Магьачкъала шагьардагъы Н. Юсуповну атындагъы яшланы китапханасында ДР-ни язывчуларыны союзуну, ДР-ни журналистлерини союзуну, Дагъыстанны къурчакъ театрыны якълавуну тюбюнде «Россияны адабият картасында мени Ватаным» деген яшланы ва яшёрюмлени яратывчулукъ ярышы оьтгерилген. Маданиятны йылында уллу агьамияты бар бу агьвалат башлап ерлерде – районлардагъы ва шагьарлардагъы китапханаларда юрюлген. Ярыш юрюлеген заманны ичинде яшланы яратывчулукъ ишлери бир нече номинацияда къабул этилген. Шоланы арасында проза ва шиъру къайдада язылгъан асарланы чебер охумакъ, оьзлер язгъан чебер асарларын ва шолай да оьзгелерин эсгермеге ярай.
Яшланы китап охумагъа гьаваслыгъын артдырагъан чаралар «Къарабудагъгент район» деген муниципал къурулувуну китапхана район бёлюгюню къуллукъчуларыны къастлыгъы булан юрюлгенин де эсгермеге ярай. Ярышгъа гьазир этилген яратывчулукъ ишлеге къыймат бермек учун маданият, билим берив тармакъланы ва маълумат къуралланы къуллукъчулары да къуршалгъан эди. Районда натижалар чыгъарылгъан сонг, алдынлыкъны алгъан яшланы ва яшёрюмлени яратывчулукъ ишлерине республиканы оьлчевюнде къурулгъан жюри къарады. Охувчуланы билимлерин артдырагъан ярышда олар кёп сююп айыргъан номинацияда оьзлени пагьмуларын гёрсетди.
Дагъыстанны бары да районларындан ва шагьарларындан гелген яшланы арасында къарабудагъгентли яшлар да алдынлы ерлеге чыкъмагъа бажарды. «Къарабудагъгент район» деген къурулувуну китапхана район бёлюгюню методисти Субайбат Гьажиева бизге билдирген кюйде, шоланы арасында Ажий Бахриеваны, Гюлженнет Къазиеваны, Минара Гьажиеваны ва Фатима Гьайдарованы атларын айрыча эсгермеге ярай. Олар «Къарабудагъгент районну той адатлары», «Расул Гьамзатовну яшаву ва яратывчулугъу» деген темаларда рефератлар гьазир этип, «Театр – тамаша дюнья» деген темада эссе язып, савгъатлы ерлеге чыкъмагъа бажарды.
Къарабудагъгентдеги юрт китапхананы охувчусу Мадина Къаранаева буса шо ярышда белгили къумукъ шаир, Дагъыстан Республиканы пачалыкъ савгъатыны лауреаты Бадрутдин Магьамматовну «Къабурдан кагъыз» деген шиърусун чебер охуп, ярышны алдынлысы болду. Огъар жюрини янындан баракалла кагъыз берилди. Оьзлени пагьмусун оьр даражада гёрсетмеге болгъан яшлагъа дипломлар ва савгъатлар тапшурулду.
Шу меселде юрюлеген ярышлар яшланы китапгъа, адабиятгъа ювукъ ва яратывчулукъ дюньясын бай эте.
Барият ОЬЛМЕСОВА.
СУРАТДА: ярышны лауреаты М. Къаранаева.
