Оьтген жумагюн, апрелни 28-нде, Къумукъ театрны бинасында шаир, Хасавюрт районда чыгъагъан «Къумукъ тюз» деген газетни баш редактору Гёгюрчюн Атаеваны юбилей ахшамы оьтгерилди. Театрны сагьнасы шаир кёп сюеген къызыл пайпелеклер булан безендирилген. Дагъыстанны ат къазангъан артисткасы Зугьра Межитова зал толгъан къаравчуланы геч яхшы болсун деп къаршылады ва оьзюню оьзтёрече усталыгъы булан бу шат жыйынны бажарывлу кюйде юрютдю.
______________________________________________________________________
Сагьнагъа Дагъыстанны язывчуларыны союзуну председатели, Дагъыстанны халкъ шаири Магьаммат Агьматов ва къумукъ секцияны ёлбашчысы, Дагъыстанны халкъ шаири Шейит-Ханум Алишева чакъырыла. Олар экевю де Гёгюрчюн Атаеваны яратывчулугъуну гьакъында мекенли кюйде айтды ва шаирни юбилейи булан къутлады.
Хасавюрт шагьарны башчысыны биринчи заместители, шагьарны ЖКХ-сыны ёлбашчысы сагьнагъа чакъырыла. Шагьарны башчысыны атындан къутлав кагъызны охуй. «Дружба» деген газетни коллективи юбилярны къутлай. Сёйлевлер булан аралашдырып, йыравларыбыз Латип Шайыпов, Зоя Сатуева, Юлдуз Топаева Гёгюрчюнню шиъруларына гёре йырлар йырлады, къаравчуланы харс урувларын къазанды.
Профессор Абдулкъадир Абдуллатипов адабиятчы гьисапда шаирни яратывчулугъу булан ювукъдан таныш. Г. Атаеваны сююв лирикасыны, ата-анагъа, табиатгъа, яшав аралыкълагъа багъышлангъан шиъруларыны гьакъында айта туруп, шаир Гёгюрчюнню къанатлары тезден къатгъанны эсгерди ва ону къутлады. «Ёлдаш» газетни атындан баш редакторну заместители Къарамагьаммат Къараев де Гёгюрчюн тезден берли газет булан тыгъыс байлавлукълар юрютегенни, ону шиърулары, макъалалары газетде чакъда-чакъда чыгъагъанны айта туруп, коллективни атындан шаирни юбилейи булан къутлады.
Хасавюрт районну юртларындагъы школаланы муаллимлери, Хасавюртдагъы педагогика коллежни къуллукъчулары, шаирни ата юрту хамавюртлулар, Мычыгъыш Республикадан, Борагъандан гелген къонакълар гьариси сагьнагъа чыгъып, юбилярны атына исси сёзлер айта туруп, ону къутладылар. Йыравлар Альбина Къазакъмурзаева, Найида Абдуллаева, Лайла Алиева, Солтанат Атаева, Руслан Загьиров йырлар йырлап, къаравчуланы къувандырды. Къумукъ театрны артистлери къаравчулагъа таъсир этеген кюйде Гёгюрчюнню шиъруларын охуду.
Юбилей ахшамны ахырында Гёгюрчюнню къызардашы Жавгьар сагьнагъа чыгъып юбилей ахшамда ортакъчылыкъ этгенлеге гьакъ юрекден разилигин билдире туруп, баракалла сёзлер айтды.
Я. Бийдуллаев.
Суратда: юбилей ахшамындан.
