Артдагъы заманларда бир-бир ерлерде яшлар бавлары, школалар ачылып турагъанны эслейбиз. Алдагъы гюнлерде де Карабудагъгент районну Агъачавул юртунда уллу жанланыв, къуванч бар эди. Айтагъаным, шо гюн онда «Насипли гиччипав» деген янгы яшлар баву ачылды. Шо шатлы жыйында «Къарабудагъгент район» деген муниципал къурулувуну ёлбашчысы Магьмут Амиралиев, Дагъыстанны яш наслуну ишлерине къарайгъан министр Арсен Гьажиев, Магьачкъала шагьар жыйыныны депутаты Елена Кожухина, Къарабудагъгент районну башчысыны биринчи заместители Агьмат Гьажиев ва оьзгелер ортакъчылыкъ этдилер.
_________________________________________________________
«Насипли гиччипав» деген яшлар баву гьалиги талаплагъа гёре, тийишли имканлыкълары булан къурулгъан. Шонда 105 яш гененип айланмагъа, парахат кюйде тарбияланмагъа болажакъ. Гьар группа булан иш гёрмек учун ял алмагъа, ойнамагъа, дарслар юрютмеге болагъан айрыча уьйлер бар. Олай да, шо яшлар уьюнде логопед касбучу учун да гьазирленген онгача ер барны эсгермей болмайман. Сонг да, кёп арив онгайлыкълары булангъы ашханасы кимни де тергевюн тартмай къоймай. Гиччипавлагъа гезеп айланма, спорт булан доланма болагъан беседкалары, ойнайгъан майданчалары сукъландыра.
Къарабудагъгент районну ёлбашчысы Магьмут Амиралиев яшлар бавуну ачылывуна багъышлангъан гиришив сёзюнде булай эсгерди:
–Инг башлап мен Агъачавул юртну жамиятын гёрмекли агьвалат булан гьакъ юрекден къутлайман. Бугюнден башлап гьалиги къайдалагъа гёре мукъаятлы кюйде къурулгъан яшлар бавунда 105 гиччипав билим алма, тарбияланма бола. Олай да, бу ожакъда кёп адам иш булан таъмин де этилинежек. Яшлар бавуну коллективине ишигиз къуванчлыкъ гелтиргенни, яшлар да шу ожакъгъа гёнгюлю кюйде юрюмекни ёрайман.
Ону арты булан чыгъып сёйлеген Дагъыстанны яш наслуну ишлерине къарайгъан министр Арсен Гьажиев булай деди:
–Бугюн янгыз Къарабудагъгент учун тюгюл, савлай республика учун да байрам демеге ярай. Республиканы Башчысы Рамазан Абдулатипов торайып гелеген наслуну тарбиялавуна, оьсювюне бек агьамият бере. Бугюн мен бу гьаракатгъа къол ялгъап, спонсор болуп, агъачавуллулагъа савгъат этген меценат Расул Абсаламовгъа баракалламны билдиремен.
Дагъыстанны жамият яшавундагъы гьаракаты, оьсюп гелеген наслуну тарбиялавунда ортакъчылыкъ этегени учун Расул ва Айманат Абсаламовлагъа Дагъыстанны яшёрюмлени ишлерине къарайгъан министерлигини баракалла грамоталары тапшурулду.
Къутлавлардан сонг адатлы кюйде Къарабудагъгент районну ёлбашчысы М. Амиралиев, министр А. Гьажиев, спонсор Р. Абсаламов юртлулар ва тарбиялавчулар булан бирге, къызыл лентаны гесип, яшлар бавун ачдылар. Арты булан гиччипавланы къуршап, къужурлу кюйде гьазирленген концерт программасын гёрсетдилер.
П. Гьайбуллаева.
