Юртлум, танышым ва хоншум Осман Халимбековну да яшдан тутуп йыргъа пагьмусу бар. Ол да оьзюню пагьмусун ачмакъ учун аз къыйын тёкмеген.
Бугюн Осман Халимбеков – янгыз Бабаюрт районда тюгюл, ондан тышда да танывлу йырав. Ол эркеклени Дагъыстангъа белгили «Тюзню тавушу» деген хорну солисти гьисапда хыйлы-хыйлы ерлерде болгъан. Гьар гезик уьстюнлюк булан оьз районуна къайта.
Яшда гёрген яшынмас дей къумукъларда. Осман Халимбековну гьар гезик сагьнада гёрсем, яшда, бир орамны яшлары, эстрада группа да къуруп, гечебиз-гюнюбюз булан йырлап ойнайгъаныкъ эсиме гелип гете. Озокъда, шо вакътилерде бизин музыка алатларыбыз янгыз такъа-тукъа эди. Амма шо заманда да Осман Халимбеков бизин йыравубуз эди, накъырачыбыз да. Айтагъаным, сонггъа таба биз гьарибиз оьзюбюзге ювукъ ёлланы тангладыкъ, амма Осман буса оьзюню къысматын толу кюйде сагьна булан байлады.
Осман Халимбеков 1978-нчи йылда Адил Янгыюртда тувгъан. Ерли школада охугъан. Школада охуйгъан йылларында да ол школа оьлчевде оьтгерилеген гьар тюрлю чараларда ортакъчылыкъ эте эди, ону тавушуна ва сагьнада оьзюн тутуп болагъанына муаллимлер де, охувчу яшлар да тамаша бола эди.
Юрт школаны тамамлап, ол асгерлик борчун кютмеге гетди. Оьзю къуллукъ этеген асгер бёлюкде ол тез заманны ичинде абур ва сый къазана. Онда да ол оьзюню пагьмусун ача, асгер ёлдашларын айланасына жыйып, гьар тюрлю йырланы йырлай. Командирлери, оьзюню айланасына асгер ёлдашларын жыйып, олагъа яхшы таъсирин эслеп, Осман Халимбековгъа сержант чин бере, бёлюкню командири этип белгилей. Оьзюне берилген тапшурувланы ол уьлгюлю кюйде кюте, Ватанына гьалал къуллукъ эте. Уьстюнлю кюйде ватандаш борчун кютюп, 1998-нчи йылда ата юртуна къайта.
Мен макъаламны башында яшда эстрада группа къургъан кююбюзню эсгергеним негьакъ тюгюл. Осман Халимбеков асгерден къайтгъан сонг, оьзюню айланасына пагьмулу яшланы жыйып, бу гезик йыр касбучуланы группасын къура, ону тавушу районну юртларында чалынмагъа башлай. Йыргъа ачыкъдан пагьмусу барны гёрсетмеге болгъан Османны районну маданият бёлюгюню о замангъы ёлбашчысы Ималдин Муцалгъанов эс эте ва ону ишге чакъыра.
– Мени учун шо яратывчулукъ ёлумда алынгъан мекенли абат болду, – дей мени булангъы лакъырында Осман Халимбеков. – Мен бай сынавлу ва терен пагьмулу Ималдин Муцалхановдан кёп затгъа уьйрендим, ол магъа йырны терен сырларын ачмагъа кёмек этди. Мен ону бир заманда да унутмажакъман.
Ималдин Муцалхановну сиптечилиги булан 2003-нчю йылда «Тюзню тавушу» деген эркеклени хору ачыла. Хорну солистлери этип шо вакътиге оьзлени яхшы яндан танытмагъа болгъан Осман Халимбековну ва Завур Завуровну белгилей. «Тюзню тавушу» булан Бабаюрт район савлай Дагъыстангъа чы нечик де, ондан тышгъа да белгили бола.
– «Тюзню тавушу» Бабаюрт районну маданиятыны ярыкъ юзю болуп битген, – дей, шо гьакъда айта туруп, Осман Халимбеков. – Къайсы районгъа, къайсы шагьаргъа барсакъ да, бизин онда кёп сююп къаршылай. Озокъда, шону булан оьктем болмай да болмайсан. Амма шо бизин яныбыздан жаваплыкъны да талап эте. Бизге сагьнада даражабызны тёбенлешдирмеге ярамай.
Осман Халимбеков ва «Тюзню тавушу» деген коллектив учун лап да уллу уьстюнлюклер артдагъы 2–3 йылны ичинде гелди демеге ярай. Хорну ортакъчылары гетген йыл Аргун шагьарда Мычыгъыш Республиканы биринчи Президенти Агьмат-гьажи Къадыровну тувгъан гюнюне байлавлу оьтгерилген халкъара фестивальны ва «Терик – дослукъну оьзени» деген фестивальны лауреаты болду. Дагъыстанны ичинде оьтгерилеген гьар конкурсда, гьар фестивальда ортакъчылыкъ эте туруп да, олар алдынлы ерлени алып турдулар. «Тюзню тавушуну» йырлары уллу уьлкебизни якъ-ягъында чалынмагъа башлагъанлыкъда ону йыраву Осман Халимбековну аслам къошуму бар.
Осман Халимбеков учун лап да уллу уьстюнлюк бу йылны июль айында Къара денгизни ягъасында ерлешген Сочи шагьарда оьтгерилген IX Бютюндюнья чыгъышларында ортакъчылыкъ этгени болуп токътагъангъа шеклик ёкъ. Дюньяны беш де янындан гелген 12 мингден де артыкъ лап да гючлю тавушлары булангъы йыравланы жыйынында савлай Дагъыстанны атындан Бабаюртдагъы «Тангчолпан» деген Россияны халкъларыны мердешли маданият центрыны «Тюзню тавушу» деген хору ортакъчылыкъ этгени де республиканы маданият министерлигини янында бизин коллективге этилген инамлыгъын исбатлады.
– Озокъда, артдагъы уьстюнлюгюбюз бизин учун лап да къыйын ва лап да гёрмекли болду, – дей Осман Халимбеков. – Сонг да, шо узакъ 10 йылланы боюнда эркеклени хору этген ёлну натижасы да болду. Бизге этмеге герек дагъы да кёп иш бар. Етишген уьстюнлюклер булан рази болуп къалмагъа тюшмей, алгъа юрюмеге герек.
Алгъа юрюмек учун гюч де герек, пагьму да, билим де… Пагьмугъа бай Осман Халимбеков буса оьзюню билимин толумлашдырмакъ учун Магьачкъалада Барият Муратованы атындагъы маданият ва инчесаният коллежге де охумагъа тюшген, янгы оьрлюклеге етишмеге гюч де жыя. Ону Дагъыстанны маданиятында оьзюню ери де, оьзюню аты да бар. Артдагъы йыл огъар Дагъыстанны маданият министерлигини гранты да тапшурулгъан эди.
Герейхан Гьажиев,
бизин мухбирибиз.
Суратда: Осман Халимбеков.
Автор чыгъаргъан сурат.
