсланы юрютеген муаллим М. Мамайханов ачды ва юрютдю. Ол ёлугъувгъа гелген къонакълар Россияны халкъ артисткасы Бурлият Ибрагьимова, республиканы белгили жамият чалышывчусу, РФ-ни маданиятыны ат къазангъан къуллукъчусу Разия Жамболатова, Дагъыстанны халкъ шаири Шейит-Ханум Алишева ёлдашлагъа исси кюйде хошгелди берди, олагъа гюл байламлар тапшургъан сонг сагьналаны устасы Б. Муратованы яшав ва яратывчулукъ ёлуну гьакъындагъы маълуматланы малим этди.
5-нчи ва 8-нчи класланы охувчулары сююмлю артисткагъа багъышлап, ана тилини балын чыгъарып шиърулар охудулар. Оьрдеги класланы охувчу къызлары Н. Жаватова, З. Апутаева англы тавушлары булан йырлар йырладылар. 5-нчи класны охувчулары яшлар учун да, уллулар учун да къужурлу шиърулар язагъан шаир В. Атаевни «Шагьарлы гелин» деген асарына кюрчюленген спектаклни къужурлу ойнап гёрсетдилер.
Школаны охувчу къызларындан къурулгъан хоруну ортакъчылары «Салам къумукъ халкъыма» деген йырны да бек таъсирли кюйде айтдылар. Молла Насрутдин деген, бары да халкъланы тюгесинмес хазнасы саналагъан спектаклден гесеклерин гёрсетген сонг сагьнагъа Россияны халкъ артисткасы Бурлият Ибрагьимова гётерилди. Ол яшлагъа Барият Муратова булан яш заманындан берли таныш экени, ону булан болгъан ёлугъувлары гьакъда хабарлады. Сонг буса, яш заманланы эсге алып, бир эки йыр йырлап да алды. Охувчулар сююмлю йыравгъа гюл байламлар тапшуралар.
Ондан сонг сагьнагъа чыкъгъан Дагъыстанны халкъ шаири Шейит-Ханум Алишева Барият булан болгъан ёлугъувлары гьакъда айтып, огъар багъышлагъан шиърусун охуду, яшлагъа насигьат сёзлер айтды, арив ёравлар багъышлады.
Барият
МУРАТОВАГЪА
Сен тувдунг Жюнгютейни
Болуп ярыкъ юлдузу,
Женнетдей Къумукътюзню
Берекетли Гюл къызы.
Миллет кёгюн балкъытгъан
Гюнеш болдунг, Барият.
Мюкюр, пагьмунга мюкюр
Дослар булан бары ят.
Гиччилей аякъ басдынг
Театрны тёрюне.
Сенсиз къалгъан сагьналар
Сай денгиздей гёрюне.
Сагъа ошагъан гьеч ёкъ,
Сен къойгъан ер энни бош.
Сен чыкъсанг, яш-уллуну
Бола эди гёнгю хош.
Гюллеп сени къыйнады
Бир къыпыйлар, баягъы.
Сёндюрме чи болмады
Пагьмунгну мол маягъын.
Бийке атынг ашалтмай
Етишдинг мурадынга.
Оьзден халкъынгны сыйын
Оьр этдинг, Муратова!
Тоюп болар гьаллар ёкъ
Сени бюлбюл сесингден.
Яшайсан, яшажакъсан
Сен халкъынгны эсинде.
Абдулла БУГЛЕНЛИ.
