КАМИЛАНЫ БИРИНЧИ УЬСТЮНЛЮГЮ

 


Март айны 19-нда Москва шагьардагъы финансово-юридический университетни бинасында гиччипавланы арасында «Юсимас» (UCMAS) деген арифметикадан 2-нчи Бютюнроссия ярышлары оьтгерилген. Шонда Каспийск шагьарда охуйгъан 6 йыллыкъ къумукъ къыз чакъырылып ортакъчылыкъ этген. Камила Уллубиевна Жанхуватова бу ярышларда 3-нчю ерге ес болгъан.


Бу гьакъда Камиланы анасы Разият Жанхуватова «Яшланы дюньясына» гиччирек баянлыкъ бере:

–Камила бу школада охуйгъанлы нече йыл бола?


– Бизин къызыбыз бу янгы ачылгъан «Юсимас» деген школагъа 5 йылындан тутуп юрюй. Бу йыл онда охуйгъаны 2-нчи йыл. Эсибизге де гелмей эди булай ерде ортакъчылыкъ этме имканлыкълар болур деп. Камиланы биринчи уьстюнлюгю бизин бек сююндюрдю. Ондан къайры да, ол бизин Дагъыс­тандан лап гиччиси эди.

–Къызыгъыз орта школада охуйму?


– Бу йыл ону, Аллагь буюрса, 1-нчи класгъа берме сюебиз. Буссагьат шу школадан къайры ерде охумай.

–Сиз къайсы юртлуларсыз?


– Къарабудагъгент районну Паравул юртунданбыз.

–Биз бек сююндюк бизин къумукъ къыз шулай гиччи чагъында кёп яшланы арасында 3-нчю ерге ес болгъанына. Яратгъаныбыз ону ёлларын ачыкъ этсин, насипли болсун дагъыдан да уллу уьстюнлюклени еси болма, юрекдеги муратларын яшавгъа чыгъарма Аллагьдан кёмек болсун!


– Амин! Аллагь рази болсун сизге де, шулай бизин учун заманыгъызны тас этип ишлейгенигиз саялы. «Ёлдаш» газетни коллективине Аллагь савлукъ берсин!


«Яшланы дюньясы».


Авторизация
*
*
Регистрация
*
*
*
Согласны с условиями сайта?
Генерация пароля